ەلوردالىق اكىمدىكتە قالالىق ءماسليحاتتىڭ تۇراقتى كوميسسياسى ءداستۇرلى ەمەس ءدىني اعىمدارمەن كۇرەس بارىسى تۋرالى وتىرىس وتكىزدى. جيىندا ءارتۇرلى باسقارما وكىلدەرى اتالمىش ماسەلەگە قاتىستى دەرەكتەرمەن ءبولىسىپ, شاھارداعى ءدىني احۋالدى تالقىلادى.
ءدىن ىستەرى جونىندەگى باسقارما باسشىسىنىڭ مىندەتىن اتقارۋشى نۇرداۋلەت ءالمۇحانوۆتىڭ ايتۋىنشا, بۇگىندە استانا اۋماعىندا 49 ءدىني بىرلەستىك جۇمىس ىستەيدى. ولاردىڭ ارقايسىسىنىڭ قىزمەتى ءجىتى باقىلانىپ وتىرادى. سونداي-اق, عيبادات جاسايتىن ورىندار دا تۇراقتى تۇردە تەكسەرىلەدى. ماسەلەن, قالا بويىنشا الماتى اۋدانىندا – 3, ەسىل اۋدانىندا – 10, سارىارقا اۋدانىندا 6 نامازحانا بار ەكەن.
جات ءدىني اعىمداردىڭ قوعامعا دەندەۋىنە ميگراتسيانىڭ دا تۇرتكى بولارى بەلگىلى. ياعني, قالاعا سىرتتان قونىس اۋدارعان ازاماتتار بوگدە دىندەرگە الدەقايدا جيىرەك ۇرىناتىن كورىنەدى. وسى ورايدا اتالمىش ۆەدومستۆونىڭ بىرقاتار قۇرىلىس نىساندارىن ارالاپ, تۇسىندىرمە جۇمىستارىن جۇرگىزۋدى ادەتكە اينالدىرعان. ويتكەنى, ميگرانتتاردىڭ باسىم بولىگى – سول سالادا.
مۇنىمەن قوسا, نۇرداۋلەت ءالمۇحانوۆ مارگينال جاستارعا قاتىستى الاڭداۋشىلىعىن ءبىلدىردى. جەتكىنشەكتەر نەنىڭ وڭ, نەنىڭ تەرىس ەكەنىنە دۇرىستاپ كوز جەتكىزبەي جاتىپ, بوتەن دىندەردىڭ تورىنا قالاي شىرمالىپ قالعانىن اڭداماي قالادى. مىسالى, «ۆكونتاكتە» جانە «فەيسبۋك» سەكىلدى الەۋمەتتىك جەلىلەردە دىنارالىق قاقتىعىستار تۋعىزاتىن, قولدانۋشىلاردى جات اعىمعا قاراي سۇيرەيتىن قاۋىمداستىقتار جەتەرلىك. ءدىن ىستەرى جونىندەگى باسقارما ەكسترەميزمدى ناسيحاتتايتىن 368 مىڭ توپتى تاۋىپتى. ەندى ولار بۇل فاكتىنى ارنايى مەكەمەلەرگە ۇسىنىپ, الگى ينتەرنەت-پاراقشالاردىڭ تەزىرەك بۇعاتتالۋىنا مۇرىندىق بولماقشى.
بۇدان سوڭ «نۇر استانا» ورتالىق مەشىتىنىڭ نايب يمامى ءادىلحان سەرىكباي ءسوز سويلەپ, ەلوردالىق مەشىتتەرگە كەلۋشى حالىقتىڭ ءدىني سەنىمدەرىنە توقتالدى. ونىڭ مالىمدەۋىنشە, قازىرگى تاڭدا استانا مەشىتتەرىنە جينالاتىن بۇقارانىڭ 10 پايىزدايى – ءسالافيزمدى ۇستانۋشىلار. اسىرەسە, بۇل جات اعىمعا ەرگەن جاندار عىلماني مەشىتىن كوبىرەك توڭىرەكتەيدى.
نايب يمامنىڭ بەرگەن اقپاراتىن ەلوردالىق ىشكى ىستەر دەپارتامەنتىنىڭ ەكسترەميزممەن كۇرەس باسقارماسى باسشىسى ەربۇلان قۇسايىنوۆ تا راستادى. وسى كۇندەرى ءتارتىپ ساقشىلارى ءدىني باسقارما قىزمەتكەرلەرىمەن تىزە قوسىپ, وقۋ ورىندارىنداعى, ءاسكەري مەكەمەلەردەگى, مەملەكەتتىك ۇيىمدارداعى ازاماتتاردى ءدىني جاعىنان ساۋاتتاندىراتىن تانىمدىق ءىس-شارالار ۇيىمداستىرادى.
وكىنىشكە قاراي, ءداستۇرلى ەمەس دىندەر بالالار مەن جاسوسپىرىمدەردى دە جەتەككە الىپ ۇلگەرىپتى. بۇل قۇبىلىس جايلى ءبىلىم باسقارماسىنىڭ وكىلى ءمادينا سۇلەيمەنوۆا باياندادى. ونىڭ ايتۋىنا سەنسەك, استانالىق مەكتەپتەردە وقيتىن 56 شاكىرت جات اعىمعا وتكەن. سونىڭ كەسىرىنەن مەكتەپ زاڭدارىنا قايشى كەلەتىن ارەكەتتەر جاساپ, ۇستازداردىڭ رەنىشىن تۋعىزۋدا. ءوز كەزەگىندە باسقارما مامانى بۇل جايتتىڭ الداعى ۋاقىتتا رەتتەلەتىنىنە ءۇمىت ءبىلدىردى.
بوتاگوز ماراتقىزى
