ەلوردانىڭ Forte Kulanshi ArtSpace گالەرەياسىندا بەلگىلى سۋرەتشى-گرافيك باتۋحان بايمەننىڭ NOMAD. BLACK & WHITE («نوماد. قارا مەن اق) اتتى كورمەسى اشىلدى. كورمەگە قىلقالام شەبەرىنىڭ 50-گە جۋىق تۋىندىسى قويىلدى.
بۇل – سۋرەتشىنىڭ ەلوردادا وسى جىلى ۇيىمداستىرىلعان ەكىنشى جەكە كورمەسى. بۇعان دەيىن تۋىندىلارى تاشكەنت, بىشكەك, كيپر, ىستانبۇل جانە بەرلين قالالارىندا كورسەتىلدى. ال بيىلعى باس قالامىزداعى ءبىرىنشى كورمەسى كوكتەمدە ءوتتى. وسى جولعى كورمە گرافيكا, سونىڭ ىشىندە لينوگراۆيۋراعا ارنالىپ وتىر. قىلقالام شەبەرىنىڭ ايتۋىنشا, اتالعان ونەر ءتۇرى ەلىمىزدە دامۋ جاعىنان كەنجە قالعان. ەكىنشى كورمەسى گرافيكانىڭ وسى ءتۇرىنىڭ مۇمكىندىكتەرىن كورسەتۋ جانە ونى كوپشىلىككە ناسيحاتتاۋ ماقساتىندا ۇيىمداستىرىلدى.
«بۇگىنگى كورمەگە 2019-2020 جىلدارى سالىنعان جاڭا جۇمىستارىم قويىلعان. شىنىن ايتۋ كەرەك, كورمەگە قويىلعان كارتينالاردىڭ ءمانى مەن سىرىن كەلۋشىلەر ءبىر قاراعاننان تۇسىنە قويمايدى. كۇنى-ءتۇنى سۋرەت سالۋمەن اينالىسامىن دەپ ايتا المايمىن. ماعان يدەيا كەز كەلگەن ۋاقىتتا كەلەدى. سەرۋەندەپ جۇرگەندە, اس ءىشىپ وتىرعاندا, كەيبىر يدەيالاردى ينتەرنەتتەن قارايمىن. ەڭ باستىسى – تىڭ يدەيا كەلگەندە ونى قاعىپ الۋ, ياعني تىڭ يدەيادان كوز جازىپ قالماۋ كەرەك. ول ساعىم سەكىلدى, دەر كەزىندە ۇستاپ قالماساڭ, ول يدەيا قايتىپ ورالمايدى» دەيدى سۋرەتشى.
ەلوردا جۇرتشىلىعى اتالعان كورمەنى «Forte Kulanshi Artspace» گالەرەياسىنان (دوستىق كوشەسى, 8/1) دۇيسەنبى-جۇما كۇندەرى ساعات 10:0018:00 ارالىعىندا 20 قاراشاعا دەيىن تەگىن تاماشالاي الادى.
