قايىرىمدىلار قاتارى كوبەيدى
جۋىردا «باۋىرجان» قايىرىمدىلىق قورىنىڭ ۇيىمداستىرۋىمەن «قازاقستانداعى قايىرىمدىلىق: بيزنەس جانە قايىرىمدىلىق» اتتى ءىV حالىقارالىق عىلىمي-تاجىريبەلىك كونفەرەنتسيا بولىپ ءوتتى. وندا قايىرىمدىلىق پەن كورپوراتيۆتىك الەۋمەتتىك جاۋاپكەرشىلىك (كاج) دەگەندى ءبىز قالاي ءتۇسىنىپ ءجۇرمىز, شاعىن, ورتا نەمەسە ءىرى بيزنەس وكىلدەرىنىڭ كاج ماسەلەلەرىنە كوزقاراسى قالاي دەگەن سەكىلدى ساۋالدارعا جاۋاپ ىزدەلدى.
جيىندى «نۇر وتان» حدپ ءتوراعاسىنىڭ ءبىرىنشى ورىنباسارى باۋىرجان بايبەك پەن «التىن قىران» حالىقارالىق قايىرىمدىلىق قورىنىڭ پرەزيدەنتى يسلامبەك سالجانوۆ اشىپ بەرگەن. ودان ءارى پارلامەنت ءماجىلىسىنىڭ دەپۋتاتى ايگۇل سولوۆەۆا, «ساندج» زەرتتەۋ ورتالىعىنىڭ ديرەكتورى جانار جاندوسوۆا, ۋكراينادان كەلگەن ۇجىمدىق الەۋمەتتىك جاۋاپكەرشىلىك پەن تۇراقتى دامۋدى ستراتەگيالىق جوسپارلاۋ مامانى روستيسلاۆ كۋرينكو, «The Brookfield Group» حولدينگىنىڭ توراعاسى دجەيك حەيمان مەن يۋنيسەف ۇيىمىنىڭ وكىلدەرى قىزۋ تالقى الاڭىنا اينالدىردى.
شارا بارىسىندا «كاج كوشباسشىلارى» اتتى فوتوەكسپوزيتسيا ۇيىمداستىرىلعان. وسىنىڭ اياسىندا «باۋىرجان» قايىرىمدىلىق قورىنىڭ «قايىرىمدىلىق قورىن قالاي اشىپ, ونى قالاي تابىستى قىلۋعا بولادى؟» اتتى كىتابىنىڭ تۇساۋكەسەر ءراسىمى دە ءوتتى.
كونفەرەنتسياعا پارلامەنت ءماجىلىسىنىڭ دەپۋتاتى, حالىق قاھارمانى, گەنەرال-لەيتەنانت باقىتجان ەرتاەۆ تا كەلىپ قاتىسقان. ونىڭ بۇل كۇندە اۋعان سوعىسىنا قاتىسۋشىلار مەن قارۋلى كۇشتەردە قىزمەت ەتكەن ارداگەر ازاماتتاردىڭ قۇقىن قورعاپ, جاستاردى پاتريوتتىق رۋحقا باۋليتىن «ەر باتىر» اتتى پاتريوتتىق قور قۇرىپ, «باتىر» اتتى رەسپۋبليكالىق قوعامدىق-پاتريوتتىق جۋرنالدىڭ العاشقى ءنومىرىن جارىققا شىعارىپ ۇلگەرگەنى ءمالىم بولدى.
ەركەجان ساتىمبەك