ەرتەڭ XXIV قىسقى وليمپيادا ويىندارىنىڭ اشىلۋ سالتاناتى وتەدى. مەملەكەت باسشىسى
قاسىم-جومارت توقاەۆ قحر توراعاسى سي ءتسزينپيننىڭ شاقىرۋىمەن وليمپيادا ويىندارىنىڭ اشىلۋ سالتاناتىنا قاتىسۋ ءۇشىن 4-5 اقپان كۇندەرى بەيجىڭ قالاسىنا جۇمىس ساپارىمەن بارادى. ساپار بارىسىندا قازاقستان پرەزيدەنتى مەن قىتاي توراعاسى ەكىجاقتى كەلىسسوز جۇرگىزەدى دەپ جوسپارلانعان.
سپورتتىڭ 15 تۇرىنەن 109 مەدال جيىنتىعى ساراپقا سالىناتىن بۇل جولعى حالىقارالىق دودادا قازاقستان قۇراماسىنان سپورتتىڭ 8 تۇرىنەن 34 سپورتشى باق سىنايدى. ولار: شاڭعى جارىسى, فريستايل, اكروباتيكا جانە موگۋل, كونكيمەن جۇگىرۋ, شورت-ترەك, بياتلون, تاۋ شاڭعىسى, تۇعىردان سەكىرۋ, شاڭعى قوسسايىسى. جارىستىڭ جالپى بارىسىن «Qazaqstan» جانە «Qazsport» تەلەارنالارى تىكەلەي ەفيردە كورسەتەدى. اشىلۋ سالتاناتى نۇر-سۇلتان ۋاقىتىمەن 4 اقپان كۇنى 17:55-تە باستالادى.
كەشە بەيجىڭدە وليمپيادا الاۋىنىڭ ەستافەتاسى باستالدى. سالتاناتتى ءراسىم بەيجىڭنىڭ سولتۇستىگىندەگى وليمپيادالىق ساياباقتان شەرۋ تارتتى. الاۋ ەستافەتاسىن رەسمي تۇردە قىتاي مەملەكەتتىك كەڭەسىنىڭ ءبىرىنشى ۆيتسە-پرەمەرى حان چجەن اشتى. الاۋدى الىپ جۇرۋگە 14 پەن 86 جاس ارالىعىنداعى جالپى ەسەبى 1200 الاۋ ۇستاۋشى قاتىستى. سونداي-اق تاريحتا العاش رەت الاۋدى ادامدار عانا ەمەس, ماشينالار دا الىپ ءجۇردى. عالامدىق پاندەمياعا بايلانىستى ەستافەتانىڭ باعىتى مەن ۇزاقتىعى ءبىرشاما قىسقاردى. COVID-19-دىڭ الدىن الۋ ماقساتىندا ەستافەتاعا كورەرمەندەر قاتىسپايدى. ودان بولەك, الاۋدى ادامدار تۇراتىن كوشەلەر مەن اۋدانداردان الىس جەرلەردە الىپ ءجۇرۋ كوزدەلگەن.
2 اقپان كۇنى بەيجىڭدە اق وليمپيادانىڭ العاشقى ىرىكتەۋ سىندارى دا باستالىپ كەتتى. ياعني سارسەنبى كۇنى كەرلينگ, شايبالى حوككەي, فريستايل سياقتى سپورت تۇرىنەن العاشقى ىرىكتەۋ جارىستارى باستالدى. ال بۇگىن قازاقستاندىق فريستايلشىلار جارىس الاڭىنا شىعادى.
بايراقتى باسەكەدە جۇلدەلى ورىن العان قازاقستاندىق وليمپياداشىلار مەن پاراليمپياداشىلار (1-6 ورىن) اقشالاي سىياقى الادى. زاڭدا قاراستىرىلعانداي, جەڭىپ العان مەدالدارعا قاراي پاتەر دە بولىنەدى. ءبىرىنشى ورىن ءۇشىن 250 مىڭ دوللار, ودان كەيىن 150 مىڭ جانە 75 مىڭ دوللار سىياقى بەلگىلەنگەن.
