«Qazmedia» ortalyǧynda «Amangeldı İman» qoǧamdyq qorynyŋ jäne Qostanai oblysy Mädeniet basqarmasynyŋ bastamasymen 1916 jylǧy ūlt-azattyq köterılıs bas sardary, halyq batyry Amangeldı İmanovtyŋ 150 jyldyǧyna arnalǧan brendbuk tanystyrylymy öttı.
Brendbuk avtory – tanymal suretşı, illiustrator, dizainer, Qazaqstan Suretşıler odaǧynyŋ müşesı, QR Körkem akademiia korrespondent müşesı Almas Syrǧabai. Ol soŋǧy jyldary kompiuterlık grafikany qoldanu arqyly «Digital art» stilınde suret salyp jür.
Suretşı Almas Syrǧabai – 2022 jyly bırtūtas ūlttyŋ ūstazy atanǧan Ahmet Baitūrsynūlynyŋ 150 jyldyǧy logotipınıŋ avtory. Sondai-aq ol – Alaş ardaqtysynyŋ ömırınen syr şertıp, tūlǧalyq bolmysyn aiqyndaǧan suret körmesın de ūiymdastyrǧan suretşı-keskındemeşı.
Logotiptıŋ qysqaşa mazmūnyna avtory Almas Syrǧabai bylai dep tüsınıkteme berdı: «Logotip arnaiy qūrylǧan komissiianyŋ talqylauynan öttı. Logotip ekı türlı nūsqada daiyndaldy. Bırınşısı, qazaqtyŋ äigılı keskındemeşısı, qazaq beineleu önerınıŋ negızın saluşylardyŋ bırı, Qazaqstannyŋ halyq suretşısı Äbılhan Qasteev salǧan portretınıŋ negızınde, eldıŋ köŋılınde jürgen belgılı obrazda jasaldy. Ekınşısı, Almatyda ornatylǧan alǧaşqy atty müsın «Amangeldı İmanov» eskertkışın (müsınşı H.Asqar-Sarydja, säuletşı T.Bäsenov; 1947 j.) negızge ala otyryp jasaldy. Sebebı qazaq halqynyŋ jadynda batyrdyŋ obrazy osylai saqtalǧan».
Qazaqstan Kompozitorlar odaǧynyŋ töraǧasy, Qazaqstannyŋ eŋbek sıŋırgen qairatkerı, professor Serıkjan Äbdınūrov bır şyǧarmasyn Amangeldı İmanovqa arnady. Jalpy biylǧy säuır aiynda Astana qalasy äkımdıgınıŋ Erkeǧali Rahmadiev atyndaǧy Memlekettık akademiialyq filarmoniiasy «Batyrdyŋ biık tūlǧasy» atty akademiialyq konsert josparlap, daiyndyqty bastap kettı. Serıkjan Äbdınūrovtyŋ aituynşa, qazaq muzyka önerınde Amangeldı batyrǧa köp şyǧarma arnaldy. Älı de jazylyp keledı. Sonyŋ eŋ körnekılerı – klassik kompozitorlarymyz Mūqan Tölebaev pen Evgenii Brusilovskiidıŋ «Amangeldı» operasy, qytai kompozitory Si Sinhaidyŋ «Amangeldı» simfoniiasy. Sondai-aq Äbılahat Espaev, Latif Hamidi, Boris Erzakovich, Dmitrii Masusin, ataqty küişı Sügır şyǧarmalary Qazaq radiosynyŋ «Altyn qorynda» saqtauly. Al ariialardy oryndaǧandar – qazaq önerınıŋ negızın qalauşylar Manarbek Erjanov, Müsılım men Rişad Abdullinder, Ermek Serkebaev, Suat Äbuseiıtov, Raşit Mūsabaev, Käuken Kenjetaev. Osy atalǧan şyǧarmalardyŋ barlyǧy konsertte jaŋa öŋdeude, jaŋa dybysta ärlenıp, qaitadan jaŋǧyryp oryndalmaq.
Al tanystyrylym soŋynda küişı, Qazaqstannyŋ eŋbek sıŋırgen qairatkerı Anar Mūzdahanova Aitbai Mūzdahanovtyŋ «Amangeldı dübırı» küiın tartu ettı.
