بۇگىن «استانا وپەرا» وپەرا جانە بالەت تەاترىنىڭ ساحناسىندا كسرو جانە قازاقستان رەسپۋبليكاسىنىڭ حالىق ءارتىسى, سوتسياليستىك ەڭبەك ەرى, قازاقتىڭ بۇلبۇلى اتانعان بيبىگۇل تولەگەنوۆانىڭ 85 جىلدىق مەرەيتويىنا ارنالعان «ءسۇيۋ, ۇمىتتەنۋ جانە سەنۋ» اتتى گالا-كونتسەرتى وتەدى.
باعدارلاماعا قازاقستاندىق جانە شەتەلدىك كومپوزيتورلاردىڭ وپەرالارىنان اريالار, حالىق اندەرى, رومانستار جانە ت.ب. شىعارمالار ەنگەن. سونداي-اق, كورەرمەندەر الدىندا «استانا وپەرا» حورى جانە سيمفونيالىق وركەسترىنىڭ قاتىسۋىمەن مەرەيتوي يەسىنىڭ قۇرمەتىنە بەلگىلى قازاقستاندىق وپەرا انشىلەرى, شاكىرتتەرى, ونىڭ ءداستۇرىن جالعاستىرۋشىلار, بيبىگۇل تولەگەنوۆا كونكۋرسىنىڭ لاۋرەاتتارى جانە باسقالارى ءان شىرقايدى.
كورمە ۇيىمداستىرىلىپ, وندا ب.تولەگەنوۆانىڭ قويىلىمدارعا جانە كونتسەرتتەرگە كيگەن كوستيۋمدەرى, جەكە زاتتارى مەن ءار جىلدارى العان ماراپاتتارى قويىلادى. سونىمەن قاتار, ءانشىنىڭ ومىرىنە جانە شىعارماشىلىعىنا ارنالعان فوتوگالەرەيانى دا تاماشالاۋعا بولادى.
ءارتىس بۇگىندە قاتارلاس قازاق وپەرا انشىلەرىنەن جالعىز قالعانىن ايتىپ: «بيىل – مەرەيتويىم, سول سەبەپتى حالقىما ەسەپ بەرگىم كەلدى. قازىرگىلەر ونى «بەنەفيس» دەيدى ەكەن. سونى وسى «استانا وپەرا» ساحناسىندا وتكىزبەكشىمىن. مۇنداعى سوليستەردىڭ تەڭ جارتىسى – مەنىڭ كونكۋرسىمنىڭ لاۋرەاتتارى. ولاردىڭ قاتارىندا سۇندەت بايعوجين, ءالفيا كارىموۆا, مەدەت شوتاباەۆ, تالعات مۇساباەۆ, تاعى باسقالاردى اتار ەدىم. بۇل گالا-كونتسەرت بارىنەن بۇرىن مەنىڭ داۋىسىمدى ەستىگىسى كەلەتىن تىڭداۋشىلارىما ارنالادى» دەدى ءانشى تەبىرەنىپ.
جۇما عازيەۆ
