كەشە استانا اكىمىنىڭ ورىنباسارى اسقار ءامرين مەن ەلوردالىق باسقارمالار وكىلدەرى شاھار تۇرعىندارىمەن كەزدەستى. «نۇر وتان» پارتياسى قالالىق فيليالىنىڭ عيماراتىندا وتكەن بۇل ءىس-شارا «سۇراق-جاۋاپ» فورماتىندا ۇيىمداستىرىلدى.
– كەزدەسۋدىڭ تيىمدىلىگىن ارتتىرۋ ءۇشىن ءبىز بىلتىردان باستاپ وسىنداي فورماتقا كوشتىك. ياعني سۇراق قويۋعا كەلگەن قالا تۇرعىنى ءوز ماسەلەسىنە قاتىستى باسقارما وكىلىمەن جۇزبە-ءجۇز كەزدەسە الادى. بۇگىنگى جيىنعا قۇرىلىس جانە تۇرعىن ءۇي ساياساتى, جۇمىسپەن قامتۋ, ەڭبەك جانە الەۋمەتتىك قورعاۋ, ءبىلىم, قوعامدىق دەنساۋلىق ساقتاۋ, كولىك جانە جول-كولىك ينفراقۇرىلىمىن دامىتۋ, اكتيۆتەر جانە مەملەكەتتىك ساتىپ الۋ سەكىلدى قالا تىرشىلىگىنە جاۋاپتى باسقارمالاردىڭ وكىلدەرى قاتىسۋدا, – دەيدى «نۇر وتان» پارتياسى قالالىق فيليالى توراعاسىنىڭ ءبىرىنشى ورىنباسارى باقىت ساپاروۆ.
كەزدەسۋگە كەلگەن جۇرتشىلىقتىڭ ىشىندە كوپبالالى انالار تاراپىنان سۇراقتار ءجيى قويىلدى. ماسەلەن, ءوزىن ەسەنكۇل تولەەۆا دەپ تانىستىرعان تۇرعىن 2008 جىلى ءۇي الۋ ءۇشىن كەزەككە 5383-ءىنشى بولىپ تىركەلگەنىن, سودان بەرى ون جىلدان اسا ۋاقىت وتسە دە, 1329-ىنشى ورىنعا ەندى عانا جىلجىعانىن ايتادى. بۇگىندە بەس بالاسىمەن بىرگە ايىنا 110 مىڭ تەڭگەگە پاتەر جالداپ تۇراتىن داناگۇل كاتكەنوۆا دا «تەگىن پاتەر سۇرامايمىز. جالدامالى تۇرعىن ۇيلەردى العاشقى تولەمسىز راسىمدەيتىندەي جاعداي جوق پا بىزگە؟» دەپ جانايقايىن جەتكىزدى. قازىرگى تاڭدا استانا قالاسى بويىنشا ءۇي الۋعا كەزەكتە 9320 كوپبالالى انا تۇر ەكەن.
سونداي-اق تۇرعىندار جىلجىمايتىن مۇلىكتى جەكەشەلەندىرۋ, شاعىن جانە ورتا بيزنەس, مۇگەدەكتىككە ءوتۋ سەكىلدى ماسەلەلەر بويىنشا ءوز ساۋالدارىن قويىپ, ءتيىستى ورگانداردىڭ جاۋابىن الدى.
