ەلى ءبىردىڭ – تىلەگى ءبىر

ەلوردادا 18 قازان – رۋحاني كەلىسىم كۇنىنە وراي ءداستۇرلى جيىن ءوتتى. جيىنعا حالىقارالىق كونفەرەنتسيا جۇمىسىنا وتاندىق جانە شەتەلدىك ساراپشىلار قاتىستى. قوعامدى ۇلتى مەن دىنىنە قاراماستان بىرىكتىرۋگە, تۇراقتىلىق پەن كەلىسىمدى ساقتاۋعا جانە ودان ءارى دامىتۋعا باعىتتالعان شارا قاتىسۋشىلارى ۇتىمدى پىكىرلەرى مەن ورامدى ويلارىن ورتاعا سالدى.
وسىدان 29 جىل بۇرىن ءدال وسى كۇنى قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ باستاماسىمەن الماتىدا وتكەن ءبىرىنشى بۇكىلالەمدىك رۋحاني كەلىسىم كونگرەسىندە قاتىسۋشىلار 18 قازاندى رۋحاني كەلىسىم كۇنى دەپ جاريالاۋعا شاقىرعان مانيفەست قابىلداعان ەدى. اتاۋلى كۇن قارساڭىندا وتەتىن بۇل جيىن داستۇرگە اينالىپ ۇلگەرگەن. بۇل جولعى كونفەرەنتسيا «قازىرگى زاماننىڭ سىن-قاتەرلەرى جاعدايىندا كونفەسسياارالىق جانە ۇلتارالىق كەلىسىمدى نىعايتۋ» تاقىرىبىندا ءوتتى.

شارانى نۇر-سۇلتان قالاسىنىڭ اكىمدىگى, كونفەسسياارالىق جانە وركەنيەتارالىق ديالوگتى دامىتۋ جونىندەگى ن.نازارباەۆ ورتالىعى جانە نۇر-سۇلتان قالاسى ءدىن ىستەرى جونىندەگى باسقارماسى, دىندەردى زەرتتەۋ ورتالىعى ۇيىمداستىردى. كونفەرەنتسياعا پارلامەنت ءماجىلىسى دەپۋتاتتارى, قازاقستان حالقى اسسامبلەياسى, ورتالىق مەملەكەتتىك ورگاندار وكىلدەرىمەن قاتار, رەسەي, اقش, پاكىستان, ينديا, ليۆان, قىرعىستان, سونداي-اق وزگە دە ەلدەردەن بەلگىلى مەملەكەت جانە قوعام قايراتكەرلەرى, ءدىني بىرلەستىكتەر, ازاماتتىق قوعام ينستيتۋتتارى مەن عىلىمي قوعامداستىق وكىلدەرى جانە حالىقارالىق ساراپشىلار قاتىستى.
كونفەرەنتسيادا العاشقى بولىپ ەلوردا اكىمىنىڭ ورىنباسارى اسحات ورالوۆ ءسوز الدى. ول قاتىسۋشىلاردى ەرەكشە ىقىلاسپەن قارسى الىپ, ءداستۇرلى شارانىڭ ۇلتارالىق جانە دىنارالىق كەلىسىمنىڭ وزەكتى ماسەلەلەرىن تالقىلاۋعا مۇمكىندىك بەرەتىن بىرەگەي الاڭ ەكەنىن باسا ايتتى.
«ءبىز قالا اكىمدىگىندە ەلىمىزدەگى ايتۋلى داتالاردىڭ ءبىرى – رۋحاني كەلىسىم كۇنىنە وراي جينالىپ وتىرمىز. ازاماتتارىمىز­دىڭ ءدىني سەنىم ەركىندىگى مەن بوستاندىعى قازاقستان رەسپۋبليكاسىنىڭ كونستيتۋتسياسىمەن بەكىتىلگەن. دىنارالىق كەلىسىم – قوعام ومىرىندەگى ماڭىزدى جەتىستىكتەردىڭ ءبىرى جانە بىرەگەيى. بۇل كۇن بۇگىندە وتە ۇلكەن ماڭىزعا يە. ەلباسىنىڭ باستاماسىن جالعاستىرىپ, بۇگىنگە دەيىن اتاپ وتىلەدى, بۇكىلالەمدىك جيىندار وتكىزىلۋدە. دۇنيە ءجۇزى ەلدەرى قازاقستاندا رۋحاني كەلىسىم كۇنىنىڭ بارىنا اسا قىزىعۋشىلىق تانىتادى» دەدى قالا اكىمىنىڭ ورىنباسارى.
ەلدەگى رۋحاني كەلىسىم كۇنىنىڭ باستاۋىندا بولىپ, وسى قۇندىلىقتاردىڭ قازاق قوعامىندا ماڭىزدى ورىن الۋىنا ەڭبەك سىڭىرگەن تولەگەن مۇحامەدجانوۆ اتاۋلى كۇننىڭ تاريحىنا توقتالىپ, رۋحاني مادەنيەت يدەيا­سىنىڭ بۇگىننىڭ بەلگىسىنە اينالعانىن العا تارتتى. «بەيبىتشىلىككە مادەنيەت ارقىلى» حالىقارالىق قاۋىمداستىعىنىڭ پرەزيدەنتى, قازاقستان رەسپۋبليكاسىنىڭ ەڭبەك سىڭىرگەن قايراتكەرى, كومپوزيتور, قوعام قايراتكەرى ءوز سوزىندە رۋحاني كەلىسىمنىڭ ەلدەگى احۋالعا اسەرىن دە اتاپ ءوتتى.
«بۇگىن الەمدە بولىپ جاتقان شيەلەنىستەر مەن وقيعالار وركەنيەتتەر داعدارىسىنا, الىپتار اراسىنداعى داۋعا ۇلاسىپ جاتىر. وسى رەتتە ءبىزدىڭ قوعامداعى بيىك رۋحاني قۇندىلىق ەلىمىزدىڭ ودان ءارى تۇراقتى وركەندەۋىنە, قازاقستان تۇرعىندارىنىڭ بەيبىت ءومىر ءسۇرىپ, جان-جاقتى دامۋىنا, حالىق يگىلىگىنە ەڭبەك ەتۋىنە مۇمكىندىك بەرىپ وتىر. بۇل ءداستۇردى ساقتاپ قالۋ – ءبىزدىڭ باستى پارىزىمىز. ءويت­كەنى بىزگە قاراپ بوي تۇزەيتىن مەملەكەتتەر كوپ» دەدى ت.مۇحامەدجانوۆ.
بۇگىنگى تاڭدا قازاقستاندا 40 ءتۇرلى كونفەسسيا مەن 130-عا جۋىق ەتنوس وكىلدەرى تۇرادى. ەلىمىزدە 3200-گە جۋىق ءدىني عيماراتتار, 4000-عا جۋىق ءدىني بىرلەستىكتەر جۇمىس ىستەيدى. جيىندا ءسوز العان باسقا دا قاتىسۋشىلار مەملەكەتتىك-كونفەسسيالىق جانە كونفەسسياارالىق قاتىناستار سالاسىنداعى وزەكتى ماسەلەلەردى, جالپىۇلتتىق يدەيا نەگىزىندە قازاقستاندىق بىرەگەيلىكتى نىعايتۋ مىندەتتەرىن, سونداي-اق ەلىمىزدە جانە الەمدە دىنارالىق ديالوگ پەن ءوزارا تۇسىنىستىكتى ىلگەرىلەتۋدەگى ازاماتتىق قوعام ءرولىن تالقىلادى.