استانا قالاسىنىڭ Recommended by EXPO-2017 سەرىكتەستىك باعدارلاماسىن جۇزەگە اسىرۋ قارقىندى جۇرگىزىلىپ وتىر.
بۇگىنگى كۇنگە دەيىن تۋريستەرگە قىزمەت كورسەتۋ سالاسىندا جۇمىس جۇرگىزىپ كەلە جاتقان 150-گە جۋىق كاسىپورىن اتالمىش باعدارلاماعا قاتىسۋعا ءوتىنىم بەردى. ولاردىڭ ىشىنەن 50 كومپانيانىڭ قىزمەتى باعالاۋدان وتكەن. كوميسسيانىڭ شەشىمىنە سايكەس استانانىڭ 37 جاڭا سەرىكتەسى انىقتالدى. جاقىندا وسى كاسىپورىندارعا سەرىكتەس ستاتۋسىن تابىستاۋ سالتاناتى وتكىزىلمەك.
قالاداعى قوناق ۇيلەر, قوعامدىق تاماقتانۋ, قىزمەت كورسەتۋ سالالارىنداعى كاسىپورىندارمەن بىرگە, استانا قالاسىنىڭ Recommended by EXPO-2017 سەرىكتەس ستاتۋسى حوستەلدەرگە, كولىك كومپانيالارىنا جانە جولاۋشىلار تاسىمالى قىزمەتتەرىنە دە بەرىلەدى. الداعى ۋاقىتتا Recommended by EXPO-2017 باعدارلاماسىنا گيد-ەكسكۋرسوۆودتار مەن اپارتامەنتتەردى دە قوسۋ ماسەلەسى قارالىپ جاتىر.
باعدارلاما سەرىكتەستەرى ءوز قىزمەتكەرلەرى اراسىندا سەرۆيستىك قىزمەت كورسەتۋ ساپاسىن جاقسارتۋ بويىنشا ترەنينگتەر وتكىزىپ, اعىلشىن ءتىلىن مەڭگەرەتىن بولادى. مامانداردىڭ ايتۋىنشا, باعدارلاماعا قاتىسۋ ەرەكشە ستاتۋس بەرىپ قانا قويماي, قوسىمشا جاۋاپكەرشىلىك تە جۇكتەيدى. سوعان قاراماستان بيزنەس وكىلدەرى جاڭا تالاپتارعا دايىندىعىن بىلدىرۋدە.
ايگۇل ۋايسوۆا
