استانادان سۋ تاسقىنىنان زارداپ شەككەن وڭىرلەرگە 1 مىڭ تونناعا جۋىق گۋمانيتارلىق كومەك جىبەرىلدى, دەپ حابارلايدى astana-akshamy.kz
«AMANAT» پارتياسى استانا قالالىق فيليالىنان باتىس قازاقستان وبلىسىنا 20 توننادان استام كەزەكتى گۋمانيتارلىق كومەك جونەلتىلدى.
«تابيعي اپاتتان زارداپ شەككەن ازاماتتارعا «AMANAT» پارتياسىنىڭ ءار وبلىستاعى فيليالى ءوزىنىڭ شاما شارقىنشا كومەكتەسىپ جاتىر. ءماجىلىس دەپۋتتارى, پارتيانىڭ بەلدى ازاماتتارى, «جاستار رۋحى» جاستار قاناتىنىڭ قىز-جىگىتتەرى ەل اراسىندا ءجۇر. ارقايسىسى ءوز دەڭگەيىندە ءتيىستى شارالاردى قابىلداپ, ازاماتتاردىڭ يىعىنا تۇسكەن اۋىرپالىقتى قاتار ەڭسەرىپ كەلەدى», – دەيدى «AMANAT» پارتياسى استانا قالالىق فيليالىنىڭ اتقارۋشى حاتشىسى مۇحاممەد بولىسبەك.
جۇك كولىگىنە تۇرمىستىق جانە گيگيەنالىق زاتتار, موتورلى قايىق, قاپ, كۇرەك, سۋ, ەتىك جانە تاعى باسقا قاجەت زاتتار تيەلدى.
گۋمانيتارلىق كومەك جيناۋ جالعاسىپ جاتىر. بۇعان دەيىن پارتيانىڭ ەلوردالىق فيليالى قالا اكىمدىگىمەن, ءماسليحات دەپۋتاتتارىمەن, باستاۋىش پارتيا ۇيىمدارىمەن, شاعىن, ورتا جانە ءىرى كاسىپ وكىلدەرىمەن بىرلەسىپ قوستاناي, باتىس قازاقستان, اقتوبە وبلىستارىنا گۋمانيتارلىق كومەك جىبەرگەنىن ەستەرىڭىزگە سالا كەتەيىك.
سونىمەن قاتار, ەلوردالىق قازاقستان حالقى اسسامبلەياسى دوستىق ءۇيىنىڭ بازاسىندا سۋ تاسقىنىنان زارداپ شەككەن وڭىرلەردىڭ تۇرعىندارى ءۇشىن گۋمانيتارلىق كومەك جيناۋ بويىنشا الەۋمەتتىك اكتسيا ۇيىمداستىردى. كومەك اقمولا جانە قاراعاندى وبلىستارىنىڭ تۇرعىندارىنا جەتكىزىلدى. زارداپ شەككەندەرگە كيىم, تاماق, گيگيەنا قۇرالدارى, توسەك-ورىن, ىدىس-اياق جانە ءدارى-دارمەكتەر جينالدى.
ەستەرىڭىزگە سالا كەتەيىك, ەلوردادا گۋمانيتارلىق كومەكتى قابىلدايتىن 9 پۋنكت جۇمىس ىستەيدى, جيىنعا 30-عا جۋىق ەرىكتىلەر ۇيىمى قاتىسادى.
كۇن سايىن 200-دەن استام ەرىكتى قاجەتتى زاتتاردى سۇرىپتاپ جىبەرەدى. جينالعان كومەكتىڭ ىشىندە كيىم, ازىق-تۇلىك, گيگيەنا قۇرالدارى مەن اياق كيىم باستى ورىن الادى.
ەرىكتىلەر قارجىلىق كومەكتى قابىلدامايدى. نيەت بىلدىرۋشىلەر جيناۋ ورىندارىنا قاجەتتى زاتتاردى جيناپ, اكەلە الادى.
