ۇلتتىق اكادەميالىق كىتاپحانادا «ادىلبەك ءابايدىلدانوۆ شىعارمالارى» اتتى كولەمدى كىتاپتىڭ تۇساۋكەسەرى ءوتتى. مۇندا نەبارى ەلۋ ەكى جاسىندا ومىردەن وزعان كورنەكتى اقىننىڭ ءار جىلدارى جارىق كورگەن «اق قايىڭ», «سالتانات», «قىران», «الىس كوكجيەك», «مارجان» اتتى كىتاپتارىنان تاڭداپ الىنعان ولەڭدەرى مەن پوەمالارى توپتاستىرىلعان.
قازاقستان جازۋشىلار وداعىنىڭ استانا قالالىق فيليالى ۇيىمداستىرعان شاراعا ەلوردالىق قوعام قايراتكەرلەرى, قالامگەرلەر جانە ستۋدەنت جاستار قاتىستى.
جيىندا حالىقارالىق «الاش» ادەبي سىيلىعىنىڭ يەگەرى, اقىن سەرىك تۇرعىنبەكۇلى بايانداما جاساپ, ادىلبەك ءابايدىلدانوۆتىڭ جان الەمىن, سۋرەتكەرلىك قىرىن اڭگىمەلەپ, اقىندىق قۋاتىن اشاتىن ولەڭدەرىن جان-جاقتى تالدادى. جازۋشى, عالىمدار قويشىعارا سالعاراۇلى مەن سۇلتان ورازالينوۆ, قۋانىش جيەنباي, رەجيسسەر ساۋلەبەك اسىلحانوۆ, اۋدارماشى ماتكەرىم اكىمجانوۆ سىندى كەش قوناقتارى اقىننىڭ ءومىرى مەن شىعارماشىلىعى جايىندا ەستەلىكتەر ايتتى. ولار اقىننىڭ قىران تەكتى بولمىسىن, كەربەز تۇلعاسىن اڭگىمەلەرىنە ارقاۋ ەتتى. «ادىلبەك ءابايدىلدانوۆ وتكەن عاسىرداعى قازاقتىڭ ازات ويلى, عاجاپ سۋرەتكەر اقىندارىنىڭ الدىڭعى شەبىندە تۇرادى» دەستى.
سالتاناتتى ءراسىمدى قازاقستان جازۋشىلار وداعى استانا فيليالىنىڭ توراعاسى, اقىن نەسىپبەك ايتۇلى قورىتىندىلادى.
اۋىت مۇقيبەك
