قىزمەتشىلەر ءتارتىبى تارازىلاندى
وتكەن اپتادا قر مەملەكەتتىك قىزمەت ىستەرى اگەنتتىگىنىڭ استانا قالاسىنداعى تارتىپتىك كەڭەسىنىڭ كوشپەلى ءماجىلىسى ءوتتى. تارتىپتىك كەڭەس توراعاسى ەرلان ابەننىڭ باسشىلىعىمەن وتكەن جيىندا «سىبايلاس جەمقورلىققا قارسى كۇرەس تۋرالى», «مەملەكەتتىك قىزمەت تۋرالى» زاڭداردىڭ ورىندالۋى جانە مەملەكەتتىك قىزمەتشىلەردىڭ ار-نامىس كودەكسىنىڭ ساقتالۋى بويىنشا اتقارىلعان جۇمىستاردىڭ ەسەبى تىڭدالدى.
تارتىپتىك كەڭەستىڭ بۇل كوشپەلى ءماجىلىسى الماتى اۋدانى اكىمدىگىندە ءوتتى. الدىمەن تارتىپتىك كەڭەس حاتشىلىعىنىڭ ءبولىم جەتەكشىسى نياز ىسماعامبەتوۆ وتكەن كەڭەستىڭ بەسىنشى ماجىلىسىندە قابىلدانعان شەشىمدەردىڭ ورىندالۋى تۋرالى اقپارات بەردى.
ءتيىمدى مەملەكەتتىك باسقارۋ جۇيەسىن قالىپتاستىرۋ – بۇگىنگى كۇندە مەملەكەتتىك ساياساتتى جۇزەگە اسىرۋدىڭ باستى شارتتارىنىڭ ءبىرى. استانا قالاسى الماتى اۋدانىنىڭ اكىمى ساپار احمەتوۆ وسى ماسەلە بويىنشا ءوزى باسقاراتىن اپپارات جۇمىسىنىڭ نەگىزگى كورسەتكىشتەرىنە توقتالدى.
–بۇگىندە مەملەكەتتىك قىزمەتشىلەردى وقىتۋ وڭتايلى جۇرگىزىلىپ كەلەدى. اپپاراتتا قىرىق ءبىر قىزمەتكەردىڭ ءبىلىمى جوعارى. كاسىبي بىلىكتىلىگىن ارتتىرۋ ءۇشىن جوسپارعا سايكەس سوڭعى ءۇش جىلدىڭ ىشىندە ەلۋدەن اسا قىزمەتكەر ءبىلىمىن جەتىلدىردى. سونىمەن قاتار اكىمدىكتە اتتەستاتسيالىق, كونكۋرستىق جانە تارتىپتىك كوميسسيا جۇيەلى جۇمىس اتقارادى. 2009 جىلدان بەرى قىرىق ءتورت قىزمەتكەر سىناقتان وتكىزىلسە, وتىز جەتى مەملەكەتتىك قىزمەتكەر تارتىپتىك جاۋاپكەرشىلىككە تارتىلدى. تارتىپتىك كوميسسيا تەك جاۋاپكەرشىلىككە تارتىپ قانا قويمايدى, ءوز كەزەگىندە 100 بالدىق جۇيە بويىنشا اپپارات قىزمەتكەرلەرىنىڭ كورسەتكىشىن ءتورت جىلدا ءبىر باعالايدى, دەگەن ساپار احمەتوۆ ودان ءارى قىزمەتكەرلەردىڭ قۇرامىن تۇگەندەپ بەردى.
اۋدان اكىمدىگىنە جىل باسىنا بەرى 127 ازامات حابارلاسقان. قالا اكىمدىگىنىڭ سايتىنا كەلىپ تۇسكەن 455 ساۋالعا جاۋاپ بەرىلگەن. سوڭعى بەس ايدىڭ ىشىندە تۇرعىنداردان 1008 شاعىم تۇسسە, ماسەلەگە بايلانىستى ءتيىستى جاۋاپتار ۋاقىتىلى بەرىلىپ وتىرعان. اۋدان باسشىسىنىڭ ايتۋىنشا, اكىمدىك الداعى ۋاقىتتا دا بۇل باعىتتا بىرقاتار ناتيجەلى جۇمىس اتقارۋعا دايىن.
جيىندا جوسپارلى تەكسەرىس بويىنشا بىرقاتار باسشىلار ەسەپ بەردى. استانا قالاسى بويىنشا قارجىلىق باقىلاۋ ينسپەكتسياسى, تىلدەردى دامىتۋ باسقارماسى, استانا جانە اقمولا وبلىسى بويىنشا بايلانىس جانە اقپاراتتاندىرۋ ينسپەكتسياسىنىڭ باسشىلارى مەملەكەتتىك ورگانداردا وتكىزىلگەن تەكسەرۋ جۇمىستارى تۋرالى مالىمەت بەردى.
كۇن تارتىبىندە قارالعان ماسەلەنىڭ ءبىرى – لاۋازىمدى تۇلعالارعا قاتىستى تارتىپتىك ىستەر. استانا قالاسى بويىنشا سالىق دەپارتامەنتى ەسىل اۋدانى بويىنشا سالىق باسقارماسىنىڭ سەگىز قىزمەتكەرىنىڭ تارتىپتىك ىستەرى قارالدى. سونداي-اق, الماتى اۋدانى بويىنشا سالىق باسقارماسىنىڭ كامەرالىق باقىلاۋ ءبولىمىنىڭ جەتەكشى مامانى ا.تويكەنوۆ, استانا قالاسى سوت اكتىلەرىن ورىنداۋ دەپارتامەنتىنىڭ سوت ورىنداۋشىلارى ە.ماحيدوۆ پەن ى.جانىبەكوۆ, «اۋەجاي-استانا» كەدەن بەكەتىنىڭ باس مامانى د.ءماجيتوۆتىڭ تارتىپتىك ىستەرى كەڭەس مۇشەلەرىنە كەڭىنەن تانىستىرىلدى.
جيىن سوڭىندا باسقا دا تارتىپتىك ىستەر بويىنشا جانە تارتىپتىك كەڭەسكە تۇسكەن ۇسىنۋلار مەن قايتا قارالۋ ناتيجەلەرى تۋرالى تارتىپتىك كەڭەس حاتشىلىعىنىڭ ءبولىم مەڭگەرۋشىسى نياز ىسماعامبەتوۆ بايانداپ بەردى.
گۇلميرا ايماعانبەت