Keşe Prezident Qasym-Jomart Toqaevtyŋ töraǧalyǧymen Joǧary Euraziialyq ekonomikalyq keŋestıŋ qorytyndy otyrysy öttı.
Beinebailanys rejimınde ötken jiyn barysynda Joǧary keŋestıŋ Qūrmettı töraǧasy, Elbasy Nūrsūltan Nazarbaev, Armeniia Premer-ministrı Nikol Paşinian, Belarus Prezidentı Aleksandr Lukaşenko, Qyrǧyzstan Prezidentı Sadyr Japarov, Resei Prezidentı Vladimir Putin jäne JEEK-ke baqylauşy memleketterdıŋ basşylary retınde Kuba Prezidentı Dias-Kanel Bermudes pen Özbekstan Prezidentı Şavkat Mirziioev, sondai-aq Euraziialyq ekonomikalyq komissiia alqasynyŋ töraǧasy Mihail Miasnikovich söz söiledı.
Qasym-Jomart Toqaev otyrysty aşyp, oǧan moderator boldy. Memleket basşysy syrtqy faktorlar men karantindık şekteulerge qaramastan, Odaq aiasyndaǧy makroekonomikalyq körsetkışterdıŋ ösım qarqynyna köŋılı tolatynyn atap öttı.
– Biylǧy 9 aidyŋ ışındegı özara sauda-sattyq kölemı 32,5 paiyzǧa artyp, 52 milliard dollarǧa jettı. Būl pandemiiaǧa deiıngı körsetkışten 16,5 paiyzǧa joǧary. Odaqqa müşe elder arasyndaǧy eksport kölemı ūlǧaidy. Mysaly, Qazaqstan eksportynyŋ ösım kölemı 39 paiyz boldy. Salystyrmaly türde alǧanda Euraziialyq ekonomikalyq odaqqa müşe basqa da elderdegı eksport kölemı artqan, – dedı Memleket basşysy.
Prezident Odaqtyŋ töraǧalyǧyna kırısken kezdegı bırlesken jūmystardyŋ bes baǧytyna, atap aitqanda, önerkäsıptık kooperasiiany küşeitu, özara saudadaǧy kedergılerdı joiu, kölık-logistikalyq infraqūrylymdy damytu, sifrlandyru, sondai-aq üşınşı eldermen sauda-ekonomikalyq qatynastardy keŋeitu mäselelerıne toqtaldy.
– Mūnyŋ bärı bır kündık jūmys emes ekenın tüsınemız. Degenmen, qazırdıŋ özınde olardyŋ keibırı tabysty jüzege asyrylyp jatyr, – dedı Prezident.
Qasym-Jomart Toqaev Qazaqstannyŋ töraǧalyǧy barysynda atqarylǧan bırlesken jūmystardyŋ nätijelerıne egjei-tegjeilı toqtalyp, Euraziialyq ekonomikalyq odaqqa müşe elderdıŋ ükımetterı men Euraziialyq ekonomikalyq komissiianyŋ atqarǧan jūmystary üşın rizaşylyǧyn bıldırdı.
Sonymen qatar Memleket basşysy jaŋa syn-qaterler jaǧdaiynda nazar audarudy qajet etetın bırqatar ūsynys aitty.
Atap aitqanda, Prezident sifrlyq önım men elektrondy qyzmet körsetuge degen sūranystyŋ zor ekenın atap öttı. Onyŋ pıkırınşe, qazırdıŋ özınde älemdık maşina jasau naryǧynda mikrochipter men kompiuterlık qūraldardyŋ tapşylyǧyna qatysty jüienıŋ jiı ısten şyǧu derekterı baiqalady.
– Osyǧan bailanysty ükımetterımızge ǧylymi-zertteu instituttaryn qatystyra otyryp, maşina jasau salasy üşın mikrochipter men kompiuterlık qūraldar şyǧaru jönındegı bırlesken kooperasiialyq jobalardy jüzege asyru mäselesın pysyqtaudy tapsyru ūsynylady. Käsıporyndarymyzdyŋ qajettılıgın tolyq qamtamasyz etuge mümkındık beretın öndırıstık baza qūru qajet, al sodan keiın eksportty jolǧa qoiuǧa bolady, – dedı Qazaqstan Prezidentı.
Sonymen qatar Qasym-Jomart Toqaev qūrǧaqtaǧy tasymal mäselesın damytudy, «jürdek» transqūrlyqtyq dälızderdı retke keltırudı jäne olardyŋ öŋırlık jäne jahandyq bäsekege qabılettılıgın qamtamasyz etudı özektı sanaidy. Osy rette Prezident Euraziialyq ekonomikalyq odaqtyŋ tauar ötkızu jelısın qūruǧa qatysty elderımızdıŋ bastamalaryna nazar audardy.
– Qazaqstan keiıngı ekı jyl boiy Köterme-taratu ortalyqtarynyŋ ūlttyq jelısın qūru jūmystaryn jürgızıp keledı. Bız Odaqqa müşe elderdıŋ tauar ötkızu jüiesın qalyptastyruǧa jäne integrasiialauǧa belsendı atsalysuǧa daiynbyz, – dedı Qasym-Jomart Toqaev.
Memleket basşysy kedergılerdı, şekteuler men alyp qoiulardy däiektı türde qysqartudyŋ maŋyzdy ekenın aitty. Biylǧy aqpan aiynda ötken Alqa otyrysynda Kedergılerdı böludıŋ ädıstemesı bekıtıldı. Endı kedergılerdı qarastyryp, jüieleu üderısı, iaǧni olardyŋ türı men qoldanylu merzımı bizneske tiımdı bolu üşın reglamentteldı. Prezident şaǧyn jäne orta käsıporyndardy euraziialyq integrasiia jäne kedergısız sauda üderısıne tartu ısın jalǧastyruǧa şaqyrdy.
Qasym-Jomart Toqaev Euraziialyq ekonomikalyq komissiia jūmysynyŋ tiımdılıgıne jäne onyŋ Odaqqa müşe memlekettermen özara yqpaldastyǧyna arnaiy toqtaldy. Prezident bes eldıŋ müddesın eskere otyryp, bıryŋǧai ärı tūtas ekonomikalyq saiasatty qalyptastyrudyŋ köp eŋbektı talap etetın kürdelı jūmys ekenın atap öttı.
– Bız biyldan bastap Euraziialyq integrasiiany damytudyŋ 2025 jylǧa deiıngı strategiiasyn ıske asyruǧa kırıstık. Strategiianyŋ erejelerın qataŋ saqtap, Odaqtyŋ qazırgı qūqyǧy aiasynan şyqpau kerek dep esepteimın. Bızdıŋ jūmysymyz ben Odaqtyŋ qyzmetı jalpy syrtqy serıktes elderdıŋ zor qyzyǧuşylyǧyn tuǧyzyp otyrǧanyn eskeru maŋyzdy. Būl bızge ülken jauapkerşılık jükteidı, – dedı Memleket basşysy.
Qazaqstan Prezidentı sözın qorytyndylai kele, özara qūrmet pen konstruktivtı dialogty saqtauǧa beiıldı bolu Odaq aiasyndaǧy ūzaq merzımdı ärı berık yntymaqtastyqtyŋ negızı ekenın atap öttı.
2022 jyly Euraziialyq ekonomikalyq odaq organdaryna Qyrǧyz Respublikasy töraǧalyq etedı. Osyǧan orai Memleket basşysy Qasym-Jomart Toqaev Prezident Sadyr Japarovty qūttyqtap, alǧa qoiǧan maqsatqa sättı qol jetkızuıne tılektestık bıldırdı.
Keŋeitılgen formatta ötken şara soŋynda Euraziialyq odaqqa müşe elderdıŋ basşylary talqylaudy şaǧyn qūramda jalǧastyrdy.
Jiyn qorytyndysy boiynşa Odaqqa müşe memleketterdıŋ basşylary Euraziialyq ekonomikalyq odaq keŋıstıgındegı integrasiialyq üderısterdı odan ärı nyǧaituǧa baǧyttalǧan 20 qūjat qabyldady.
