ەلوردادا العاش رەت اكىمشىلىك مەملەكەتتىك لاۋازىمعا ۇمىتكەرلەردى اشىق ىرىكتەگەن قر مەملەكەتتىك قىزمەت ىستەرى اگەنتتىگىنىڭ استانا قالاسىنداعى باسقارماسى كونكۋرستىق كوميسسيانىڭ قورىتىندىسىن شىعاردى.
قر مەملەكەتتىك قىزمەت ىستەرى اگەنتتىگىنىڭ استانا قالاسى بويىنشا باسقارماسى اكىمشىلىك مەملەكەتتىك ءتورت لاۋازىمعا بايقاۋ جاريالاعان بولاتىن. كونكۋرستىق كوميسسيانىڭ الدىنا 43 ۇمىتكەردەن 68 ءوتىنىش كەلىپ تۇسكەن. تەستىلەۋ ناتيجەسىنەن كەيىن 32 ادام اڭگىمەلەسۋگە جىبەرىلگەن بولاتىن. ۇمىتكەرلەرمەن كەزەكپە-كەزەك اڭگىمەلەسىپ, ولاردىڭ ەلىمىزدەگى زاڭنامالىق قۇجاتتاردى ءبىلۋ دەڭگەيىن, قارىم-قابىلەتىن تارازىلاپ, شەشىم قابىلداعان كوميسسيا باسقارمانىڭ ينسپەكتسيا جانە مەملەكەتتىك قىزمەتتەردى باعالاۋ ءبولىمىنىڭ كونسۋلتانت-ينسپەكتورى لاۋازىمىنا عالىمجان امانتايدى لايىق دەپ تانىدى. ال مەملەكەتتىك قىزمەتتى وتكەرۋ جانە پەرسونالدى باسقارۋدى باعالاۋ ءبولىمىنىڭ كونسۋلتانتتارىنا ازامات ومىرزاقوۆ پەن مارات مۇستان تاڭدالىپ الىنسا, مەملەكەتتىك قىزمەتتى وتكەرۋ جانە پەرسونالدى باسقارۋدى باعالاۋ ءبولىمىنىڭ باس مامانى لاۋازىمىن جۇلدىز بايجومارتوۆا ەنشىلەدى.
بۇدان بولەك, تاعى ءتورت ادام كادرلىق رەزەرۆكە ۇسىنىلدى. ولار: رۋسلان جانباكىروۆ, ابات ماقانوۆ, نۇرگۇل بيحانوۆا جانە اقنۇر ارىستانبەكوۆا.
كونكۋرستىق كوميسسيا مۇشەلەرى شەشىم قابىلداۋ كەزىندە قوعامدىق باقىلاۋشىلار تاراپىنان بەرىلگەن باعالار دا ەسكەرىلگەنىن ايتادى. قر مەملەكەتتىك قىزمەت ىستەرى اگەنتتىگىنىڭ استانا قالاسىنداعى باسقارماسىنىڭ باستىعى ەرلان ابەن ءوز ورتالارىنا جاڭادان قوسىلعان قىزمەتكەرلەردى ۇجىممەن تانىستىرىپ, جۇمىستارىنا ساتتىلىك تىلەدى.
قىمبات نۇرعالي
