كەشە ەلوردا اكىمدىگىندە جاڭا تەاتر ماۋسىمىنىڭ اشىلۋىنا بايلانىستى ءباسپاسوز ءماسليحاتى ءوتىپ, قالالىق مادەنيەت باسقارماسى باسشىسىنىڭ ورىنباسارى نۇران قامزين جاڭا ماۋسىم جاڭالىقتارىن جەتكىزدى.
ونىڭ ايتۋىنشا, قازىر باس قالادا 9 تەاتر بار. ونىڭ 3-ەۋى – رەسپۋبليكالىق تەاترلار, ال 6-ى قالا اكىمدىگىنە قارايدى. سونىڭ ىشىندە مۋزىكالىق جاس كورەرمەن تەاترى, «جاستار» تەاترى, «ناز» مەملەكەتتىك بي تەاترىنىڭ جاڭا ماۋسىمى اشىلىپ ۇلگەردى. «قۋىرشاق» تەاترى جىل بويى جۇمىس ىستەيدى. م.گوركي اتىنداعى مەملەكەتتىك اكادەميالىق ورىس دراما تەاترى 122-ماۋسىمىن 15 قازاندا مۋزىكالىق جاس كورەرمەن تەاتر ساحناسىندا اشادى. ال ءا.مامبەتوۆ اتىنداعى مەملەكەتتىك دراما جانە كومەديا تەاترىندا 5-مەرەيتويلىق ماۋسىمى 5 قازاندا اشىلادى.
بيىل 22-30 قازان ارالىعىندا تەاتر جانە كينو رەجيسسەرى, حالىق قاھارمانى ءازىربايجان مامبەتوۆتىڭ 90 جىلدىق مەرەيتويىنا ارنالعان Tەatrall اتتى حالىقارالىق تەاتر فەستيۆالى وتەدى. قالا اكىمدىگىنىڭ ۇيىمداستىرىلۋىمەن وتەتىن فەستيۆالگە رەسپۋبليكالىق جانە شەتەلدىك تەاترلاردان 14 سپەكتاكل ىرىكتەلەدى. بۇل سپەكتاكلدەردى تەاتر قىزمەتكەرلەرىنىڭ قۇرامىنا كىرمەيتىن تاۋەلسىز ساراپشىلار سايلايدى. بۇگىنگى كۇنى 25-تەن استام ءوتىنىم كەلىپ ءتۇستى. كورشىلەس وزبەكستان مەن قىرعىزستان مەملەكەتتەرىنەن, رەسەي فەدەراتسياسىنان, تۇركى مەملەكەتتەرىنىڭ حالىقارالىق ۇيىمىنان (تۇركسوي) وتىنىمدەر قابىلداندى. فەستيۆالدە ۇسىنىلاتىن سپەكتاكلدەرگە قويىلاتىن باستى تالاپ – ءازىربايجان مامبەتوۆ قويعان پەسالار.
قازىلار القاسىنىڭ قۇرامىندا تەاتر سىنشىسى ەركىن جۋاسبەك, ونەرتانۋ كانديداتى امانگەلدى مۇقان سىندى تانىمال تەاترتانۋشىلار بار. بۇعان قوسا, فەستيۆالگە شەتەلدەردەن ارنايى قوناقتار كەلەدى.
ماقتىمقۇلى اتىنداعى تۇرىكمەن ۇلتتىق مۋزىكالىق دراما تەاترى, ت.ءابدىمومىنوۆ اتىنداعى قىرعىز مەملەكەتتىك اكادەميالىق دراما تەاترى, گەيدار اليەۆ اتىنداعى تبيليسي مەملەكەتتىك ءازىربايجان تەاترى, وزبەك مەملەكەتتىك جيزاق مۋزىكالىق دراما تەاترى, سانكت-پەتەربۋرگ كامەرالىق تەاترى قاتىسادى. فەستيۆالدىڭ قورىتىندىسى بويىنشا بىرنەشە اتالىمدا سىيلىقتار تاپسىرىلادى.
