Астанада Мемлекет басшысы Нұрсұлтан Назарбаевтың қатысуымен дәстүрге айналған Жалпыұлттық телекөпір өтті. Индустрияландыру күніне арналған игілікті шарада 23 жобаның тұсауы кесіліп, Елбасы телекөпір режимінде жаңа нысандарды іске қосып, индустрияландыру аясындағы жобалар құрылысының басталуына белгі берді.
Ауқымды шарада Елбасы Астана қаласындағы «Selena Insulations» ЖШС құрылыс материалдарын шығаратын зауытты іске қосты. Заман талабына сай нысанныңөнімдері үйлерді жылытуға арналған. «Тауарларымыздың 40 пайызы Ресей мен Орталық Азияға экспортталады. Қазіргі таңда зауытта 70 адам еңбек етеді» деді ЖШС директорлар кеңесінің төрағасы Кшиштоф Домарецки. Ол Мемлекет басшысын Тәуелсіздіктің 25 жылдығымен құттықтап, Қазақстан мен Польша арасындағы әріптестіктің жанданып келе жатқаны жайында ой сабақтап өтті. Елбасы өз кезегінде екі ел арасындағы әріптестік туралы сөз қозғады. «Мен биыл Польшаға ресми сапармен барып қайттым. Сол кезде екі елдің әріптестік байланысын арттыру мақсатында келіссөздер жүргіздік. Бұл – жақсы үлгі. Сіздерде бизнеске және құрылысқа жақсы жағдай жасалған деп үміттенемін» деді Президент.
Сонымен бірге Елбасы Индустрияландыру күні аясында «Парыз» және «Алтын сапа» сыйлықтарын салтанатты жағдайда тапсырды. Биыл «Парыз» байқауының бас жүлдесіне корпоративтік әлеуметтік және экологиялық жауапкершілік қағидаттарын іске асыруда жоғары нәтижеге қол жеткізген «АқсайГазСервис» АҚ ие болды. Жеңімпаз компания әлеуметтік бағдарламаларды жүзеге асыруға жыл сайын 25 млн теңгеге дейін қаржы бөліп келеді. Қазақстан Президентінің «Алтын сапа» сыйлығымен «Қазақстан электролиз зауытының» президенті Р.Романов, «АтырауМұнайМаш» ЖШС директорлар кеңесінің төрағасы С.Түгелбаев, «Химфарм» АҚ директоры Р.Байғарин марапатталды.
Осы жиында «Қазақстанның үздік тауары» республикалық көрме байқауының дипломанттарына арнаулы дипломдар табыс етілді. Байқау жеңімпаздары үш аталым – «Өндірістік мақсаттағы үздік тауарлар», «Халыққа арналған үздік тауарлар», «Ең үздік азық-түлік тауарлары» бойынша анықталды. Айта кетерлік, биыл «Алтын сапа» сыйлығына 100-ден астам кәсіпорын үміткер болса, «Парыз» байқауына қатысуға еліміздегі 501 кәсіпорын өтінім берген.
