Бүгін Елбасы Нұрсұлтан Назарбаевтың қатысуымен «Қазақстандағы жаңа индустрияландыру: орнықты даму мен прогресс үшін» атты жалпыұлттық телекөпір өтеді. Осы индустрияландыру күні аясында Астана қаласында құрылыс материалдарын өндіретін заманауи зауыт іске қосылады. Онда арнайы құрылыс қоспалары мен жылу оқшаулауға арналған өнімдер шығарылады.
Кеше Астана қаласының әкімі Әсет Исекешев пен «Selena FM S.A.» Директорлар Кеңесінің төрағасы Кшиштоф Домарецки нысанды іске қосу мәселесін талқылады. Кәсіпорын өндіретін құрылыс жұмыстарына қажетті өнімдер ЕО-да сертификатталған. Зауыттың өндірістік цехы 5 мың шаршы метр аумақты алады. Жобаның мақсаты – бәсекеге қабілетті жоғары технологиялық өндіріс құру. Сонымен қатар, құрылыс саласына инновациялық және энергия үнемдеуші технологияларды ендіруді, қосымша жұмыс орындарын құруды, Орта Азия мен Ресейге өнім экспорты үшін мүмкіндіктер жасауды көздейді.
Қала әкімдігінің баспасөз қызметінің хабарлауынша, зауыттың өнімдері ғимараттың энергетикалық тиімділігін арттырып қана қоймай, ауаға тасталатын CO2 көлемін азайтуға да мүмкіндік бермек. Жоба бойынша 70 адам жұмыспен қамтылады. Оның өндірістік қуаты жылына 10 000 тоннаға жуық дисперсиондық және 120 000 тонна құрғақ қоспаны құрайды. Өнімнің 40%-ы экспортқа шығарылады.
Айта кетейік, «Селена групп» компаниясы 1992 жылы құрылған. Өз өнімдерін әлемнің 70 еліне жеткізеді.
