Memleket basşysy Qazaqstan halqy Assambleiasynyŋ «Bırlık. Jasampazdyq. Örleu» atty HHHIII sessiiasyn ötkızdı, dep habarlaidy astana-akshamy.kz
Jiynǧa Parlament Senatyna QHA qatarynan sailanǧan deputattar, respublikalyq etnomädeni bırlestıkterdıŋ jetekşılerı men müşelerı, Assambleianyŋ erıktılerı, sondai-aq beinebailanys arqyly Ūiymnyŋ öŋırlerdegı delegattary qatysty.
Qasym-Jomart Toqaev, eŋ aldymen, elımızdıŋ bırneşe aimaǧyndaǧy tabiǧat apaty saldaryn eŋseru üşın jürgızılıp jatqan auqymdy jūmystarǧa toqtalyp, su tasqyny bastalǧannan berı Qazaqstan halqy Assambleiasy da ortaq ısten şet qalmai, belsendı ärı üilesımdı jūmys ıstep jatqanyn atap öttı. Mūnyŋ bärı özara janaşyr jäne tıleules boludyŋ aiqyn körınısı ekenın aitty.
Prezident türlı syn-qaterge qaramastan, elımız strategiialyq maqsat-mındetterınen ainymaitynyna nazar audardy. Onyŋ aituynşa, az uaqyt ışınde jürgızılgen saiasi reformalar nätijesınde bilıktıŋ barlyq tarmaǧy adamnyŋ zaŋdy müddesın, qūqyǧy men erkındıgın qorǧauǧa jäne ony ılgerıletuge negızdelgen jaŋa jüie boiynşa jūmys ıstei bastady. Endıgı mındet – ädıldık, inkliuzivtılık, pragmatizm qaǧidalaryna negızdelgen jäne halyqtyŋ äl-auqatyn arttyrudy közdeitın jaŋa ekonomika ülgısıne köşu.
Būl oraida Qasym-Jomart Toqaev Assambleianyŋ bügıngı sessiiasy «Bırlık. Jasampazdyq. Örleu» dep atalǧanyn, barşa halqymyzdyŋ strategiialyq baǧdarynyŋ tüpkı mänın osy üş ūǧym däl ärı naqty bıldıretının, bırlık pen yntymaq basty qūndylyǧymyz jäne memlekettık saiasattyŋ būljymas baǧdary bolyp qala beretının aitty.
Prezident osy maqsatqa jetu üşın oryndaluǧa tiıs bırneşe özektı mındetke arnaiy toqtaldy.
Qasym-Jomart Toqaev, eŋ aldymen, Assambleia jūmysyn elımızdıŋ jaŋa gumanitarlyq ideologiialyq doktrinasymen üilestıru qajet dep sanaidy.
Sonymen qatar Prezident bügınde jahandyq kataklizm beleŋ alyp, türlı memleketter arasynda äskeri-saiasi, sauda-ekonomikalyq teketıres, tıptı mädeni-gumanitarlyq tartys küşeiıp bara jatqanyna toqtaldy. Memleket basşysy qoǧamda ūltyna qarai erekşelenuge, oqşaulanuǧa ūmtylǧan kez kelgen äreketke, äsırese, azamattardy tılıne, ūltyna, dınıne nemese mädenietıne bola arandatuǧa, ia bolmasa kemsıtuge mülde jol bermeitın orta qalyptastyru maŋyzdy ekenın aitty.
Prezident Assambleianyŋ institusionaldyq äleuetın nyǧaitu mäselesıne arnaiy toqtalyp, Ūiymnyŋ memlekettık organdarmen, Parlamentpen jäne mäslihattarmen qarym-qatynasyn jaqsarta tüsu kerek ekenın atap öttı. Būl rette Qasym-Jomart Toqaev Assambleia jetekşılerıne memlekettık şeşım qabyldau üderısıne jäne reformalardy ılgerıletu ısıne belsene qatysu, etno-äleumettık şielenıs oşaqtaryn anyqtau jäne ondai oqiǧalardyŋ aldyn aluǧa basa män beru, Assambleiany äleumettık tūtastyq pen otanşyldyqty därıpteitın institut retınde nyǧaitu mındetterın jüktedı.
Memleket basşysy sözın qorytyndylai kele, elımız soŋǧy jyldary asa kürdelı synaqtardyŋ taǧy bır tarihi kezeŋın bastan ötkerıp jatqanyn aityp, bırlık pen yntymaqtyŋ arqasynda būl qiyndyqtyŋ bärın jeŋetınımızge, şynyǧyp, şirap, būrynǧydan da myqty bolyp şyǧatynymyzǧa senım bıldırdı.
– Tarih toǧystyrǧan taǧdyrymyz – bır, senımmen qadam basatyn keleşegımız – bır. Bız bırtūtas ūlt retınde ärdaiym babalar amanatyna adal bolamyz. Qasiettı qara şaŋyraǧymyz – Qazaqstannyŋ jarqyn bolaşaǧyn bırge jasaimyz. Bızdıŋ maqsatymyz – aiqyn, būl – Ädılettı Qazaqstandy qūru. Men Qazaqstan Respublikasynyŋ Täuelsızdıgın qorǧaudy Prezident retındegı eŋ basty mındetım dep sanaimyn, – dedı Qasym-Jomart Toqaev.
Saltanatty jiynda Respublikalyq täjık etnomädeni ortalyǧynyŋ töraǧasy Akbarjon İsmailov, QHA Töraǧasynyŋ orynbasary, Qazaqstan koreilerı qauymdastyǧynyŋ prezidentı Iýrii Şin, «Assambleia jastary» respublikalyq qoǧamdyq ūiymynyŋ töraǧasy Timur Jūmyrbaev, Qaraǧandy oblysyndaǧy «Assambleia jastary» ūiymy ökıldıgınıŋ töraǧasy Aleksandr Urmaşov, Jetısu oblysyndaǧy Dostyq üiınıŋ direktory Rufina Usanova söz söiledı.
Sonymen qatar Qazaqstan Respublikasy Prezidentınıŋ Jarlyǧymen halyqtar arasynda beibitşilikti, dostyq pen yntymaqtastyqty nyǧaituǧa, memlekettık tıldı damytuǧa siŋirgen eŋbegi üşin bırqatar azamatqa memlekettık nagradalar tabystaldy.
Atap aitqanda, II därejelı «Dostyq» ordenımen Astana qalasy Qaiyrbekov atyndaǧy №2 mektep mūǧalımı Elizaveta Şnaider, «El bırlıgı» ordenımen «Qazaqstan ukraindarynyŋ radasy» bırlestıgınıŋ töraǧasy Iýrii Timoşenko, memleket jäne qoǧam qairatkerı Murat Ahmadiev, «Dustlik» Qazaqstan özbekterınıŋ etnomädeni qauymdastyǧy töraǧasynyŋ orynbasary Hasan Şaripov, «Eren eŋbegı üşın» medalımen Stepnogorsk balalar men jasöspırımder sport mektebınıŋ oqytuşysy Nikolai Durachenko, Atyrau qalalyq №3 mektep-gimnaziiasynyŋ mūǧalımı Tatiana Liubina, «Şapaǧat» medalımen Öskemen metallurgiia keşenı Myryş zauytynyŋ küidıruşısı Sergei Panasiuk, Ūlytau oblysy Qojamqūlov atyndaǧy qazaq muzykalyq-drama teatrynyŋ akkompaniatory Arkadii Pobedinskii, Qazaqstan Respublikasy Ūlttyq ūlanynyŋ bölımşe komandirı Kirill Ponomarenko, Aqmola oblysy Araily auyly orta mektebınıŋ mūǧalımı Anastasiia İrubaeva marapattaldy.
Būǧan qosa, Qazaqstan halqy Assambleiasy Şyǧys Qazaqstan oblysy ǧylymi-eksperttık tobynyŋ töraǧasy Nelli Krasnobaevaǧa, Qaraǧandy oblysyndaǧy «Assambleia jastary» ökıldıgınıŋ töraǧasy Aleksandr Urmaşovqa, Jetısu oblysy «Qoǧamdyq kelısım» mekemesınıŋ basşysy Rufina Usanovaǧa Qazaqstan Respublikasy Prezidentınıŋ Alǧysy jariialandy.
