بابالارىمىزدىڭ قۇرمەتىنە ەسكەرتكىشتەردىڭ اشىلۋى – ءبىزدىڭ ۇرپاقتىڭ ولارعا دەگەن شىنايى ريزاشىلىعى مەن زور قۇرمەتىنىڭ كورىنىسى. قازىرگى كەزدە استانادا جانىبەك پەن كەرەيگە, ابىلاي مەن كەنەسارىعا, ابايعا, جامبىلعا جانە باۋىرجان مومىشۇلىنا ەسكەرتكىشتەر ورناتىلعان. حالىق قاھارمانى, قازاقتىڭ ءبىرتۋار پەرزەنتى باۋىرجان مومىشۇلىنا دەگەن ۇرپاق سۇيىسپەنشىلىگى شەكسىز. استانا قالاسىنداعى باتىر ەسىمىمەن اتالاتىن داڭعىلدىڭ بويىنا ورناتىلعان باۋىرجان مومىشۇلىنىڭ ەسكەرتكىشى دە سول سۇيىسپەنشىلىك بەلگىسى.
قىزىل گرانيتتەن جاسالعان بيىك تۇعىرعا قوندىرىلعان ءباھادۇردىڭ سۇستى دا سوم تۇلعاسىنىڭ بيىكتىگى ءتورت مەتردەن اسادى. ساۋلەتشى باقىتجان سىزدىقوۆ پەن ءمۇسىنشى تەمىرحان قولجىگىتتىڭ شىعارماشىلىق ەڭبەكتەرىنىڭ جەمىسى بولىپ تابىلاتىن بۇل تۋىندىنى ەلورداعا جامبىل وبلىسى تارتۋ ەتكەن بولاتىن. قولامەن كەسكىندەلگەن الىپ ەسكەرتكىش 2008 جىلدىڭ ماۋسىم ايىنىڭ 6 جۇلدىزىندا قويىلدى. اينالاسىن سايالى باق, گۇلزارلار كومكەرگەن باتىر ەسكەرتكىشى بۇگىنگى باۋىرجاندار ەلىن, جەرىن ءسۇيۋدىڭ ۇلاعاتىن ۇعار ونەگە ورتالىعىنا اينالعان. ب.مومىشۇلىنىڭ ەسكەرتكىشى جانىندا جاستاردىڭ وتانعا دەگەن پاتريوتتىق سەزىمىن ارتتىرۋعا باعىتتالعان شارالار كوپتەپ ۇيىمداستىرىلادى. وسىنداي اسقارلى دا ايبىندى تۇلعالار تۋرالى ءبىلىپ ءوسۋ وسكەلەڭ ۇرپاق بولاشاعى ءۇشىن اسا قاجەت.
ول – ۇلى تۇلعا, ايبىندى جاۋىنگەر, فيلوسوف-ينتەرناتسيوناليست جازۋشى. ەكىنشى شەشۋشى دۇنيە جۇزىلىك سوعىستىڭ باتىرىنىڭ ەسكەرتكىشىنەن حالىق كوپتەگەن ۇرپاقتىڭ ايبىندى باتىرلارىنىڭ بەينەسىن كورەدى.
ەسكەرتكىشتىڭ ءتۇر-ءتۇرى بار دەسەك, سونىڭ ىشىندە حالىق ءۇشىن قاسىق قانى مەن اششى تەرىن اياماعان اتا-بابالارىمىز بەن اعا ۇرپاققا ورناتىلعان ەسكەرتكىشتەردىڭ ورنى ءبىر بولەك. ونداي ەسكەرتكىشتەردىڭ حالىق ءجيى باراتىن ورىنداردا ورنىققانى ابزال. ولاي بولسا, شەتەلدىكتەر ءجيى كەلەتىن, ءتىپتى تۇراقتى جۇمىس ىستەيتىن استانامىزدا قازاق حاندارى مەن باتىرلارىنا, اقىندارى مەن جازۋشىلارىنا, قوعام قايراتكەرلەرىنە ورناتىلعان ەسكەرتكىشتەردىڭ قازاق تاريحى مەن شەجىرەسىن ناسيحاتتاۋدا ماڭىزى زور.
گۇلجاميلا زايىروۆا
