Бүгінде елімізде екінші деңгейлі банктен ипотекалық несиеге үй алып, енді оның ай сайынғы төлемін төлей алмай жүргендер баршылық. Жалғыз баспанасының қарызын жаба алмай, жабығып жүрген жандарға енді мемлекет қол ұшын бермек.
2015 жылғы 11 ақпанда Үкіметтің кеңейтілген отырысында Елбасы Ұлттық банкке Үкіметпен бірлесіп, ипотекалық қарыз алушылардың проблемасын шешу жөнінде шаралар кешенін әзірлеуді тапсырған болатын. Осыған орай Ұлттық банк екінші деңгейлі банктердің ипотекалық тұрғын үй қарыздарын қайта қаржыландыруға 130,0 млрд теңге бөлді.
Мемлекеттен берілетін көмек жайында кеше Парламент Мәжілісінде ҚР Ұлттық экономика министрі Қуандық Бишімбаев хабардар етті. «Жеке блокта қаржылық сектор бойынша түзетулер көзделген. Олар «Қайта қаржыландыру бағдарламасы» шеңберінде ипотекалық тұрғын үй қарыздары бойынша банктер алдында мерзімінен кешіктірілген берешегі бар қарыз алушыларға көмек көрсетуге бағытталған. Бұл аталмыш бағдарламаны іске асыруға кедергі келтіріп тұрған проблемалық мәселелерді шешіп, халықтың әлеуметтік осал топтарының жалғыз тұрғын үйін сақтап қалуға мүмкіндік береді» дейді Қуандық Бишімбаев.
