ۇلى وتان سوعىسى مايدانگەرلەرىنە قۇرمەت كورسەتۋ, ەرلىككە تاعزىم ەتۋ حالقىمىزدىڭ بەرىك داستۇرىنە اينالعان. بۇگىنگى تاڭدا ەلىمىزدىڭ بارلىق ەلدى مەكەندەرىندە, وقۋ ورىندارى مەن مەكەمەلەرىندە ارداگەرلەرگە ارنالعان شارالار ۇيىمداستىرىلىپ جاتىر.
سونداي يگى شارانىڭ ءبىرىن استانا قالاسى ەسىل اۋداندىق ارداگەرلەر كەڭەسى ۇيىمداستىردى. قالاداعى №65 مەكتەپ-گيمنازيادا «مايدانگەر ۇرپاقتار كەزدەسۋى» اتتى تاعىلىمدى شاراعا ۇلى وتان سوعىسىنىڭ ارداگەرلەرى قادان بەكەنوۆ, لەونيد كارتاۋزوۆ, تىل ەڭبەككەرلەرى بارلىباي ابەلدينوۆ, روزا بيسەنوۆا, سونىمەن قاتار, اۋعانستان سوعىسىنا قاتىسقان جاۋىنگەر-ينتەرناتسيوناليستەر امانگەلدى حاسەنوۆ, بولات ەرمۇحانوۆ جانە عالىم نۇرتاەۆ قۇرمەتتى قوناق رەتىندە شاقىرىلدى. مەكتەپ مۇعالىمدەرى مەن وقۋشىلارى قاتىسقان باسقوسۋدا وتان ءۇشىن ايقاسقا تۇسكەن مايدانگەرلەر سوعىس بارىسىنداعى وتانداستار ەرلىگىن ايتسا, جەڭىس ءۇشىن قاجىرلى ەڭبەكتىڭ بەينەتىن اڭگىمەلەدى. جاۋىنگەر-نتەرناتسيوناليستەر دە اۋعانستان سوعىسىنىڭ تاۋقىمەتى جايلى ويلارىن ورتاعا سالدى.
جاس ۇرپاقتىڭ بويىنا وتاندىق ءپاتريوتيزمنىڭ ۇشقىنىن تۇتاتقان جۇزدەسۋدەن تاعىلىمدى اسەر العان وقۋشىلار اعا بۋىنعا ريزاشىلىقتارىن ءان-كۇيمەن ءبىلدىردى. كەزدەسۋ سوڭىندا قوناقتارعا ەسىل اۋداندىق ارداگەرلەر كەڭەسىنىڭ ءتورايىمى رىستى اتىعاەۆا اۋدان اكىمدىگى اتىنان سىي-سياپات ۇسىندى. سونىمەن قاتار, قوس مايداننىڭ ارداگەرلەرى ناۋرىز مەيرامىنا وراي جايىلعان مەرەكەلىك داستارقاننان ءدام تاتتى.
عالىم قوجابەكوۆ
