الداعى سەنبى, ياعني, مامىردىڭ 25-ءى كۇنى «كونگرەسس حولل» سارايىندا بەلگىلى كۇيشى انار مۇزداحانوۆانىڭ «اققۋ دومبىرا» دەپ اتالاتىن جەكە كونتسەرتى وتەدى.
كۇيشىنىڭ مەرەيتويىنا ارنالاتىن وسى كەشتە سوناۋ كەتبۇعا بابامىزدان باستاپ, تاتتىمبەت, قۇرمانعازى, داۋلەتكەرەي, قازانعاپ, سۇگىر, دينا, نۇرعيسا سىندى قازاق كۇي ونەرى جاۋھارلارىنىڭ ەڭ تاڭداۋلى, ەڭ تانىمال كۇيلەرى شەرتىلمەك. كونتسەرتتە قازاق حالىق اسپاپتار ءانسامبلى, «شالقىما» حالىق ءبيى ءانسامبلى, گۇلزيرا بوكەيحانوۆا, ەلميرا جاڭابەرگەنوۆا, عازيزا جۇماكەنوۆا سىندى ونەر مايتالماندارى ونەر كورسەتەدى. سونداي-اق, كەشكە اناردىڭ اكەسى, بەلگىلى كۇيشى ايتباي مۇزداحانوۆ قاتىسادى. ول كىسى بۇكىل قوستاناي ءوڭىرىن دۇرىلدەتكەن كۇيشى. اكەسىنىڭ 40 كۇيى مەن 20-دان اسا ءانى بار. ونەرلى ورتالاردا, كوپشىلىك الدىندا سول شىعارمالاردى ناسيحاتتاۋعا بەل شەشە كىرىسكەن انار كەلە-كەلە ءوزى دە كۇي شىعاراتىن بولعان. 1985 جىلى «جىگەر» فەستيۆالىنە قاتىسىپ, اكەسىنىڭ «بابالار ءۇنى» تسيكلىنان «تارحان بابا», «37-ءىنشى جىل», «بوزتايلاق» كۇيلەرىن كۇمبىرلەتكەن.
رەپەرتۋارىندا بۇگىندە 200-گە تارتا شىعارما بار انار قازاقتىڭ التاي-تارباعاتاي, ارقا, جەتىسۋ, قاراتاۋ كۇيشىلىك مەكتەپتەرىنەن دە حاباردار. داۋلەسكەر بابالاردىڭ كۇيلەرىن بابىنا كەلتىرە,وزىندىك ورنەك سالا ورىندايدى. ول فرانتسيا, انگليا, ۆەنگريا, ينديا, گەرمانيا, تۇركيا ەلدەرىندە ونەر كورسەتتى.
ەركەجان ساتىمبەك
