Elımız ömır standarttary joǧary äleumettık memleket qūrudy közdeidı. Būny Elbasynyŋ halyqqa arnaǧan Joldaularynan baiqauǧa bolady. Elımızdıŋ memlekettık saiasatynyŋ negızgı basymdyǧy, ol – halyqtyŋ ömır süru sapasyn arttyru men deŋgeiın ösıru mäselesı. 2005 jyldyŋ 1 qaŋtarynan bastap «Mındettı äleumettık saqtandyru turaly» zaŋǧa säikes mındettı äleumettık saqtandyru jüiesı engızıldı. Būl jüie jūmys ısteitın halyqtyŋ müddelerın qorǧap, äleumettık täuekelge ūşyraǧan jaǧdaida joǧaltqan tabysynyŋ belgılı bır mölşerın taǧaiyndaudy közdeidı. Barlyq jūmys ısteitın jandar men özın-özı jūmyspen qamtyǧandar mındettı äleumettık saqtandyryluǧa jatady. Tek zeinetaqy tölemın alatyndar mındettı äleumettık saqtandyru jüiesınıŋ qatysuşysy bolyp sanalmaidy ärı olar üşın äleumettık audarymdar tölenbeidı. Zaŋǧa säikes jūmys beruşıler jäne özın-özı jūmyspen qamtyǧan tūlǧalar Memlekettık äleumettık saqtandyru qoryna äleumettık audarymdardy töleuşıler bolyp tabylady. Qazırgı uaqytta jūmys beruşılerdıŋ öz qarajaty esebınen töleitın äleumettık audarymdarynyŋ mölşerlemesı qyzmetkerdıŋ ai saiynǧy tabysynyŋ 5 paiyzyn qūraidy. Būl rette, äleumettık audarymdar tölenetın tabystyŋ eŋ joǧarǧy jäne eŋ tömengı şegı belgılengen. Äleumettık audarymdardyŋ eŋ tömengı mölşerı eŋ tömengı jalaqy mölşerınıŋ 5 paiyzynan kem bolmauy kerek, al eŋ joǧarǧy mölşerı eŋ tömengı jalaqynyŋ 10 eselengen mölşerınıŋ 5 paiyzynan aspauy kerek. Būl audarymdar zeinetaqy jarnalary siiaqty jūmysşynyŋ tabysynan ūstalynbaidy, kerısınşe, jūmys beruşınıŋ esebınen tölenedı jäne onyŋ jūmyskerdıŋ aldyndaǧy jauapkerşılıgı bolyp tabylady.
2014 jyldyŋ 1 qaŋtarynan bastap eŋ tömengı jalaqy 19 966 teŋgenı qūraǧandyqtan, ai saiynǧy äleumettık audarymdardyŋ eŋ tömengı mölşerı 998,3 teŋgege, al joǧarǧy mölşerı 9 983 teŋgege teŋ. Jalaqynyŋ eŋ tömengı mölşerınıŋ jyl saiyn özgerıp otyruyna bailanysty, äleumettık audarymdardyŋ tömengı jäne joǧarǧy mölşerı de özgerıp tūrady. Jūmys beruşılerdıŋ äleumettık audarymdardy der kezınde tölep otyruy jūmyskerdıŋ zaŋnamamen közdelgen äleumettık täuekelder tuǧan jaǧdaida Qordan äleumettık tölemderdı aluyn qamtamasyz etedı. Atap aitar bolsaq, Qordan 2005 jyldan bastap – eŋbek etu qabıletınen aiyryluy boiynşa, asyrauşysynan aiyryluy jäne jūmysynan aiyryluy boiynşa, al 2008 jyldan bastap qosymşa – jüktılıgı jäne bosanuy, jaŋa tuǧan balany asyrap aluyna jäne bala bır jasqa tolǧanǧa deiıngı onyŋ kütımıne bailanysty tabysynan aiyryluy jaǧdailaryna äleumettık tölemder tölenedı.
Eŋbek etu qabıletınen aiyrylu jaǧdaiyna tölenetın äleumettık tölem eŋbek etu qabıletınen aiyrylǧan nemese mügedek bolǧan kezeŋge tölenedı, bıraq aluşyǧa zeinetaqy taǧaiyndalǧan künnen bastap toqtaidy. Al asyrauşysynan aiyryluy jaǧdaiyna tölenetın äleumettık tölem – mındettı äleumettık saqtandyru jüiesı qatysuşysynyŋ asyrauynda bolǧan bala kämelettık jasqa tolǧanǧa nemese joǧary oqu ornynyŋ kündızgı bölımınde oqyǧan jaǧdaida 23 jasqa deiın tölenedı. Būl tölemderdıŋ mölşerıne jūmyskerdıŋ soŋǧy 24 aidaǧy äleumettık audarymdar tölengen ortaşa ailyq tabysy, eŋbek etu qabıletınen aiyrylu därejesı men asyrauyndaǧylar sany äser etedı. Taǧaiyndalǧan ūzaq merzımdı äleumettık tölemderdıŋ satyp alu qabıletın qamtamasyz etu maqsatynda QR Ükımetınıŋ şeşımı negızınde jyl saiyn aitylyp otyrǧan äleumettık tölemder ösıp otyrady. Mäselen, 2013 jyldyŋ 1 qaŋtarynan bastap arttyru mölşerı 16 paiyzdy qūrady. Al 2014 jyly būl tölemderdıŋ mölşerı 2 ret, iaǧni 1-qaŋtardan bastap 7 paiyzǧa, 1-säuırden bastap 4,59 paiyzǧa arttyryldy.
Jūmysynan aiyryluy jaǧdaiyna taǧaiyndalatyn äleumettık tölemnıŋ mölşerı jūmyssyz retınde tırkelgen künge deiıngı 24 ai ışınde Qorǧa tüsken ai saiynǧy äleumettık audarymdardyŋ somasy men mındettı äleumettık saqtandyru jüiesıne qatysu ötılı 6 aidan kem bolmauyna bailanysty bolady. Jūmysynan aiyrylu sebepterıne qaramastan tez arada jūmyssyz retınde tırkeluı taǧaiyndalatyn äleumettık tölemnıŋ mölşerıne äser etedı.
Jüktılıgıne jäne bosanuyna, jaŋa tuǧan balany (balalardy) asyrap aluyna bailanysty bır rettık äleumettık tölem jüktılıgı jäne bosanuy boiynşa uaqytşa eŋbekke jaramsyzdyq paraǧynyŋ negızınde bosanǧanǧa deiın 70 künge jäne bosanǧannan keiın 56 künge (auyr bosanǧan jaǧdaida 70 künge) berıletın äleumettık demalystyŋ barlyq kezeŋıne taǧaiyndalady. Onyŋ mölşerı äieldıŋ soŋǧy 12 ai ışınde äleumettık audarymdar tölengen ortaşa ailyq tabysy men berılgen uaqytşa eŋbekke jaramsyzdyq paraǧynyŋ jalpy künder sanyna bailanysty anyqtalady.
Bır jasqa deiıngı bala kütımı üşın tölenetın ai saiynǧy äleumettık tölem bala tuylǧan künge deiıngı soŋǧy 24 ai ışınde jūmys beruşımen Qorǧa tölengen äleumettık audarymdar negızınde anyqtalatyn ortaşa ailyq tabystyŋ 40 paiyzy mölşerınde taǧaiyndalady. Alaida, atalǧan tölemnıŋ belgılengen eŋ joǧarǧy jäne eŋ kışı mölşerı qarastyrylǧan.
Zaŋǧa säikes Qordan tölenetın eŋbek etu qabıletınen aiyrylu, jūmysynan aiyrylu jaǧdailaryna jäne ana men balany qoldauǧa tölenetın äleumettık tölemderden mındettı zeinetaqy jarnalary ūstalynyp, bıryŋǧai jinaqtauşy zeinetaqy qoryna audarylady.
Qordan äleumettık tölemder taǧaiyndau üşın mındettı äleumettık saqtandyru jüiesınıŋ qatysuşysy nemese asyrauşysynan aiyrylǧan tūlǧalar tūrǧylyqty jerı boiynşa Zeinetaqy töleu jönındegı memlekettık ortalyqtyŋ bölımşesıne ötınış bıldıruı kerek.
2005 jyldyŋ 1 qaŋtarynan bastap 2014 jyldyŋ I jartyjyldyǧy aralyǧynda Qordan tölengen äleumettık tölemderdıŋ jalpy somasy 424,2 mlrd teŋgenı qūrady, onyŋ ışınde 388,2 mlrd teŋge nemese 92 paiyzy ana men balany qorǧauǧa jūmsaldy. Qordyŋ qūrylǧan kezınen osy uaqytqa deiın atqarǧan jūmystary mındettı äleumettık saqtandyru jüiesınıŋ qoǧam ömırındegı maŋyzdylyǧy men tiımdılıgın däleldep keledı.
Qazaqstandaǧy mındettı äleumettık saqtandyru salasy turaly tolyq aqparatty www.gfss.kz saitynan aluǧa bolady.
Rüstem Hamzin,
«Memlekettık äleumettık saqtandyru qory» AQ prezidentı