قازاق ەلىنىڭ سوڭعى حانى كەنەسارى تۋرالى اقىن, جازۋشى ادىلبەك ءابدىرايىمۇلىنىڭ «سەمسەر جۇزىندەگى سەرت» رومان-تريلوگياسى كىتاپ بولىپ قايتا باسىلىپ شىقتى. جاڭا كىتاپتىڭ تانىستىرىلىمى استاناداعى ەۋرازيا حالىقارالىق كىتاپ كورمە-جارمەڭكەسىندە ءوتتى.
كەزدەسۋگە بەلگىلى قالامگەر, سەناتور نۇرتورە ءجۇسىپ باستاعان ءبىر توپ دەپۋتات, قۋانىش جيەنباي سياقتى قابىرعالى قالامگەرلەر, جانبولات اۋپباەۆ ءتارىزدى كانىگى جۋرناليستەر, كىتاپتى وقىپ قويعان, وقۋعا ىنتىزار وقىرماندار مەن ادەبيەت جاناشىرلارى قاتىستى. كەزدەسۋدى ءدۇلدۇل اقىن داۋلەتكەرەي كاپۇلى جۇرگىزدى.
قۇرىلىمى مەن مازمۇنى كۇردەلى, تاريحي دەرەكتەرگە قانىق شىعارما ءۇش-ءتورت عاسىردى قامتي وتىرىپ, قازاقتىڭ باسىنان كەشكەن حيكمەتتەردى سيپاتتاعان. تريلوگيانىڭ ءبىرىنشى كىتابى «ارلاننىڭ ازۋى», ەكىنشى كىتابى «سەرت», ءۇشىنشى تومى «رۋح» دەپ اتالادى. مۇندا قازاق ەلىنىڭ پاتشا يمپەرياسى وتارشىلدىعىنا قارسى كۇرەسى, كەنەسارىنىڭ قولباسشىلىعى مەن قايراتكەرلىگى, سونداي-اق, حاننىڭ ۇلى, مۇراگەرى سىزدىق سۇلتاننىڭ سول كۇرەستى جالعاستىرۋى بايان ەتىلەدى. تۋىندىنىڭ ءون بويىنان رۋحتى قوزعايتىن سول كەزدەگى قوعامدىق-الەۋمەتتىك وقيعالار, مىنەز-قۇلىق قۇبىلىستارى شىنايى جانە كەستەلى تۇردە كورسەتىلەدى.
– كىتاپ شىعارۋ, جازۋشىلىقتى جانە كىتاپ وقۋ مادەنيەتىن قالىپتاستىرۋعا زور ۇلەس قوسىپ جۇرگەن «فوليانت» باسپاسى وسى حالىقارالىق ءىس-شارانىڭ وتۋىنە تىكەلەي مۇرىندىق بولۋدا. بۇل ولاردىڭ كاسىبي-سالالىق جوباسىنا اينالعان. سونداي-اق كوپتەگەن تۋىندىنىڭ جارىق كورۋىنە, سونىڭ ىشىندە «سەمسەر جۇزىندەگى سەرت» رومان-تريلوگياسىنىڭ قايتا باسىلىپ شىعۋىنا قولداۋ ءبىلدىردى. مۇنى ادەبيەتكە دەگەن ۇلكەن قامقورلىق دەپ بىلەمىز. سول ءۇشىن «فوليانت» باسپاسىنىڭ ديرەكتورى نۇرلان سارسەنبىۇلى باستاعان ۇجىمعا شەكسىز ريزاشىلىعىمدى بىلدىرەمىن! – دەدى اۆتور.
قازاق ەلىنىڭ سوڭعى حانى كەنەسارىنىڭ تاعدىرى مەن قايراتكەرلىگى, قازاق حالقىنىڭ قيىن دا قاھارماندىققا تولى ءومىر جولى سۋرەتتەلگەن «سەمسەر جۇزىندەگى سەرت» رومان-تريلوگياسى بىلتىرعى جىل قورىتىندىسىندا جوعارى باعالانعان ەدى. سودان بولار كىتاپ جاقسى ساۋدالاندى. كەزدەسۋگە قاتىسۋشى ادەبيەت وكىلدەرى كەنەسارى تۋرالى جازىلعان تۇڭعىش تۋىندى ساياسي يىرىمدەرگە بەيىمدەلگەن زاماننىڭ شىعارماسى ەمەس, ۇلتتىق رۋحىمىز بەن نامىسىمىزدى ايگىلەيتىن تاۋەلسىزدىكتىڭ ءتول تۋىندىسى ەكەنىن ايتتى. سونداي-اق روماننىڭ قوعامدا تاريحي سانا قالىپتاستىرۋدا ەلەۋلى ءرول اتقارارى ءسوزسىز.
