استانا قالاسى دەنساۋلىق ساقتاۋ باسقارماسى مەن «ZhaStar» جاستار ساياساتى ورتالىعى قوعامدىق قورىنىڭ ۇيىمداستىرۋىمەن «بايتەرەك» حالىقارالىق ءباسپاسوز ورتالىعىندا «استانا – تەمەكى تۇتىنىنەن ازات قالا» تاقىرىبىندا بريفينگ ءوتتى. بريفينگتىڭ ماقساتى – جاستار اراسىندا سالاۋاتتى ءومىر سالتىن قالىپتاستىرىپ, زياندى ادەتتەردەن اۋلاق قىلۋ.
العاش ءسوز العان سالاۋاتتى ءومىر سالتىن قالىپتاستىرۋ ورتالىعىنىڭ ديرەكتورى مارات قۇرمانوۆ: «بۇل اۋىر ادەتتەن ارىلۋدىڭ جولى دا كۇردەلى, وعان كەتەتىن ۋاقىت تا ءبىرشاما. ماسەلەن, كانادا ەلىندە وسى جونىندە وتكىزىلگەن شارالار سەگىز جىل ىشىندە عانا وڭ ناتيجەلەر بەرگەن. ال, ءبىز ءوز رەسمي سايتىمىز ارقىلى جۇرگىزگەن ساۋالناماعا سۇيەنەر بولساق, «ءسىز سالاۋاتتى ءومىر سالتىن ۇستاناسىز با؟» دەگەن ساۋالىمىزعا 2010 جىلى تۇتىنۋشىلاردىڭ 47 پايىزى «جوق» دەسە, 2014 جىلى بۇل كورسەتكىش 37,5 پايىزعا تۇسكەن» دەپ, ءىستىڭ العا باسىپ كەلە جاتقانىن ايتتى. سونداي-اق, ول تەمەكىنىڭ عانا ەمەس, ناسىبايدىڭ دا زياندىلىعىنا توقتالىپ, وسىعان بايلانىستى اۋرۋحانالاردا بولعان 4 وقيعانى تىلگە تيەك ەتتى.
وتكەن جىلى ەلوردامىزدا شىلىمقورلىق ادەتتىڭ الدىن الۋ جونىندە 1500-گە جۋىق شارالار اتقارىلعان. وسىعان وراي استانالىق مەديتسينا ورتالىقتارى بەلسەندى ارەكەت ەتىپ كەلەدى. دارىگەرلەر تاراپىنان 2013 جىلى 88 419 ادامدى قامتىعان 1402 ءىس-شارا وتكىزىلىپ, ونىڭ ءتورت مىڭى ءىرى اۋقىمداعى اكتسيالارعا قاتىستى بولدى. ال, 33 مىڭعا جۋىق ادام اشىق ەسىك كۇندەرىنە اتسالىسقان. مەديتسينالىق-ساۋىقتىرۋ ورتالىعى باس دارىگەرىنىڭ ورىنباسارى گاۋحار بەكتاەۆا دا بۇل پروبلەمانىڭ بۇگىنگى قوعام الدىندا تۇرعان وزەكتى ماسەلەلەردىڭ ءبىرى ەكەنىن ايتتى. «جالپى, تەمەكى, ناسىباي نەمەسە وزگە دە پسيحوبەلسەندى زاتتاردى تۇتىنۋ دەڭگەيى قوعامدا ءالى تومەندەمەي تۇر. اسىرەسە, جاستار اراسىندا 12 جاستان باستاپ تەمەكىگە اۋەستىك ءجيى بايقالادى. تەمەكىگە تاۋەلدىلىك – ەسىرتكى زاتتارىنا تاۋەلدى بولۋدان كەم ەمەس. بۇگىندە جاستاردىڭ ەسىرتكى زاتتارىن تۇتىنۋ دەڭگەيى رەسمي دەرەك بويىنشا 3,8 پايىزعا تومەندەگەنىمەن, ماريحۋانا زاتتارىن قولدانۋى 7,8 پايىزعا وسكەن. بۇعان قوسا, ءدارىحانالاردا دارىگەر رەتسەپتىسى بويىنشا بەرىلەتىن ءدارى-دارمەكتەر ەش قاداعالاۋسىز ساتىلۋدا. وكىنىشتىسى, بۇل دارىلەردىڭ قۇرامىندا ەسىرتكى تەكتەس زاتتار دا بار» دەدى.
اتاپ ءوتۋ كەرەك, ەلوردالىقتار وسى ماسەلە بويىنشا وتكىزىلەتىن سەمينار, ترەنينگ, دوڭگەلەك ۇستەلدەرگە بەلسەندى تۇردە قاتىسىپ كەلەدى. وسى رەتتە زياندى ادەتتىڭ زارداپتارى جايىندا 51 200 دانا اقپاراتتىق ماتەريالدار تاراتىلعان.
ال, مەديتسينالىق ۇيىمدار تەمەكى ءونىمدەرىنەن كەلەتىن زيان جايىندا بەينەروليكتەر ءتۇسىرىپ, ءوز مەكەمەلەرى عيماراتتارىندا ورنالاسقان تەلەديدار ارقىلى پاتسيەنتتەردىڭ نازارىنا ۇسىنىپ كەلەدى.
ءباسپاسوز ءماسليحاتىنان كەيىن «كونگرەسس-حولل» سارايى الدىندا استانالىق جاستاردىڭ اتسالىسۋىمەن سالاۋاتتى ءومىر سالتىن ناسيحاتتاعان فلەشموب وتكىزىلدى. وندا ەلوردا ورەندەرى تەمەكى تارتۋدان باس تارتۋعا شاقىرىپ, بۇقارانىڭ نازارىن اۋدارىپ, «تەمەكى شەگۋ – ءسان ەمەس, ەركىن تىنىس ال» جانە «نيكوتينگە – ماندارين» اكتسيالارىن جۇرگىزىپ, قالا تۇرعىندارىنا وي تاستادى.
جايىق ناعىماش
