بۇگىن ەلوردادا كوپتەن كۇتكەن «جاس قانات-2016» رەسپۋبليكالىق بايقاۋىنىڭ شىمىلدىعى ءتۇرىلدى. بەيبىتشىلىك جانە كەلىسىم سارايى ساحناسىندا باس قوسقان جاس ورىنداۋشىلار جارتىلاي فينالعا ءوتۋ ءۇشىن العاشقى سىنعا ءتۇستى. سالتاناتتى جيىندا استانا قالاسى اكىمىنىڭ ورىنباسارى ەرمەك امانشاەۆ قاتىسىپ, جاس تالانتتارعا ساتتتىلىك تىلەدى.
مەرەكەلىك باعدارلاما قالىپتاسقان ءداستۇر بويىنشا «جاس قانات» بايقاۋىنىڭ انۇرانىمەن باستالدى. بۇدان كەيىن ساحناعا كونكۋرستىڭ ءار جىلىنداعى جەڭىمپاز جۇلدىزدارى مەدەۋ ارىنباەۆ, ەرلان كوكەەۆ, باقىت شاداەۆا, مارجان اراپباەۆا, تاعى باسقالار شىعىپ, قازىلار القاسىنىڭ ورنىنا جايعاستى.
سالتاناتتى جيىندا ءسوز سويلەگەن استانا قالاسى اكىمىنىڭ ورىنباسارى ەرمەك امانشاەۆ: «جاس قانات» جىلدان جىلعا ءوسىپ-ءونىپ كەلەدى. بۇل - جاس ءانشىنىڭ ونەرگە قۇتتى قادام جاساۋىنا ۇلكەن مۇمكىندىك, بولاشاق جۇلدىزداردىڭ باعىن اشاتىن ايتۋلى الاڭ. بايقاۋ بۇگىنگە دەيىن قانشاما انشىلەردىڭ تۇساۋىن كەسىپ, ەلگە تانىمال ەتتى؟! بيىلعى قاتىسۋشىلارعا ايتارىم, الدىڭعى اعا-اپالارىڭ سەكىلدى ونەردىڭ ۇلى جولىندا اداسپاي, تابىستان تابىسقا جەتە بەرىڭىزدەر!» دەپ جاسقاناتتىقتارعا اقجول تىلەدى.
جالپى بايقاۋعا قاتىسۋشىلاردى پروديۋسەر مۇرات ەرعاليەۆ جانە يۋري اراۆين, نۇرجامال ۇسەنباەۆا, رايسا مۇساقوجاەۆا, ابزال مۇحيتدينوۆ, ەرجان داۋتوۆ سىندى بەلگىلى تۇلعالار 15 بالدىق جۇيەمەن باعالايتىنىن ەستەرىڭىزگە سالامىز.
بۇل «جاس قانات» – بۇرىنعىلاردان وزگەشە. قازاقستان ەستراداسىندا ەلەۋلى ورىنعا يە جوبا ونەر الەمىنە جول تارتقالى بيىل – 25 جىل.
ءداستۇرلى سايىسقا قاتىسام دەۋشىلەر سانى جۇزدەن استى, الايدا ىرىكتەۋدە ەڭ ۇزدىك 14 ۇمىتكەر تاڭدالدى. اقتىق كەزەڭگە جولداما العانداردىڭ سانى جونىنەن اقتوبە مەن شىعىس قازاقستان وبلىسى توپ جاردى. بۇل وڭىرلەردىڭ ارقايسىنان 3 ونەرپاز قاتىستى. ال, استانانىڭ اتىنان سايىستا جيىرما التى جاستاعى جالعاس سۇلتانوۆ باق سىنادى. بۇگىندە ول قازاق ۇلتتىق ونەر ۋنيۆەرسيتەتىندەگى «ءداستۇرلى ءان» ماماندىعىنىڭ 4-كۋرس ستۋدەنتى. ەلوردالىق ۇمىتكەر بالعىنبەك يماشەۆتىڭ سوزىنە جازىلعان قۇرماش ماحانوۆتىڭ «گۇلستان-قازاقستان» انىمەن توعىزىنشى بولىپ ساحناعا شىقتى. «وسى ۋاقىتقا دەيىن كوبىنە ءداستۇرلى ءان بايقاۋلارىنا قاتىستىم. «جاس قانات» – ومىرىمدەگى ەڭ ۇلكەن ەسترادالىق كونكۋرستاردىڭ العاشقىسى. قارسىلاستارىم مىقتى, دەسە دە, استانانىڭ اتىن شىعارۋعا بارىمدى سالامىن» دەيدى جاسقاناتتىق جالعاس سۇلتانوۆ.
بايقاۋ شارتىنا سايكەس جاس ورىنداۋشىلار جاندى داۋىستا ءبىر-ءبىر اننەن شىرقادى. جيناعان ۇپاي سانى جونىنەن ۇزدىك تانىلعان وندىق ەرتەڭ ساعات 17:00-دە باستالاتىن جارتىلاي فينالدا جارىسادى.
ءمادينا جاقىپ
