اسەلدىڭ مەكتەپتە وقىپ جۇرگەن كەزى. بىردە قولىنا قايشى الىپ, تەرىدەن قالتا تىگىپ, ونى قازاقى ويۋمەن كەستەلەپ, جيەگىن ۇساق مونشاقپەن كومكەرىپ, باۋ تاعىپ, ىشىنە كىتاپتارىن سالىپ مەكتەپكە كەلدى. قۇربىلارى ەرەكشە دورباعا تاڭ قالىستى. بالاماسى جوق بۇيىمدى تەك ءوز قولىمەن جاساۋعا بولاتىنىن تۇسىنگەن اسەل بولاشاقتا ديزاينەر بولۋدى ارمانداعان. ۋاقىت وتە كەلە سول ويىنىڭ جەتەگىمەن قازاقتىڭ قولونەرىن زەردەلەۋگە دەن قويدى. زامانىنا ساي نارىقتىڭ سۇرانىسىن ءدال باسقان اسەل قازاقى ورنەگى باسىلعان جىبەك ورامال, گۇلدى ءشالى, ءساندى بەلدىك, بىلعارى سومكە جانە تاعى باسقا اكسەسسۋارلاردى قازاقستاندىق «Adili» برەندىمەن شىعارا باستادى.
تۇتىنۋشىلاردى ەلەڭ ەتكىزگەن بۇيىمداردى كوپتەپ شىعارىپ, ءىرى ساۋدا ورتالىقتارىندا دۇكەن اشىپ, ساۋداسىن قىزدىردى. ودان بولەك, ونلاين ساتىلىمىن دا جولعا قويدى.
جاس ديزاينەر ءارى «Adili» برەندىنىڭ نەگىزىن قالاۋشى اسەل ءادىل ءوز بۇيىمدارىن جاساعاندا, ءسان الەمىنە وتكەن عاسىردىڭ ورتا شەنىندە پايدا بولعان «ەتنوستيل» باعىتىن تاڭدادى. ونداعىسى مادەني مۇرامىزدىڭ ەلەمەنتتەرىن قازىرگى زامانعى كيىم كيۋ ۇردىسىمەن ۇشتاستىرىپ, سول ارقىلى قازاقى بولمىسىن كورسەتۋ بولاتىن. اتا-بابالارىمىزدىڭ ەجەلدەن قولدانىپ كەلگەن تەرى, جىبەك, ءجۇن, ماقتا سەكىلدى تابيعي ماتەريالداردان جاسالعان بۇيىمدار ۇلتتىق ويۋمەن قۇلپىرىپ, جاڭا سيپاتپەن تولىقتى. شەبەر قولىنان شىققان اكسەسسۋارلاردى بۇگىنگى ءسانىمىزدىڭ, كيىم كيۋ مانەرىنىڭ اجىراماس بولشەگىنە اينالدىرىپ جىبەردى.
مىنەكەي, «Adili» برەندىنىڭ باستى جەتىستىگىن وسىلايشا باعالۋعا بولادى.
«شەتەلگە بارعاندا ءوز ەلىڭنىڭ ءبىر بەلگىسى وزىڭمەن بىرگە جۇرگەنى قانداي جاقسى. موينىڭا وراعان شارف, نە كەستەلى ورامال, قازاقى ويۋ باسىلعان پورتمونە نەمەسە قولىڭىزدا ۇلتتىق ورنەگىمەن ەرەكشەلەنەتىن قولسومكە بولسا دا توپتىڭ ورتاسىندا ءوزىڭدى ەرەكشە سەزىنەسىڭ. ەۋروپاشا شالبارلانىپ, جەڭىل جەيدە كيىنگەننىڭ وزىندە دە ويۋى قانىق ورامالدى موينىڭىزعا بايلاي قويساڭىز بەينەڭىز وزگەرىپ شىعا كەلەدى. سول سەبەپتى دە كەز كەلگەن كيىمگە قوسىمشا ءسان بەرەتىن بەلبەۋ, ورامال, قولسومكەسى تاعى باسقا اكسەسسۋارلاردى جاساۋدى جولعا قويدىم» دەيدى اسەل.
ارينە, باس ديزاينەرى ءوزى بولسا دا «Adili» برەندىنىڭ تاۋارلارىن «قازاقستاندا جاسالعان» دەۋگە بولمايدى. تەحنولوگيا شەتتىكى, ءوندىرىس تە سول جاقتان. تەرى سومكەلەردى وڭتۇستىك كورەيادا, گونكونگتە شىعارادى. ورامالداردىڭ ويۋى شانحايدا باسىلىپ, قىتايدىڭ جىبەكتەرىن قولدانادى. ال جىبەككە تۇسەتىن ويۋدى لازەر ساۋلەسىمەن باسۋ سول جاقتا ارزانعا تۇسەتىن كورىنەدى. ونداي تەحنولوگيامەن باسىلعان سۋرەتتەر قانشا جۋىلسا دا سول قالپىندا قالىپ, بوياۋى كەتپەيدى. تاعى ءبىر توپتاماسىنا كەستەنى قولدانباق ويى بار. كەستەلى ورامالدار دا كوپكە دەيىن ءوڭىن بەرمەي, ۇزاق كيىلەدى ەكەن.
سوڭعى كەزدە كوپتەگەن قازاقستان ديزاينەرلەرىنىڭ جاپپاي دەن قويعان باعىتى قازاقى ەتنوستيلدى جاڭعىرتۋ ەكەنىن كورىپ ءجۇرمىز. راسىندا دا, ونىڭ كوبى كورمەككە جاقسى, ءارى كەتسە تويلارعا كيىپ, ساحنادا ءان سالعان ونەرپازداردىڭ ۇستىنەن تاماشالايمىز. بۇل دا جاقسى. الايدا, مۇنداي زاتتاردىڭ كۇندەلىكتى كيۋگە قولايلى ەمەستىگىنەن بۇل ءۇردىس كەڭ تارالماي جاتىر.
اسەلدىڭ باسقا ديزاينەرلەردەن ايىرماشىلىعى ونىڭ قيالىنان شىققان كوركەم بۇيىمدارىن قاي ورتادا قانداي مەرەكەدە بولسىن ۇيالماي كيەمىز. قازاقى ويۋمەن كومكەرىلگەن جىبەك ورامال قاي ايەلدىڭ ءسانىن كەلتىرمەيدى دەپ ويلايسىز؟! ىسكەر ادامنىڭ جازۋ ۇستەلىن جايناتىپ جىبەرەتىن تەرىدەن جاسالىپ, قازاقى ويۋ تۇسكەن ۆيزيتكا سالعىش, پورتمونە, كىلت ساقتاعىش, تاعى باسقا بۇيىمدار ساپاسىمەن دە, سانىمەن دە قۋانتادى.
ءتۇرلى بوياۋمەن تۇرلەنگەن, قولدان ەسىلگەن جۇننەن جاسالعان ءساندى سومكەلەر, جاسوسپىرىمدەردىڭ ارقا دوربالارى, سانقويلارعا ارنالعان ادەمى كلاتچتار دا تۇتىنۋشىنىڭ قالاپ الاتىن بۇيىمىنا اينالدى.
وزگە ەلدىڭ برەندىنە تاۋەلدى بولماي, قازاقى مانەردى ۇردىسكە اينالدىرىپ, ۇلتىنىڭ ءبىر بەلگىسىن وزىمەن الىپ جۇرگىسى كەلگەن ادامنىڭ قالاعان نارسەسىنە قول جەتكىزۋگە مۇمكىندىك بار. اسەلدىڭ اسەم اكسەسسۋارلارى وسى مۇمكىندىكتىڭ العاشقى قارلىعاشى دەسەك, قاتەلەسپەيمىز.
ايگۇل ۋايسوۆا
