جازۋشى ۇلاربەك دالەيدىڭ «جوشى حان» تاريحي رومانى جارىق كوردى. استانادا وتكەن حالىقارالىق كىتاپ جارمەڭكەسى اياسىندا اۆتور كىتاپتىڭ جازىلۋ بارىسىمەن ءبولىستى.
– ءتورت جىلعا سوزىلعان ىزدەنىستىڭ, بەس اي بويى جازۋ ۇستەلىندە تاپجىلماي وتىرعان تاباندى ەڭبەكتىڭ ناتيجەسى – مىنە, الدارىڭىزدا. قاھارلى شىڭعىس ءداۋىرىن, جوشى ۇلىسىنىڭ قۇرىلۋى بارىسىنداعى قىم-قيعاش وقيعالار مەن قاندى جورىقتاردى توگىلتە سۋرەتتەۋگە تىرىستىم. جاڭا ۇرپاققا جاڭا, شىنايى تاريح كەرەك. وزگەلەر سىزىپ بەرگەن شەڭبەردى قيراتاتىن شاق كەلدى, – دەدى ۇلاربەك دالەيۇلى.
ايتا كەتەيىك, بۇل شىعارما – قازاق جانە الەم ادەبيەتىندە جوشى حان جايلى جازىلعان تۇڭعىش رومان. اۆتور زەرتتەۋ ەڭبەكتەرى نەگىزىندە شىڭعىس زامانى مەن ونىڭ تۇڭعىش ۇلى جوشى حان جايلى تەرەڭ جانە تىڭ دەرەكتەردىڭ ىزىنە تۇسكەن. سول ارقىلى جوشىنىڭ قىم-قۋىت كۇندەردە دۇنيە ەسىگىن اشۋى, وسكەن ورتاسى مەن جاستىق شاعى, جورىقتارى مەن ءومىرىنىڭ سوڭىنا دەيىنگى وقيعالاردى بارىنشا تولىق بايانداعان. «فوليانت» باسپاسىنان جارىق كورگەن رومان 480 بەتتى قۇراپ وتىر, جالپى 23 حيكاياعا جىكتەلگەن. ءار حيكايا بىرنەشە تاقىرىپقا بولىنگەن.
