ءار جىلدارى وقۋ ۇدەرىسىنە جاڭا وزگەرىستەر ەنگىزىلىپ, ونى يگەرۋ ىسىنە تالاپ قويىلۋدا. بۇل جولى دا ەلورداداعى مەكتەپتەر قىزۋ قاربالاسقا تولى. ساناۋلى كۇندەردەن كەيىن شاكىرتتەرىنە ەسىگىن ايقارا اشاتىن №15 مەكتەپ-ليتسەيىندە بۇرىن-سوڭدى بولماعان كۇردەلى جوندەۋ جۇرگىزىلىپ جاتىر.
كوپ جىلدان بەرى كۇنگە قاقتالعان تەرەزەلەر مەن ساپاسى سىر بەرگەن ەسىكتەر جاڭالاندى. تاس ەدەنگە پليتا توسەلدى. قازىر سىرلاۋ, ارلەۋ جۇمىسى اياقتالۋعا تاياۋ. اتالمىش ءبىلىم ورداسىنىڭ ديرەكتورى باۋىرجان قاپارۇلىنىڭ ايتۋىنشا, بارلىق اتقارىلاتىن جۇمىستارعا 108 ميلليون 800 مىڭ تەڭگە بولىنگەن. تاريحى ارىدەن باستالاتىن بۇل عيمارات بۇرىن ءبىر قاباتتى بولعان ەكەن. بالا سانى كوبەيۋىنە سايكەس, 1963 جىلى قوسىمشا ءتورت قابات قوسىلعان. سول كەزدەگى جوبا بويىنشا بۇل ءبىلىم وشاعى 700 وقۋشىعا ارنالعان. قازىرگى كەزەڭدە ولاردىڭ سانى ەكى ەسەگە ءوسىپ وتىر.
اتاۋىنان بەلگىلى بولعانداي, مۇندا فيزيكا مەن ماتەماتيكا ءپانى تەرەڭدەتىلىپ وقىتىلادى. ناتيجەسى جامان ەمەس, عىلىمي جوبالارى بويىنشا وتكىزىلگەن حالىقارالىق جارىستاردا اعايىندى ريزا, روزا ىسقاق ەسىمدى جاسوسپىرىمدەر توپ جارىپ, سەرتيفيكات الدى. بيىلعى ۇبت-عا 73 بالا قاتىسىپ, ورتاشا بالل 78-گە جەتتى. وتكەن جىلى بىتىرگەن تۇلەكتەردىڭ 90 پايىزدايى ءارتۇرلى وقۋ ورىندارىنا تۇسكەن. سونىڭ ىشىندە 35 بالا گرانت يەگەرى اتانىپتى.
قازىر يننوۆاتسيالىق تەحنولوگيانى مەڭگەرۋ ماسەلەسى العى كەزەككە قويىلىپ وتىر.
سونىڭ ەڭ باستى تارماعى بولىپ سانالاتىن پاندەر وسى مەكتەپتە كەڭ مازمۇندا وقىتىلۋدا. وقۋشىلاردىڭ عىلىممەن اينالىسۋىنا جان-جاقتى مۇمكىندىك جاسالعان. سپورتتاعى جەتىستىگى دە كوڭىل تولارلىقتاي.
– ەلباسى ءوز جولداۋىندا بۇقارانى سپورتقا تارتۋ ماسەلەسىن قوزعادى. ارينە, جاستايىنان دەنە شىنىقتىرۋدى قولعا العان ادامنىڭ مۇمكىندىگى وتە زور بولادى. سوعان وراي ءبىز سوڭعى جىل بەدەرىندە ۆولەيبول, باسكەتبول, فۋتبول الاڭدارىن تالاپقا ساي ەتىپ جوندەدىك. ال سپورتتىڭ بىرنەشە تۇرىنەن جەتىستىككە جەتكەن وقۋشىلار بارشىلىق. ماسەلەن, كاراتەدەن مادينا شاكيروۆا ەكى دۇركىن قازاقستان چەمپيونى جانە فاريزا شاكەنوۆا تاۋعا ورلەۋدەن كۇمىس جۇلدەگەر اتاندى. جالپى, ولاردىڭ قاتارىن تاعى بىرنەشە ەسىمدەرمەن تولىقتىرۋعا بولادى, – دەيدى مەكتەپ ديرەكتورى ب. جاركەنوۆ.
بيىل مەكتەپتىڭ كىرەبەرىسى كەڭەيتىلۋدە. جىلۋ جۇيەسى تازالانىپ, بارلىق تەحنيكالىق قۇرالدار قايتا تەكسەرۋدەن وتكەن. عيمارات سىرتى دا تولىق جوندەۋدەن وتكىزىلەدى. جاڭادان مەكتەپكە قابىلداناتىن 120 بالاعا وسى جاڭا وزگەرىس ەرەكشە اسەر ەتەدى دەيدى مەكتەپ ۇجىمى.
مۇنداعى جۇمىستار تامىزدىڭ 20-دا اياقتالادى. قۇرىلىسشىلاردىڭ قارقىنىنا قاراپ, مەجەلى كۇندە بىتىرەدى دەگەن وي تۇيدىك. مۇعالىمدەر ءتىلشى كەلگەنىن پايدالانىپ, بارلىق جەتىستىگىن سانامالاپ ايتىپ شىقتى. سونىڭ ىشىندە ءبىز مەكتەپ سايتىنا ايرىقشا ءمان بەردىك. ەلەكتروندىق گازەتكە وقۋشىلار مەن اتا-انالار تىلەك, وتىنىشتەرىن جازىپتى. ءبىر سوزبەن ايتقاندا, بۇل سايت تىعىز قارىم-قاتىناستىڭ قۇرالىنا اينالعان.
ءامىرحان الماعانبەتوۆ
