ايماقتاردىڭ استاناداعى جارمەڭكەسىن وسى دەمالىستا پاۆلودار وبلىسى جالعاستىردى. ەلوردالىقتار ەكى كۇن ىشىندە ەرتىس وڭىرىنەن اكەلىنگەن 645 توننا ازىق-تۇلىكتى ساتىپ الدى. ساۋداعا تۇسكەن ءونىمنىڭ جالپى قۇنى 100 ملن تەڭگەدەن استى. كەرەكۋلىكتەردىڭ ازىق-تۇلىك جارمەڭكەسىن ايماق باسشىسى ەرلان ارىننىڭ جول باستاۋىمەن استانا قالاسىنىڭ اكىمى يمانعالي تاسماعامبەتوۆ ارالاپ كوردى.
بۇل جارمەڭكەنىڭ ماقساتى بارشاعا بەلگىلى. ول – ارزان باعا ساياساتىمەن باس قالانىڭ ىشكى نارىعىن اۋىلشارۋاشىلىق ونىمدەرىمەن قامتاماسىز ەتىپ, استانالىق الەۋمەتتىڭ الەۋەتىنە بولىسۋ. وبلىسقا قاراستى ون اۋدان مەن ءۇش قالانىڭ كاسىپكەرلەرى ءوز ونىمدەرىن بىزدەگى باعادان 15-20 پايىزعا ارزانعا ساتتى. سوندىقتان بولار ەرتەلەتىپ ورتالىق الاڭعا جينالعان جۇرتتىڭ قاراسى كوپ بولدى. سونىڭ ناتيجەسىندە 40 توننادان استام, ەت, 24 توننا ءسۇت, 6 توننا ۇن ونىمدەرى مەن 12 توننا بالىق, 250 توننا كارتوپ جانە باسقا دا ونىمدەر ءاپ-ساتتە تۇتىنۋشىلارىن تاپتى. 115 مىڭ جۇمىرتقا مەن وبلىس جەرىندە وسىرىلگەن 60 توننا قىرىققابات پەن 50 توننا ءسابىزدى تيەپ كەلگەن جۇك كولىكتەرى دە اۋىلدارىنا بوس قايتتى.
پاۆلودار وبلىسىنىڭ اكىمدىگى بۇدان بولەك, جارمەڭكەگە كەلۋشىلەرگە ارناپ داستارحان جايدى. ەكى بىردەي ءۇيدى تىگىپ, وعان باس سۇققاندارعا باۋىرساق پەن قىمىزدان ءدام تاتىردى. الاڭعا كەلگەندەر ارنايى ورناتىلعان ەكرانداردان وبلىستىڭ جەتىستىكتەرىن پاش ەتكەن ءفيلمدى كورىپ, ايماقتان ات ارىتىپ كەلگەن مادەنيەت ۇجىمدارىنىڭ ونەرىن تاماشالادى. ايتۋلى ولكەدەن ارنايى كەلگەن 125 ونەرپاز سەگىز ساعات بويى ساحنادان تۇسپەي, ءان-جىرلارىن ايتىپ, جارمەڭكەگە مەرەكەلىك رەڭك بەردى. سونداي-اق, ويىن-ساۋىق اراسىندا سپورتتىق جارىستار دا وتكىزىلدى.
اينۇر شوشاەۆا
