اۋلا قاشان اباتتاندىرىلادى؟
س.سەيفۋللين كوشەسىندەگى №10 ءۇيدىڭ اۋلاسى سارىارقا اۋدانىنىڭ بيىلعى اباتتاندىرۋ جوسپارىنا كىرمەي قالعان. سول سەبەپتەن بۇل ءۇيدىڭ تۇرعىندارى وسى ماسەلەنى جەدەلدەتۋ ءۇشىن جاقىندا قالالىق ماسليحاتقا وتىنىشپەن شىقتى. ولار سونىڭ ىشىندە اۋلاعا جاڭا ويىن الاڭى كەرەك دەپ وتىر. تۇرعىندارمەن كەزدەسۋگە ءماسليحات حاتشىسى جانات نۇرپەيىسوۆ جانە سارىارقا اۋدانى اكىمىنىڭ ورىنباسارى ەرجان جاكۋباەۆ بارىپ, جاعدايمەن تانىستى.
بۇل قالالىق ءماسليحاتقا اتالمىش مەكەنجايدان تۇسكەن العاشقى ءوتىنىش ەمەس ەكەنىن ايتا كەتەيىك. وسىدان جارتى جىل بۇرىن وسى ءۇيدىڭ ءبىر پاتەر يەسى ءۇي تۇرعىندارى شاتىردى جوندەۋ جۇمىستارىنا قاتىسۋدان باس تارتقاندىقتان سوڭعى قاباتتاعى پاتەر يەلەرى زارداپ شەگىپ جاتقانىن جەتكىزىپ, شاعىمداندى. جاعدايدى انىقتاۋ بارىسىندا باسقا دا تۇيتكىلدى ماسەلەلەر شىقتى. پيك جانە سارىارقا اۋدانى اكىمدىگىنىڭ وكىلدەرى بىرىگە وتىرىپ ماسەلەنى شەشەمىز دەپ ۋادە بەردى. ارتىنشا تۇرعىندارعا «تۇرعىن ءۇي-كوممۋنالدىق شارۋاشىلىقتى جاڭعىرتۋ»
باعدارلاماسىنا قاتىسۋعا ۇسىنىس جاسالدى. الايدا تۇرعىندار ودان باس تارتىپ, شاتىردى وزدەرى جوندەۋگە كىرىسەتىندەرىن ايتتى.
بۇل جولعى ماسەلە بويىنشا ءۇي تۇرعىنى احەديار مىرزاقۇلوۆ بىلتىر اۋدان اكىمدىگى ءۇي اۋلاسىن اباتتاندىرۋدى وسى جىلدىڭ جوسپارىنا ەنگىزۋگە ءسوز بەرگەنىن جەتكىزدى. اۋدان اكىمىنىڭ ورىنباسارى ەرجان جاكۋباەۆ اۋداندىق بيۋدجەت بۇعان مۇمكىندىك بەرمەگەنىن ايتا كەلە, الداعى جىلى اباتتاندىرىلاتىن اۋلالاردىڭ ءتىزىمى جاسالعاندا مىندەتتى تۇردە سول تىزىمگە بۇل اۋلانى ءبىرىنشى قوساتىنىن اتاپ ءوتتى.
كەزدەسۋدە تاعى بىرنەشە ماسەلە انىقتالدى. كوپتەگەن كولىكتەر قالاداعى كەپتەلىستى اينالىپ ءوتۋ ءۇشىن وسى ءۇيدىڭ اۋلاسى ىشىمەن جۇرەتىن بولعان. بۇل جاعداي حالىقتىڭ ومىرىنە قاۋىپ تۋدىرىپ وتىر. وسىعان بايلانىستى پاتەر يەلەرى اۋلاعا شلاگباۋم ورناتۋدى جانە تۇرعىنداردىڭ اۆتوكولىكتەرىنە ارناپ شاعىن اۆتوتۇراق ۇيىمداستىرۋدى ءوتىندى.
«ءبىرىنشى پودەزدىڭ الدى كوكتەم جانە كۇز ايلارىندا كول بولىپ جاتادى. ءۇيىمىزدىڭ جانىنان بيىك ءۇي سالعاندا دەڭگەي ەسكەرىلمەگەن. سونىڭ سالدارىنان ءبىزدىڭ ءۇي ءتومەندە قالىپ, جاڭبىر جانە قار سۋلارى بىزگە قاراي اعىپ, جەرتولەنى سۋ باسۋدا. ءۇي بولسا اقىرىنداپ دىم تارتىپ بۇزىلۋدا» دەپ قىنجىلا ايتقان ا.مىرزاقۇلوۆ تاعى ءبىر ماسەلەنىڭ شەتىن شىعاردى.
ءماسليحات حاتشىسى جانات نۇرپەيىسوۆ اۋدان اكىمىنىڭ ورىنباسارىنا تۇرعىنداردىڭ شاعىمدارىن ەسكەرىپ, اۋلانى اباتتاندىرۋ جۇمىسى كەزىندە جينالعان سۋدى ارنايى سۋ اعىزۋ جۇيەسى ارقىلى اعىزىپ جىبەرۋدى ويلاستىرۋدى تاپسىردى. ال شلاگباۋم ورناتۋ ماسەلەسى بويىنشا پوليتسياعا جۇگىنىپ, ارنايى رۇقسات قاعازىن الۋ كەرەكتىگىن ايتتى.
بىراق شلاگباۋمدى تۇرعىندار وزدەرى ورناتۋ قاجەتتىگىن, بۇل كەدەرگى قوندىرعىسى جاڭا ءتارتىپ بويىنشا ەلەكتروندى تۇردە كوتەرىلىپ, ءتۇسىپ تۇرۋ كەرەكتىگىن نەمەسە بۇل قىزمەتتى اتقاراتىن كىسى جالداۋ قاجەتتىگىن ەسكەرتتى.