Taiauda qaladaǧy №61 orta mektepte muzykant ūstaz Baqyt Şampetovtyŋ şäkırtterımen esep beru konsertı bolyp öttı. Būl kısınıŋ ömırbaiany taǧylymǧa toly. Otyz jyldan asa balalarǧa muzykadan sabaq berıp, olardyŋ boiyna öner dänın egıp keledı. Ūlaǧatty ūstazdyq qasiet te ekı adamnyŋ bırıne qona bermeidı. Şynaiy mūǧalımnıŋ şarapaty köpke tiedı. Bızdıŋ keiıpkerımız – osyndai adam.
Baqyt aǧamyzdyŋ alǧaşqy eŋbek joly Qaraǧandy oblysynan bastaldy. Keiın elordaǧa qonys audaryp, şahardaǧy daryndy balalarǧa arnalǧan №9 «Zerde» mamandandyrylǧan mektebı men №30 mektep-gimnaziiasynda jūmys ıstedı. Būl jerde de önerlı azamattyŋ önegelı ızderı qaldy. Qazır ol kısı qyzmet ısteitın oqu ordasynda talantty balalar jeterlık. Olardyŋ arasynda respublikalyq, qalalyq baiqaularda jüldelı orynǧa qol jetkızgender bar.
Esep beru konsertınde muzykanttyŋ öz qolymen qūrǧan «Şabyt» dombyraşylar orkestrı öner körsettı. Orkestr qūramyndaǧy balalardyŋ bärı dombyrany şeber meŋgergen. Olardyŋ oryndauyndaǧy «Balbyrauyn», «Adai», «Jeldırme», «Älqissa», «Dairabai» jäne «Köŋılaşar» küilerı tyŋdarmannyŋ qūlaq qūryşyn qandyrdy. Sondai-aq orkestr janynan qūrylǧan «Şabyt» ansamblınıŋ önerı de täntı ettı. Keş barysynda belgılı ūstaz, önertanuşy Ospan Süleimenov söz alyp, Baqyt Şampetovtyŋ şyǧarmaşylyǧy turaly jyly lebızın bıldırdı.
– Men Baqytty bırazdan berı bılemın. Jaqsy muzykant. Ol – ūstazdyq jolyn önermen ūştastyra bılgen azamat. Onyŋ balalardy muzykaǧa baulyp jürgen eŋbegın erekşe aitsam deimın. Bügın osy jetkınşekterge köŋılım tolyp otyr. Qazaqtyŋ qara dombyrasynyŋ qasietın sezıngen balanyŋ bolaşaǧynan köp ümıt kütemın, – dedı ol. Sondai-aq kompozitor Şolpan Qorǧanbek te balalardyŋ önerın joǧary baǧalady. Konsertte Baqyt aǧanyŋ özı de şäkırtterımen kümbırletıp küi töktı. Öner jolyndaǧy esınen ketpes sätterın söz ettı.
– Elordaǧa alǧaş kelıp, №30 mektep-gimnaziiasynda eŋbek etıp jürgende özge ūlt ökılderınıŋ balalary dombyra üiırmesıne qatysty. Olarǧa da jan salyp dombyranyŋ qyr-syryn üirettım. Bır tatar qyzy qalalyq baiqauda top jaryp, mereiımdı asyrdy. Men öz ömırımdı önersız elestete almaimyn. Ärbır şäkırtımdı balamdai köremın. Qazaqta «ūstazdan şäkırt ozar» degen söz bar. Eger menen şäkırtım ozyp jatsa quanamyn, – deidı önerpaz ūstaz.
Änel JARYLǦASYNQYZY
