استانا قالاسى ءماسليحاتىنىڭ ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسياسىنىڭ وتىرىسىندا ەنەرگەتيكا سالاسىنداعى ينۆەستيتسيالىق جوبالاردى ىسكە اسىرۋعا بولىنگەن بيۋدجەتتىك قاراجاتتى ءتيىمدى پايدالانۋ ماسەلەلەرى تالقىلاندى. وندا قالالىق ەنەرگەتيكا باسقارماسىنىڭ باسشىسى مىندەتىن اتقارۋشى باقتىبەك جاپاەۆ بايانداما جاساپ, اتالمىش سالانىڭ بۇگىنگى احۋالىمەن تانىستىردى.
بايانداماشىنىڭ ايتۋىنشا, ۇستىمىزدەگى جىلى ەنەرگەتيكا باسقارماسىنا 77 ملرد تەڭگە بولىنگەن. ونىڭ 48 پايىزى, ياعني 21 ملرد تەڭگە رەسپۋبليكالىق ترانسفەرتتەر مەن كەلەسى 45 پايىزى – 20 ملرد تەڭگە ۇلتتىق قوردان تۇسكەن. ال 7 پايىزى – 2,8 ملرد تەڭگە جەرگىلىكتى بيۋدجەتتەن ءبولىنىپ وتىر. بيىلعى جارتى جىلدىقتا 54 بيۋدجەتتىك ينۆەستيتسيالىق جوبا قارجىلاندىرىلىپ, 26,5 ملرد تەڭگە يگەرىلگەن.
ۇلكەن قاراجاتتىڭ ءبىر لەگى ەلوردانى ەلەكتر قۋاتىمەن جانە جىلۋمەن جابدىقتاۋدىڭ سەنىمدىلىگىن ارتتىرۋ, سونىمەن قاتار جىلۋ مەن ەلەكتر قۋاتتىلىعىنىڭ تاپشىلىعىن جويۋ ماقساتىندا جەو-1 مەن جەو-2 جاڭعىرتۋعا جانە جەو-3 قۇرىلىسىنا قۇيىلعان. جىلۋ جەلىلەرىن جەتىلدىرۋ جوبالارى بويىنشا رەسپۋبليكالىق بيۋدجەتتەن 2 ملرد تەڭگە, جەرگىلىكتى بيۋدجەتتەن 891,8 ملن تەڭگە بولىنگەن.
وسى جىلى رەسپۋبليكالىق بيۋدجەتتىڭ ەسەبىنەن 3 شاقىرىم جىلۋ ماگيسترالدارىن جاڭارتۋ كوزدەلىپ وتىر. جەرگىلىكتى بيۋدجەتتەن بولىنگەن قاراجاتتان مولداعۇلوۆا, بايتۇرسىنوۆ كوشەلەرى بويىنداعى جىلۋ تراسسالارىنىڭ قۇرىلىسى جالعاستىرىلدى. وسى جىلدا 7 بىردەي الەۋمەتتىك نىسان جەرگىلىكتى بيۋدجەت ەسەبىنەن ورتالىقتاندىرىلعان جىلۋ كوزىنە جالعانعان. بۇلار №61 ورتا مەكتەپ, №53 بالالار باقشاسى, №59 مەكتەپ-ليتسەي جانە «دانيا», «جاعالاۋ» تۇرعىن ءۇي كەشەنى مەن «ترانسفۋزيولوگيا» ورتالىعى.
بەلگىلەنگەن باعدارلامالار اياسىنا جىلۋ ماگيسترالدارى مەن ينجەنەرلىك جەلىلەر قۇرىلىسى ءجۇرىپ جاتىر. «بيزنەستىڭ جول كارتاسى – 2020» باعدارلاماسى بويىنشا 4 جوبا قاراستىرىلىپ, 96 228 مىڭ تەڭگە يگەرۋ كوزدەلۋدە. ونىڭ شەڭبەرىندە مۇستافين كوشەسىندەگى قوناق ءۇي عيماراتىن ورتالىق جىلۋ جۇيەسىنە قوسۋ, سەيدالين كوشەسىندەگى ەكى قاباتتى كەڭسە ءۇيىن جانە الاش تاس جولىنداعى جىلىجاي كەشەنىن ەلەكترمەن قامتاماسىز ەتۋ قاراستىرىلعان.
«يندۋستريالدىق پاركتەر مەن ارنايى ەكونوميكالىق ايماقتاردىڭ قۇرىلىمىن دامىتۋ» باعدارلاماسىنىڭ ينفراقۇرىلىمدارىن جەتىلدىرۋگە 10 ملن تەڭگە ءبولىنىپ, سۇزگى ستانساسىنىڭ قۇرىلىسى باستالدى.
ايگۇل ۋايسوۆا
