Bügınde elordada 21 köpır bar. Astana körkıne körık qosqanymen qatar, būl injenerlık qūrylǧylardyŋ qalanyŋ tırşılıgın qamtamasyz etudegı keltırer tehnikalyq paidasy da köp.
Şahar joldarynda keptelıstıŋ künde bolyp jatatyny barşamyzǧa mälım. Äsırese, taŋerteŋgı jäne keşkı uaqyttaǧy kölıkter aǧynynyŋ köptıgınen dıttegen jerımızge keşıgıp jetıp jatamyz. Köpşılıgımızge saǧat 9.00-de bastalatyn jūmysymyzdan qalyp qoimas üşın üiımızden erterek şyǧuǧa tura keledı. Keşke taǧy üige jetkenşe asyǧamyz. Keptelıske tüsıp qalmas üşın asyqpai, jūmysta onyŋ azaiatyn mezgılın kütıp otyratyndar da aramyzda kezdesedı.
Keptelıstıŋ saldarynan qoǧamdyq kölıktıŋ de jüru kestesınen auytqityn kezderıne jolyǧyp jatamyz. Būl jait avtobustardyŋ uaqytty quyp, jolda jyldamdyqty asyryp aidaitynynan bılınedı. Sondaida jolauşylardyŋ keibırı jaǧdaidy tüsınbesten jürgızuşıge «aǧaş tiep äkele jatsyŋ ba?» dep aiqailap ta jatady. Mäselenı retteu üşın qalada köpırlerdı köbeitu qajet. Jospar boiynşa da kelesı jyly elordada taǧy üş köpırdıŋ qūrylysy bastalmaq.
Astana qalasy Avtomobil joldary basqarmasynyŋ basşysy Ashat Qaraǧoişinnıŋ aituynşa, sol jaǧalauda kölıkterdıŋ aǧynyn azaitu asa maŋyzdy. Būl maqsatta qysqa merzımde №46 köşeden bastap Husein Ben Talal köşesıne deiın Täuelsızdık daŋǧyly boiynda jol salynbaq. «Būl aumaqta kelesı jyly bır köpır salynady. Ol Esıl özenınıŋ üstınen ötedı. Husein Ben Talal köşesındegı №39 köşeden Abylai han daŋǧylyna deiıngı 10 şaqyrym joldy salu da ülken maŋyzǧa ie. Bırınşı kezeŋde Täuelsızdık daŋǧylynan jaŋa temırjol vokzalyna deiın joldyŋ qūrylysyn jürgızu josparlandy. Osy jerde salynatyn ekı köpır de Esıl özenı men Nūra özenınıŋ arnasy üstımen jürgızıledı. Sonymen, kelesı jyldyŋ ekınşı jartysynda üş köpırdıŋ qūrylysy bastalady. Atalmyş joba ekı-ekı jarym jyl ışınde jüzege asyrylady. Köpırlerdıŋ qūrylysyna 20 milliard teŋgege juyq qarjy jūmsau qarastyryldy» deidı ol.
Basqarma basşysynyŋ sözınşe, köpırler salynatyn köşelerdıŋ kölık jüretın aumaǧy keŋeitılıp, segız jolaqty joldar salynady. Būl jaǧdai keptelıstı joiady degen boljam bar. Sodan soŋ jolauşylardyŋ kerek jerıne jetetın uaqyty ünemdeledı. Al köpırlerdıŋ qūrylysy tek memlekettıŋ qarjysyna jürgızılmek. Atalmyş jobany Ükımet qarap, maqūldady. Endı ony jüzege asyru üşın qarjy bölınuı tiıs.
Amanǧali QALJANOV
