قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ, بەلارۋس رەسپۋبليكاسىنىڭ پرەزيدەنتى الەكساندر لۋكاشەنكونىڭ جانە رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ كەزدەسۋى ءوتتى.
مەملەكەتتەر باسشىلارى ءوزارا ساۋدانى جانە ءۇش ەلدىڭ ەكونوميكالىق ءوزارا ىقپالداستىعىن ارتتىرۋ ماسەلەلەرىن قاراستىردى. بۇدان بولەك, پرەزيدەنتتەر الەمدىك ەكونوميكاداعى ۇردىستەردىڭ دامۋىن, سونداي-اق ۋكراياداعى جاعدايدى تالقىلادى.
نۇرسۇلتان نازارباەۆ داعدارىس كورىنىستەرى تۇرعىسىنان الەمدەگى قازىرگى احۋالدى تالقىلاۋ ءۇشىن بۇل كەزدەسۋدىڭ ماڭىزدىلىعىن اتاپ ءوتتى.
– 2007-2009 جىلدارداعى داعدارىس جاھاندىق سيپاتتا بولعان ەدى, ال قازىرگىسى وڭىرلىك باعىت الىپ وتىر جانە ەنەرگيا رەسۋرستارى مەن ءبىز ءوندىرىپ جاتقان تاۋارلار باعاسىنىڭ تومەندەۋىنەن تۋىندادى. ءبىز مۇنداي قاتەردىڭ بولارىن بولجادىق, ەندىگى مىندەتىمىز – بىرلەسكەن شارالار ازىرلەپ, وسى كەزەڭنەن ساتىمەن ءوتىپ شىعۋ, – دەدى قازاقستان پرەزيدەنتى.
مەملەكەت باسشىسى سونداي-اق وزگە ەلدەرگە دە اسەرىن تيگىزىپ وتىرعان ۋكراينا داعدارىسىنا قاتىستى پىكىر الماسۋ قاجەتتىگىنە توقتالدى.
قازاقستان پرەزيدەنتى باعىت-باعداردى ءوزارا ۇيلەستىرىپ, پەرسپەكتيۆالى ماسەلەلەردى تالقىلاپ وتىرۋ ءۇشىن ءجيى جانە تۇراقتى كەزدەسۋلەر وتكىزۋدىڭ ماڭىزدىلىعىنا نازار اۋداردى.
بەلارۋس جانە رەسەي پرەزيدەنتتەرى نۇرسۇلتان نازارباەۆقا استاناعا شاقىرىپ, كوزدەلگەن ماسەلەلەردى تالقىلاۋعا مۇمكىندىك جاساعانى ءۇشىن العىس ءبىلدىردى.
قازاقستان, رەسەي جانە بەلارۋس پرەزيدەنتتەرى نازارباەۆ ورتالىعىندا بولدى. مەملەكەت باسشىلارى مۇندا «الەمدى وزگەرتەتىن يدەيالار» ينتەراكتيۆتى اعارتۋشىلىق ورتالىعىنىڭ جۇمىسىمەن تانىستى.
akorda.kz
