Keşe küllı qazaqstandyq baldyrǧandarǧa Elbasy Nūrsūltan Nazarbaev jaŋajyldyq qūttyqtauyn joldady. Osy künı elımızdıŋ barlyq öŋırınde Prezidenttıŋ atynan şyrşatoi ötkızıldı. «Mäŋgılık eldıŋ qasiettı qūndylyqtary» degen jalpy ataumen ūiymdastyrylǧan merekelık baǧdarlamaǧa Astana qalasy da yjdahatty äzırlenıp, Oquşylar saraiyndaǧy şyrşa tübıne 300 baldyrǧandy jinap, duman körıgın qyzdyrdy.
– Jaŋa jyl – eŋ aldymen, balalarǧa quanyş syilaityn mereke. Sender arqyly qazaqstandyq barşa balalardy kele jatqan jaŋa jylmen qūttyqtaimyn. Bızdıŋ ūly Otanymyz jyldan jylǧa örkendei tüsude. Qazır düniejüzı Qazaq elın qūrmetteidı. Sender osyndai erekşe elde ösıp kele jatqan baqytty ūrpaqsyŋdar. Ata-analaryŋdy quantyp, zerger de zerdelı, bılımdı de bılıktı bolyŋdar. Būl üşın elımızde barlyq mümkındık bar. Jasampaz ısterdıŋ barlyǧy senderdıŋ jarqyn bolaşaqtaryŋ üşın jasalyp jatyr. Barlyq öŋırde jaŋa mektepter salynuda. «Önerlı örge jüzer» deidı dana halqymyz. Öner – bılımnıŋ kenı. Örkendı eldıŋ teŋı bolyŋdar. Jasyl şyrşa – bazarly balalyqtyŋ belgısı. Şyraiyn bermeitın osy şyrşadai jainap öse berıŋder. Bolaşaqtaryŋ baiandy bolsyn, – dedı qūttyqtauynda Prezident.
Astana qalasynda ötken Prezidenttıŋ şyrşatoiyna Bılım jäne ǧylym ministrı Aslan Särınjıpov jäne Astana qalasy äkımınıŋ orynbasary Ermek Amanşaev qatysty.
Jalpy bas qalada ötken Prezident şyrşatoiyna şaqyrylǧan 300 baldyrǧannyŋ 150-ı köpbalaly otbasynan bolsa, qalǧan jartysy – Balalar üiınıŋ tärbielenuşılerı eken.
Mereke barysynda balalar özderıne arnalǧan jaŋajyldyq baǧdarlamany tamaşalady. Ertegı keiıpkerlerımen bırge köŋıldı oiyndardyŋ qyzyǧyna keneldı. Keiıpkerler demekşı, osy joly şyrşatoida qazaq ertegılerı keiıpkerlerınıŋ qarasy basym boldy. Qalleki teatrynyŋ körkemdık jetekşısı, rejisser Talǧat Temenovtıŋ ssenarilık qoltaŋbasy aiqyn aŋǧarylyp tūrdy. Tazşa bala, su perısı, aidahar baldyrǧandardy ertegı älemıne jetelep, ädemı äserge böledı. Al Aiaz ata men Aqşaqar şyrşatoiǧa qatysyp, mäz-mäiram bolǧan balalarǧa Prezidenttıŋ atynan arnaiy äzırlengen syilyqtardy taratty.
Jaŋajyldyq merekege orai sahnalanǧan oiyn-sauyq baǧdarlamasynan keiın balalar tättı taǧamdarǧa toly dastarhannan däm tatty.
Qymbat NŪRǦALİ
