مەملەكەت باسشىسى قاسىم-جومارت كەمەلۇلى توقاەۆ مەملەكەتتى العا دامىتۋداعى اۋقىمدى مىندەتتەردى اشىق كورسەتىپ, قاراپايىم حالىقتىڭ جاعدايىن جەتە, تەرەڭ تۇسىنەتىنىن, الەۋمەتتىك-ەكونوميكالىق سالالاردا ورىن العان كەمشىلىكتەر مەن قيىندىقتاردى ەڭسەرۋگە بار كۇش-جىگەرىن جۇمسايتىنىن جەتكىزدى. اسىرەسە مۇمكىندىگى شەكتەۋلى جانداردىڭ جاعدايىن جاقسارتۋ پروبلەماسىن ەرەكشە اتاپ ءوتتى.
بيىل پرەزيدەنتتىڭ باستاماسىمەن سايلاۋ تىزىمىنە ايەلدەر مەن جاستار ءۇشىن 30 پايىزدىق كۆوتا تۋرالى نورما ەنگىزىلگەنى ءمالىم. ەندى ولاردىڭ قاتارىنا مۇمكىندىگى شەكتەۋلى جاندار دا قوسىلماق. وسىلايشا, ولاردىڭ بيلىك مىنبەسىندە ءوز داۋىسىن ەستىرتۋگە تولىق جاعداي جاسالادى. بۇل نورما دەپۋتاتتىق مانداتتى ءبولۋ كەزىندە دە قولدانىلادى. ساناتتاعى وكىلدەردىڭ – ايەلدەردىڭ, جاستاردىڭ, مۇگەدەك ادامداردىڭ سانى جيىنتىعى بويىنشا پارتيا العان دەپۋتاتتىق مانداتتاردىڭ جالپى سانىنىڭ كەمىندە 30 پايىزىن قۇراۋعا ءتيىس.
ينكليۋزيا قازاقستاندا ءبىلىم بەرۋ باعدارلاماسىنىڭ كومەگىمەن جۇمىلدىرۋدى, سونداي-اق جەكە ءبىلىم بەرۋ قاجەتتىلىكتەرىن قاناعاتتاندىرۋ پروتسەسىنە تارتۋدى بىلدىرەدى. سول سياقتى ارنايى جەكە ءبىلىم بەرۋدى قاناعاتتاندىرۋ, الەۋمەتتىك جاعدايمەن قامتاماسىز ەتۋ – قازىرگى كەزەڭدە ينكليۋزيۆ بۇكىل الەمدىك قاۋىمداستىقتا ءبىلىم بەرۋ جۇيەسىنىڭ دامۋىنداعى جەتەكشى ترەند بولاتىنىن ايقىنداي تۇسەدى.
«تۇران-استانا» ۋنيۆەرسيتەتىندە ەرەكشە قاجەتتىلىكتەرى بار جانە مۇگەدەكتەر ءۇشىن قاجەتتى جاعدايلار مەن كەدەرگىسىز ورتانى قۇرۋ ماسەلەسى ەرەكشە نازارعا الىنىپ وتىر. ينكليۋزيۆتى ءبىلىم بەرۋدى جۇزەگە اسىرۋ ارقىلى ۋنيۆەرسيتەتتىڭ الەۋمەتتىك جانە رۋحاني الەۋەتىن ارتتىرۋ جۇمىسى بەلسەندى تۇردە جۇرگىزىلىپ كەلەدى. اسىرەسە مۇگەدەكتەر ارباسىندا قوزعالاتىن مۇمكىندىگى شەكتەۋلى جاندار, كورۋ قابىلەتى جانە ەستۋ قابىلەتى بۇزىلعان ەرەكشە قاجەتتىلىگى بار جاستار ءۇشىن ارنايى ماتەريالدىق-تەحنيكالىق بازا, كابينەتتەر جابدىقتالىپ, ولاردىڭ ساپالى ءبىلىم الۋىنا بارلىق جاعداي جاسالىپ وتىر جانە ۇنەمى جەتىلدىرىلۋدە.
ەلىمىزدە ينكليۋزيۆتى ءبىلىم بەرۋ كەڭ الەۋمەتتىك اسپەكتىگە يە, ويتكەنى تەك جوعارى ءبىلىم عانا ەمەس, مەملەكەت, بيزنەس جانە قوعامدىق ۇيىمداردىڭ قولداۋىمەن ءبىزدىڭ قوعام دا ينكليۋزيۆتى بولۋى كەرەك.
جالپى, كەز كەلگەن دەموكراتيالىق مەملەكەتتىڭ ماڭىزدى قۇرامداس بولىگى بيلىكتىڭ زاڭ شىعارۋشى تارماعى بولىپ تابىلادى. دەپۋتاتتىق كورپۋس – ءبىزدىڭ ەلىمىزدەگى قوعامنىڭ ساياسي جۇيەسىنىڭ بەلسەندى بولىگى.
قازىرگى پارلامەنت – بۇل ەرەكشە قۇرىلىمى مەن جۇيەسى بار بيلىك ينستيتۋتى. وتكەن شاقىرىلىمداعى ءماجىلىس پەن ءماسليحات دەپۋتاتتارى اۋقىمدى رەفورمالاردى ىسكە اسىرۋعا اتسالىستى, شالعاي اۋدانداردىڭ سايلاۋشىلارىمەن كەزدەسىپ, قوعامنىڭ وزەكتى ماسەلەلەرىن شەشۋ جولىندا قوعامدىق پىكىرتالاستارعا قاتىستى.
قالالىق ءماسليحاتتىڭ دەپۋتاتى رەتىندە مەن دە 50-دەن استام ءتۇرلى ءىس-شاراعا, اتاپ ايتقاندا, سايلاۋشىلارمەن, مەكتەپكە دەيىنگى جانە مەكتەپ ۇجىمدارىمەن, وندىرىستىك ۇيىمدارمەن, استانا قالاسىنداعى ءتۇرلى الەۋمەتتىك ماڭىزى بار قايىرىمدىلىق شارالارىنا قاتىستىم.
ازاماتتار جالپىۇلتتىق رەفەرەندۋمدا كونستيتۋتسيالىق رەفورمانى قولدادى, بۇل ءماجىلىس پەن ماسليحاتتارعا كەزەكتەن تىس سايلاۋ وتكىزۋ ءۇشىن باستاما بولدى.
ساراپشىلاردىڭ پىكىرىنشە, قازىرگى سايلاۋ دەپۋتاتتىق كورپۋستى قۇرۋدىڭ ءادىل ەرەجەلەرى بويىنشا وتكىزىلەدى, سونداي-اق كانديداتتار مەن پارتيالاردىڭ سايلاۋعا دايىندالۋعا ۋاقىتى جەتكىلىكتى ەكەنى اتاپ ءوتىلدى.
ءماجىلىس پەن ءماسليحاتتاردى قالىپتاستىرۋدىڭ جاڭا مودەلى سايلاۋشىلاردىڭ مۇددەلەرىن جالپىۇلتتىق جانە وڭىرلىك دەڭگەيدە نەعۇرلىم ناقتى كورسەتۋگە مۇمكىندىك بەرەدى, دەپۋتاتتاردىڭ سايلاۋشىلار الدىنداعى جاۋاپكەرشىلىگى ارتىپ, قوعام دامۋىنىڭ ماڭىزدى ماسەلەلەرى بويىنشا پىكىرتالاستار بەلسەندى وتەتىن بولادى.
مەن ءماجىلىس دەپۋتاتتارىنىڭ 70 پايىزى پارتيالىق تىزىمدەر بويىنشا, 30 پايىزى ءبىر مانداتتى وكرۋگتەر بويىنشا سايلاناتىن, ال اۋداندار مەن وبلىستىق ماڭىزى بار قالالاردىڭ ءماسليحاتتارىنا سايلاۋ تەك ءبىر مانداتتى وكرۋگتەر بويىنشا وتكىزىلەتىن جاڭا باستامانى قولدايمىن.
ساياسي پارتيالاردى تىركەۋ ءراسىمىن جەڭىلدەتۋ دە دەموكراتيالىق پرينتسيپتەرگە سايكەس كەلەدى. قازىردىڭ وزىندە ءبىزدىڭ ەلىمىزدە بىرنەشە جاڭا ساياسي پارتيا تىركەلگەن.
سايلاۋ تۋرالى «تۇران-استانا» ۋنيۆەرسيتەتى ۇجىمىنىڭ پىكىرى مەن كوزقاراسىن بىلدىرە وتىرىپ, سايلاۋ قازاقستاندىق قوعامدى دەموكراتيالاندىرۋداعى تاريحي كەزەڭ بولىپ تابىلاتىنىن, ال جاڭا دەپۋتاتتىق كورپۋس جاڭا قازاقستاننىڭ ۇدەمەلى دامۋىنىڭ لوكوموتيۆىنە اينالاتىنىنا سەنىمدى ەكەنىن اتاپ وتكىم كەلەدى.
گۇلجامال جاپاروۆا,
«تۇران-استانا» ۋنيۆەرسيتەتىنىڭ رەكتورى
