جەڭىس كۇنى ەلوردامىزدا ۇيىمداستىرىلعان كوپتەگەن شارالاردىڭ ىشىندەگى «ماڭگىلىك پولك» اكتسياسى استانالىقتاردىڭ نازارىن ەرەكشە اۋداردى. اسكەري وركەستردىڭ قولداۋىمەن مىڭداعان ادام ۇلى وتان سوعىسىندا ەرلىكپەن قازا تاپقان قازاقستاندىق جاۋىنگەرلەردىڭ فوتوسۋرەتتەرىن كوتەرىپ, سالتاناتتى شەرۋگە شىقتى.
استانا قالاسىنىڭ «اۋعانستان سوعىسى مۇگەدەكتەرى مەن ارداگەرلەرى وداعى» قوعامدىق بىرلەستىگى ۇيىمداستىرعان ايتۋلى شاراعا كەز كەلگەن ادامنىڭ قاتىسۋىنا مۇمكىندىك بەرىلدى. ۇلى وتان سوعىسى كەزىندە مايدان دالاسىندا قازا تاپقان, سونىمەن قاتار سوعىستان كەيىن قايتىس بولعان اتالارىنىڭ فوتوسۋرەتتەرىن كوتەرىپ شىققان ازاماتتاردىڭ جۇزىنەن جەڭىمپاز ۇرپاقتىڭ رۋحىن اڭعاردىق. شەرۋ قاتارىندا ەڭكەيگەن قاريانى دا, كەۋدەسىن ماقتانىش كەرنەگەن بالانى دا كوردىك.
– مەن بۇل شەرۋدە كەڭەس وداعىنىڭ باتىرى اقان قۇرمانوۆتىڭ فوتوسۋرەتىن كوتەرىپ ءجۇردىم. قانشاما ادامدار سوعىستا قازا بولعان جاۋىنگەر اتالارىمىزدىڭ بەينەسىن جاڭعىرتتى. اسىرەسە, بالالار مەن جاستاردىڭ بويىنان پاتريوتيزم رۋحى اڭعارىلدى. وسىنداي شارالار ءجيى ءوتىپ تۇرسا, وتانسۇيگىشتىك قاسيەتتى دامىتا تۇسەر ەدى, – دەيدى اكتسياعا قاتىسۋشى جاۋىنگەر-ينتەرناتسيوناليست, قىزىل جۇلدىز وردەنىنىڭ يەگەرى جاسۇلان سادىقوۆ.
ەلورداداعى اۋعانستان سوعىسىندا قازا تاپقان قازاقستاندىقتارعا ارنالعان مەموريال-ەسكەرتكىشتەن باستالعان تاعزىم شەرۋى «وتان قورعاۋشىلار» الاڭىنا دەيىن جالعاسىپ, قاتىسۋشىلار اتىنان ماڭگىلىك الاۋعا گۇل شوقتارىن قويۋ راسىمىمەن اياقتالدى.
