كەشە قالالىق كاسىپكەرلىك پالاتاسىنىڭ ۇيىمداستىرۋىمەن «استانالىق جۇمىسپەن قامتۋ» فورۋمى ءوتتى. بيزنەس وكىلدەرىنىڭ, تەحنيكالىق جانە كاسىپتىك ءبىلىم بەرۋ مەكەمەلەرى مەن جاس تۇلەكتەردىڭ مۇددەلەرىن ءبىر ارنادا توعىستىراتىن شارا جۇمىسىنا ءۇش مىڭعا تارتا ەلوردالىق قاتىستى.
– ادام ومىرىندە ءۇش ماڭىزدى قۇندىلىق بار. ول – بەيبىت ءومىر ءسۇرۋ, ۇرپاق ءوسىرىپ, ەڭبەك ەتۋ. سودان دا حالقىمىز «ىرىستىڭ دا, تىنىستىڭ دا دىڭگەگى –ەڭبەك» دەگەن. ويتكەنى, ومىردەگى جەتىستىك پەن جەڭىس تەك قانا ەڭبەكپەن كەلەتىنى انىق, – دەدى استانا قالاسى اكىمىنىڭ ورىنباسارى ايدا بالاەۆا فورۋمنىڭ اشىلۋ سالتاناتىندا سويلەگەن سوزىندە. جۇمىسسىزدىق جانە جۇمىسپەن قامتۋ ماسەلەلەرىنىڭ بۇگىنگى احۋالىنا توقتالىپ وتكەن ايدا عالىمقىزى استانالىق فورۋم جۇمىسى وزەكتى ماسەلەلەردى رەتتەۋدە وزىندىك ۇلەس قوسادى دەپ باعالادى.
ستاتيستيكا بويىنشا استانا قالاسىندا 24 مىڭ جۇمىسسىز رەسمي تىركەلگەن. الايدا, ىشكى ميگراتسيانىڭ ەسەبىنەن بۇل كورسەتكىش بىرنەشە ەسە ارتاتىنىن جوققا شىعارۋعا بولمايدى.
وسى ماسەلەلەردى شەشۋدىڭ كەشەندى ادىستەرى مەن ناقتى جولدارىن قاراستىرعان فورۋم, شىن مانىندە, بيزنەس وكىلدەرى ءۇشىن دە, كاسىپتىك تەحنيكالىق ءبىلىم بەرەتىن مەكەمەلەردىڭ تۇلەكتەرى ءۇشىن دە ءوزارا پىكىرلەسەتىن الاڭعا اينالدى. ونىڭ اياسىندا «بولاشاق» حالىقارالىق باعدارلامالار ورتالىعى ينجەنەرلىك-تەحنيكالىق, ينجەنەرلىك-پەداگوگيكالىق ماماندىقتارعا شەتەلدە وقىپ, تاجىريبەدەن ءوتۋ مۇمكىندىكتەرى تانىستىردى.
ال, «استانا قالاسىنىڭ ونەركاسىپتەرى» كورمەسىنە ەلوردالىق بيزنەس قۇرىلىمدارى قاتىستى. ولار بوس جۇمىس ورىندارىن ۇسىنىپ, ۇمىتكەرلەرمەن تىكەلەي سويلەسىپ, كەڭەس بەردى.
فورۋمعا قاتىسۋشىلارعا ارنالعان سەمينارلار مەن ترەنينگتەردىڭ دە تاقىرىبى سان الۋان ەكەن. «جۇمىس پەن كارەرا: ءبىرىنشىسىن قالاي تاۋىپ, ەكىنشىسىنە قالاي قول جەتكىزۋگە بولادى؟», «كەرەك كاسىپتى تاڭداۋ», «قارجىلىق تاۋەلسىزدىككە جول», «ەڭبەك زاڭنامالارى بويىنشا قۇقىقتىق نيگيليزم» دەگەن تاقىرىپتاردا بىلىكتى ماماندار ساباق وتكىزدى.
ەلوردالىق كاسىپتىك ءبىلىم بەرۋ مەكەمەلەرىنىڭ كورمەسىنەن ورتا مەكتەپتەردىڭ بيىلعى تۇلەكتەرى ەڭبەك نارىعىندا سۇرانىسقا يە تەحنيكالىق ماماندىقتار جايىندا تولىق اقپارات الدى. قۇرىلىس تەحنيكالىق كوللەدجى, قوعامدىق تاماقتاندىرۋ جانە سەرۆيس, ەنەرگەتيكا جانە بايلانىس, ەكونوميكا, تەحنولوگيا جانە تاعام ءوندىرىسىن ستاندارتتاۋ كوللەدجدەرىنىڭ وكىلدەرى جاستاردىڭ دۇرىس تاڭداۋ جاساۋىنا ىقپال ەتەتىن اقپاراتتارىمەن ءبولىستى. ءىرى بيزنەس قۇرىلىمدارى, قۇرىلىس كورپوراتسيالارى ءوز جۇمىسشىلارى مەن قىزمەتكەرلەرىنىڭ قاتارىن تولىقتىرۋعا لايىق جانداردى ىرىكتەپ, بايلانىس ورناتتى.
ايگۇل ۋايسوۆا
