Elımızdıŋ är aimaǧynan kelgen jastardyŋ joly elordada tüiısıp, olardyŋ arasynda şaŋyraq köteretınderı az emes. Solardyŋ bırı – Aidar men Ainagül Süleimenovter.
Keşe jas jūbailar Astana qalasynyŋ äkımı Baqyt Sūltanovtyŋ qabyldauynda boldy. Aitularynşa, Aidar «EKSPO» körmesınde jūmys ıstegen. Ainagül körmenı tamaşalauǧa kelse de, bır-bırımen jolyqpapty. Keiınnen äleumettık jelıde hat almasyp, bır üide tūratyndaryn bılgen. Sodan köp ūzamai jastar köŋıl qosyp, jūptasuǧa uaǧdalasqan. Üilenu toiynyŋ aldynda küieu jıgıt Memleket basşysynyŋ batasyn aludy maqsat tūtyp, qaŋtarda Aqordaǧa elektrondy hat joldap, üilenu toiyna Prezidenttı de şaqyrypty.
– Būl menıŋ ideiam boldy. Osy künnıŋ mäŋgıge este qalǧanyn qaladym. Bırınşıden, ekeumızdıŋ de äkemızdıŋ közı tırı emes. Sol sebeptı ūly adamdardyŋ batasyn alsaq, nūr üstıne nūr bolar degen oi keldı. Bızdı bailanystyrǧan Astanaǧa raqmet. Osylaişa otbasyn qūryp, elordada ömır sürıp jatqanymyzǧa öte quanyştymyz, – dedı Aidar Süleimenov.
Baqyt Sūltanov jas jūbailarǧa Memleket basşysy Nūrsūltan Nazarbaevtyŋ qūttyqtau hatyn tabystady. Qala basşysynyŋ aituynşa, Elbasy jas jūbailardyŋ şaqyru hatyn ystyq yqylaspen qabyl alyp, Aidar men Ainagül Süleimenovterdı otbasylyq ömırge qadam basularymen qūttyqtaǧan. Sondai-aq Memleket basşysy qos ǧaşyqqa zor densaulyq, baqyt pen jarqyn bolaşaq tılegen eken.
– Sızderdı qala tūrǧyndary atynan zaŋdy nekelerıŋızben şyn jürekten qūttyqtaimyn! Osy jyldy Elbasynyŋ «Jastar jyly» dep jariialauy – sızder siiaqty azamattarǧa degen artylǧan ümıt pen mümkındık. Sızderge tatulyq pen baq-bereke tıleimın! – dedı Baqyt Sūltanov.
