بىلگىڭىز كەلسە…
«نان ۇرسىن» دەپ انت ءىشۋ دۇرىس پا؟..
اسسالاۋماعالەيكۋم! ءبىز ءوز ارامىزدا «نان ۇرسىن» دەپ انت ءىشىپ جاتامىز. بۇلاي انت ەتۋ دۇرىس پا؟ انتىمىزدى بۇزساق نە ىستەۋ كەرەك؟ جالپى, شاريعاتتاعى انت بەرۋ ماسەلەسى جايىندا ماعلۇمات بەرە كەتسەڭىزدەر
ءلاززات
ۋاعالەيكۋمۋسسالام! ءلاززات حانىم, «نان ۇرسىن» دەپ نەمەسە اللادان باسقا نارسەلەردى ايتىپ انت ءىشۋ – شاريعاتتا دۇرىس ەمەس. ويتكەنى, پايعامبارىمىز انتتىڭ بۇل تۇرىنەن قايتارعان (بۋحاري – 6108). سوندىقتان نان اتىمەن انت ەتۋ – انت بولىپ ەسەپتەلمەيدى. شاريعاتتا اللا اتىمەن نەمەسە ونىڭ ەسىمدەرىمەن عانا انت ەتىلەدى. انت اللانىڭ اتىن اۋىزعا الماي-اق, «انت ەتەمىن», «سەرت ەتەمىن», «قاسام ىشەمىن» دەگەن سوزدەرىمەن دە انت بولىپ ەسەپتەلەدى.
ەگەر مۇسىلمان بەرگەن انتىن بۇزاتىن بولسا, وندا وعان كافاراتىن وتەۋى كەرەك («ءمايدا» سۇرەسى, 89-ايات. «ءناھل» سۇرەسى, 91-ايات). «كاففارات» دەگەنىمىز – انتىن بۇزعان ادامنىڭ اللا الدىندا كۇناسىن جۋىپ-شايۋى. ول بولاشاقتاعى ىسكە انت بەرىپ, ونى ورىنداي الماي قالعان جاعدايدا عانا وتەلەدى.
كاففارات جۇرمەيتىن دە انتتىڭ تۇرلەرى بار. ماسەلەن, ەگەر ءوتكەن ىسىنە بايلانىستى وتىرىك ايتىپ, انت ءىشسە, ول ادامعا كاففارات جۇرمەيدى. ياعني, ول كۇناسىن بۇل دۇنيەدە جۋىپ-شايۋ مۇمكىندىگىنەن قاعىلىپ, تىكەلەي اللانىڭ الدىنا بارعاندا جاۋاپ بەرەدى ء(ال عانيمي, ءلۇباب – 4/3-8 بەت. ءال ماۋسۋلي, يحتيار – 3/394 بەت. ۋ.زۋحايلي, ءۋاجيز – 1/502 بەت).
انتتىڭ كاففاراتى ون مىسكىندى تاماقتاندىرۋ نەمەسە كيىندىرۋ ياكي ءبىر قۇل ازات ەتۋ. بۇل – اۋقاتتى ادامداردىڭ كاففاراتى. ال بۇعان شاماسى كەلمەيتىن, جاعدايى تومەن كىسىلەر ءۇش كۇن قاتارىنان ورازا ۇستاۋى ءتيىس (باقارا سۇرەسى, 225-ايات).
جۇلدىزناماعا سەنۋگە بولا ما؟
اسسالاۋماعالەيكۋم! راديو, تەلەديدار, گازەت-جۋرنالداردا كۇن سايىن جۇلدىز-جورامال بەرىلىپ جاتادى. سول جورامالدارعا قاراپ, كۇندەلىكتى تىرشىلىگىمىزدى ىڭعايلاۋعا بولا ما؟
امانجول
ۋاعالەيكۋماسسالام! امانجول, يسلام ءدىنى كەلمەي تۇرىپ ارابتار سوعىسۋ, جولعا شىعۋ, ۇيلەنۋ, ساۋدامەن اينالىسۋ سياقتى ىستەرگە بەل بۋماس بۇرىن, الدا نە كۇتىپ تۇر ەكەن دەپ وقتارمەن, ياكي تاستارمەن بال اشاتىن. وقتاردىڭ نەمەسە تاستاردىڭ كەيبىرىنە «قۇداي وڭدايدى» دەپ, ال كەيبىرىنە «قۇداي قۇپتامايدى» دەگەندى جازادى.
كەيىن اراسىنان بىرەۋىن سۋىرعاندا قانداي جازۋ شىقسا, سوعان قاراي ارەكەت جاسايتىن بولعان (تاباري ءتافسىرى – 8/72-77 بەت كاير – ەگيپەت). يسلام ءدىنى كەل-
گەننەن كەيىن: «وقپەن بال اشۋعا بولمايدى. ول – كۇنا» (مايدا سۇرەسى – 3-ايات) دەپ, قۇران اياتى اتالمىش ارەكەتتىڭ «ۇلكەن كۇنا» ەكەنىن ەسكەرتىپ, ودان قايتاردى. ال ءسىز ايتقان جۇل-دىزناماعا سەنىپ, سوعان قاراي كۇندەلىكتى تىرشىلىگىن رەتتەۋ دە اياتتىڭ اياسىنا كىرەتىندىكتەن, جورامالعا سەنۋگە تىيىم سالىنادى ء(ال ماۋسۋعاتۋل فيقھيا – 35/172 بەت).