ومىرگە عاشىق ونەرپازدار
7 قازان كۇنى بەيبىتشىلىك جانە كەلىسىم سارايىندا «ءسات» توبىنىڭ «ومىرگە عاشىقپىن» اتتى كونتسەرتى وتەدى. كەش ساعات 19.30-دا باستالادى.
اقيىق اقىن مۇقاعالي ماقاتاەۆتىڭ ولەڭىنە جازىلعان كومپوزيتور سادىق قىناتتىڭ «كونەمىز عوي» انىمەن تۇساۋى كەسىلگەن توپتىڭ ونەرگە اياق باسقانىنا بيىل 8 جىل تولدى. سودان بەرى ءبىرنەشە بايقاۋعا قاتىسىپ, ءجۇلدەگەرلەردىڭ قاتارىنان كورىنۋدە.
«ءسات» العاشقى ءجۇلدەسىن استانادا وتكەن رەسپۋبليكالىق بايقاۋدا الدى. بۇدان سوڭ سانكت-پەتەربۋرگ قالاسىنداعى «كاستالسكي كليۋچ» حالىقارالىق بايقاۋدا ۇزدىك اتانىپ, مۇمكىندىگى شەكتەۋلى جاندارعا ارنالعان «سامعاۋ» ۇلتتىق قوعامدىق سىيلىعىنا لايىق دەپ تانىلعان.
باستاپقىدا ازات, تۇرار, ساپارباي اتتى تاعدىرلارى شىمكەنت قالاسىنداعى زاعيپتارعا ارنالعان «ءۇمىت» مەكتەپ-ينتەرناتىندا توعىسقان ۇلداردان قۇرالعان توپ قۇرامى بۇگىندە جاڭارىپ, رەپەرتۋارىن پاتريوتتىق, ماحاببات, ومىرلىك قۇندىلىقتار تۋرالى اندەرمەن تولىقتىردى. رەپەرتۋارداعى ءبىراز اندەردىڭ اۆتورى – توپ ورىنداۋشىسى ازات ادىلباەۆ.
«امانات» اۆتورلىق جانە ارالاس قۇقىقتى قورعاۋ جونىندەگى قاۋىمداستىق قولداۋىمەن وتەتىن كەش قوناقتارى بەلگىلى ەسترادا انشىلەرى مارجان اراپباەۆا جانە اسحات تارعىن.
امانعالي قالجانوۆ