TAǦDYRDYŊ TAR JOLYNAN SOQPAQ TAPQAN
Astanalyq mümkındıgı şekteulı jandar «bastaŋǧy» jasap, «Tiflis» meiramhanasynda bas qosty.
– Qyz-kelınşekter men analar merekesınıŋ qarsaŋynda bas qosuymyzdyŋ bır sebebı – jaŋa jobalarymyzben tanystyru, mügedekter mäselesıne qatysty sūraqtardy öz ortamyzda talqylau. Būl ıstıŋ oŋ basuyna ǧana emes, ärqaisymyzdyŋ köŋılımızde ümıt oiatyp, jıgerlendıre tüsedı. Keŋ jerde kezdesıp, taǧdyrlas adamdarmen aralasyp, myna düniede jalǧyz emes ekendıgımızge köz jetkızu arqyly bır-bırımızdıŋ jıgerımızdı janimyz. Onyŋ bızdei jandarǧa köp septıgı bar, – deidı «DOS» täuelsız ömır» ortalyǧynyŋ töraiymy Dina Erdildinova.
Bastaŋǧynyŋ basty qonaqtarynyŋ bırı – Astana qalasy Käsıpkerler palatasy direktorynyŋ äleumettık mäseleler jönındegı orynbasary Aituǧan Omarov: «Şynyn aitu kerek, mümkındıgı şekteulı azamattardyŋ ortasynda bolǧan saiyn, olardyŋ ruhynyŋ biıktıgıne täntı bolamyn. Qol-aiaǧy aman, denı-qary sau bolsa da tegıs jerde sürınetın talai azamattarymyzǧa ülgı bolyp, ömırge degen közqarasyn özgertuge naq osy jandar sebepker deuge bolady. Käsıpkerler mümkındıgı şekteulı azamattardyŋ jaǧdaiymen jaqsy tanys. Olardyŋ bizneske talpynysyn tüsınıstıkpen qabyldaidy. Qoldarynan şyqqan tuyndylary men qyzmet türlerın naryqqa şyǧaryp, tūtynuşysyn tabuǧa kömektesudı moinymyzǧa alyp otyrmyz. Osy rette, bırıgıp jasaityn jūmystarymyz öz nätijesın beredı dep oilaimyn» dep, öz oiymen bölıstı.
Basqosuda belgılı bolǧandai, tek estu-söileu jaǧynan kemıstıgı bar mügedekterdıŋ qalanyŋ qūrylys alaŋdarynda eŋbek etuge degen yqylasy jaŋa jobalardyŋ aşyluyna türtkı boluda. Astanalyq tanymal qūrylys kompaniialarymen kelısımge kele otyryp, tapşy käsıpke üiretıp, tūraqty jūmysqa ornalastyrudy qalalyq Käsıpkerler palatasy jüzege asyrmaq eken.
Al, respublikalyq neirohirurgiia ortalyǧynyŋ därıgerı Jomart Qamarov: «Älemdık täjıribede mümkındıgı şekteulı jandardyŋ ömırın jeŋıldetu üşın neirostimuliator qondyrǧysy qoldanylady. Qūny üş milliondyq qūrylǧylar omyrtqa jūlyny zaqymdanǧandardyŋ aǧzasyndaǧy keibır auytquşylyqtardy joiady. Ony nauqastarǧa tegın ornatyp, jüielı türde medisinalyq baqylauda ūstaimyz. Mūndai jandardy bızdıŋ ortalyqta emdeu, oŋaltu mäselelerı de oŋ şeşımın tauyp kele jatyr» deidı.
Oidy oi qozǧaidy. Rasynda, mümkındıgı şekteulı jandardyŋ arasynda ömırge esesı ketıp, aşynǧan jan joqtyŋ qasy. Maŋdaiyna jazǧanǧa ünsız könıp, äreketsız moiynsūnu da būlarǧa jat eken. Ala taŋdy közımen atyryp, syrqaty janyna batqanyn da aityp jatpaidy. Mūndai jandar barlyq ıltipat pen qamqorlyqqa laiyq.
Aigül UAISOVA