الداعى جىلدىڭ 15 اقپان كۇنى كەڭەس اسكەرىنىڭ اۋعانستاننان شىققانىنا 30 جىل بولادى. وسىعان وراي قازاقستان رەسپۋبليكاسىنىڭ ۇكىمەتى اۋعانستان سوعىسىنا قاتىسقان جاۋىنگەر-ينتەرناتسيوناليستەرگە ءتيىستى قۇرمەت كورسەتۋدى, ايتۋلى كۇندى اتاپ ءوتۋ جونىندە شەشىم قابىلدادى.
اۋعانستان سوعىسىندا قازا تاپقان قازاقستاندىق جاۋىنگەرلەرگە تاعزىم ەتۋ جانە بۇگىندە بەيبىت ومىردە جۇرگەن ارداگەر ازاماتتارعا قۇرمەت ءبىلدىرۋ ءىسىن ۇيلەستىرۋ پارلامەنت دەپۋتاتى, جاۋىنگەر-ينتەرناتسيوناليست باقىتبەك سماعۇل جەتەكشىلىك ەتەتىن اۋعانستان سوعىسى ارداگەرلەرى ۇيىمدارىنىڭ «قازاقستان ارداگەرلەرى» قاۋىمداستىعىنا جۇكتەلدى. بۇگىنگى تاڭدا رەسپۋبليكا بويىنشا ءتۇرلى پاتريوتتىق شارالار باستالىپ كەتتى.
استانا قالاسىنىڭ «اۋعانستان سوعىسى مۇگەدەكتەرى مەن ارداگەرلەرى وداعى» قوعامدىق ءبىرلەستىگى ەلوردا مەكتەپتەرىندە «ەرلىك ساباعى» اكتسياسىن باستادى. ماسەلەن, قالاداعى №1, №7 جانە №15 مەكتەپتەردە وقۋشىلارمەن كەزدەسۋلەر ۇيىمداستىرىلدى. بۇل مەكتەپتەردە وقىپ, اسكەرگە اتتانعان, كەيىننەن اۋعانستان سوعىسىندا بولىپ, قازا تاپقان ءادىل داۋلەتباەۆ, الەكساندر حالياۆكا, ۆلاديمير كيم, ۆاسيلي نەستەروۆ, اناتولي كايۋكين, فانۋس اديلوۆ, الەكساندر شانتس سىندى جاۋىنگەرلەرگە ەستەلىك تاقتالارى ورناتىلعان. الداعى ۋاقىتتا باسقا مەكتەپتەردە دە وسىنداي شارالار جالعاسپاق.
– اۋعانستان سوعىسىنا قاتىسقان 17 استانالىق جاۋىنگەر ەرلىكپەن قازا تاپقان بولاتىن. وسى ازاماتتاردىڭ وتباسىلارىنا قولداۋ كورسەتۋ جانە سول مايدانگەر دوستاردىڭ ەسىمىن ەسكە الۋعا ارنالعان شارالار ۇيىمداستىرۋ – ءبىزدىڭ ۇيىمنىڭ باسىمدى ماقساتتارىنىڭ ءبىرى. سوندىقتان وسى باعىتتا اسكەري-پاتريوتتىق جۇمىستاردى باستاپ كەتتىك. سونىمەن قاتار قازا بولعانداردىڭ اتا-انالارىنا كومەك كورسەتۋ جوسپارلانىپ وتىر, – دەيدى استانا قالاسىنىڭ «اۋعانستان سوعىسى مۇگەدەكتەرى مەن ارداگەرلەرى وداعى» قب توراعاسى سەرىك كەنجەبەكوۆ.
