كوپشىلىك شەت ءتىلىن وقۋدى قولعا العاننان باستاپ, اعىلشىنشا ءتىلى شىققان وقىتۋشىلاردى ىزدەي باستايدى. ولاردى ءوزىمىزدىڭ كاسىبي مۇعالىمدەردەن ارتىق كورەدى. الايدا بۇل فاكتور ءتىلدى جاقسى مەڭگەرىپ شىعۋعا كەپىلدىك بەرمەيدى.
جاقىندا وزىمە ساباق بەرەتىن اعىلشىن ءتىلى مۇعالىمى باسىنان وتكەن جايتپەن ءبولىستى. ءارى ۇستاز, ءارى ءبىلىم بەرۋ ورتالىعىنىڭ ديرەكتورى اسەل اينالاسىن بىلىكتى ماماندارمەن تولىقتىرۋعا مۇددەلى. ول ءۇشىن ورتالىققا كەلەتىن ۇستازدارمەن ءاردايىم سۇحبات جۇرگىزىپ, ولاردىڭ ءبىلىم بەرۋ دەڭگەيىن, ۇستازدىق تاجىريبەسىن انىقتايتىن سۇراقتار قويادى ەكەن. بىردە نيگەريا مەملەكەتىنىڭ ازاماتى كەلىپ, جۇمىسقا ورنالاسۋعا نيەت ءبىلدىرىپتى. «قاي جەردە تۋىپ-ءوستىڭىز؟», «ءتىلدى ەركىن مەڭگەرگەنىڭىز جونىندە كۋالىك بار ما؟», «كاسىبي بىلىكتىلىگىڭىزدى راستايتىن سەرتيفيكاتتى كورسەتە الاسىز با؟» دەگەن سۇراقتاردان كەيىن الگى ۇستاز نامىستانىپ, «مەنى الالادىڭ» دەپ رەنجىپ قالعان كورىنەدى. ال نيگەريادا اعىلشىننان باسقا يورۋبا, حاۋسا, يگبو سىندى تىلدەر قاتار جۇرەدى. دەمەك ازاماتتىڭ انا ءتىلى قاي ءتىل ەكەنىن انىقتاۋ قيىنعا سوعاتىنى, ءتىلدى بىلسە, كەرەمەت وقىتۋشى ەكەندىگىنە كوز جەتكىزۋ كەرەكتىگى ايتپاسا دا تۇسىنىكتى.
وقۋشىلاردىڭ جاڭىلاتىن تۇسى دا وسى. شەت تىلىندە سويلەپ وسكەن ازاماتتارمەن اڭگىمەلەسۋ ءتىلدى دامىتۋعا سەپتىگىن تيگىزەتىنى انىق. الايدا اكادەميالىق وقۋعا اتتاناتىن بولساڭىز, مۇعالىمنىڭ بىلىكتىلىگىنە كوڭىل اۋدارعانىڭىز ءجون. الەمدە IELTS, TOEFL-دان باسقا, مۇعالىمدەر ارنايى CELTA جانە DELTA سەرتيفيكاتتارىن الۋعا تەر توگەدى. ماسەلەن, CELTA-دان سۇرىنبەي وتسەڭىز, مەكتەپتە اعىلشىن تىلىنەن ساباق بەرۋگە بولادى. ال ودان جوعارى لاۋازىمعا ۇمىتتەنسەڭىز, DELTA-نى الۋعا تالپىنۋىڭىز كەرەك.
ءتىلدى مەڭگەرۋدىڭ ءتۇرلى ءتاسىلدەرى بار. اركىم ءوز تاڭداۋىن جاسايدى. ءبىز تەك ەلىمىزدىڭ ازاماتتارى اراسىندا قالىپتاسىپ قالعان پىكىرگە ماماننىڭ ويىن قوستىق.
