استانا قالاسىنداعى ۇلتتىق كىتاپحانادا سوعىس ارداگەرى راحمەتوللا ەگىزباەۆ تۋرالى جازىلعان «مايدانگەر پارتيزان» كىتابىنىڭ تۇساۋكەسەرى ءوتتى. كىتاپ اۆتورى – تانىمال تەلەجۋرناليست, قر مادەنيەت قايراتكەرى بايان مۇحامبەتاليەۆ.
ۇلى جەڭىستىڭ 70 جىلدىعى قارساڭىندا جارىق كورىپ وتىرعان بۇل تۋىندى «دايەككە نەگىز دەرەكتەر», «ونەگە تولى ەستەلىكتەر» اتتى ەكى بولىمنەن تۇرادى.
ءبىرىنشى ءبولىمنىڭ «دايەككە نەگىز دەرەكتەر» دەپ اتالۋى كەزدەيسوق ەمەس. ويتكەنى, مايدانگەر پارتيزاننىڭ ءوزى دە, ونىمەن بىرگە جاۋ تىلىندا سوعىسقان قارۋلاستارى دا ومىردەن وزىپ, جارىق دۇنيەمەن قوش ايتىسقان. سوندىقتان قالامگەر بەلارۋس ەلىنە ارنايى بارىپ, مەملەكەتتىك ۇلتتىق مۇراعاتتاعى پارتيزان قوزعالىسى تۋرالى ماتەريالدارمەن تانىسادى. ناتيجەسىندە, راحمەتوللا ەگىزباەۆقا قاتىستى قۇجاتتارمەن قاتار, قۇرامىندا جەرلەستەرىمىز بولعان «چەكيست» بريگاداسىنىڭ ەرلىك ىستەرى دە كىتاپقا ەنەدى.
اۆتوردىڭ مۇراعات قۇجاتتارىن زەرتتەۋ قورىتىندىلارى العاشقى بولىمدەگى «سەگىز جىلعا سوزىلعان ەكى جىل», «پارتيزاندىق ءومىر سوقپاعى», «مۇراتتى كۇندەر مۇراعاتى» اتتى تاراۋلاردا بەرىلەدى.
ەكىنشى بولىمدە ارداگەر پارتيزاننىڭ 1947 جىلى تۋعان ەلگە امان-ەسەن ورالعاننان كەيىنگى بەيبىت ءومىرى سۋرەتتەلگەن.
كىتاپتاعى «اكەلەر داڭقى جولىمەن», «بەيبىت ءومىر بەينەلەرى» اتتى توپتامامەن بەرىلگەن فوتوسۋرەتتەر مەن دەرەك-دايەكتەر شىعارما مازمۇنىن اشا تۇسەدى.
تانىستىرىلىمدا ءسوز العان قازاقستان حالقى اسسامبلەياسى توراعاسىنىڭ ورىنباسارى ەرالى توعجانوۆ ءوز ويىن «ء…بىز ءبىر اۋىلدىڭ شاڭىن جۇتىپ, ءبىر وزەننىڭ سۋىن ىشتىك. راحمەتوللا اعانىڭ كوزىن كورىپ, زينا اپامىزدىڭ قولىنان تالاي ءدام تاتتىق. راحاڭ قانشا ادامنىڭ ءومىرىن قيعان قان مايداننان امان-ەسەن ورالىپ, ون بالا تاربيەلەپ ءوسىردى. وسىنىڭ ءوزى دە ەرلىك ەمەس پە؟! سوندىقتان بۇل كىتاپ – تەك ءبىزدىڭ اعامىزعا عانا ەمەس, سوعىسقا قاتىسقان بارشا مايدانگەرلەرگە ارنالعان ەسكەرتكىش. ال اتالار ەرلىگىن ەشقاشان ەستەن شىعارماي, قۇرمەت تۇتۋ – ۇرپاق پارىزى!» دەپ تۇيىندەدى.
تۇرماعانبەت كەنجەباەۆ
