Кеше Л.Н.Гумилев атындағы Еуразия ұлттық университетінде «Астана – Тәуелсіздік тұғыры» (Astana25.kz) веб-деректі жобасының тұсаукесері өтті. Аталған жобаны студент жастарға Астана қаласы Ішкі саясат басқармасының басшысы Ерлан Қаналимов таныстырды.
Тәуелсіздіктің 25 жылдығына орай Астана әкімдігі тарту етіп отырған веб-деректі жоба көпшілік қауымға арналған. Себебі бұл жобада ширек ғасырда еліміздің басынан өткізген айтулы оқиғалар ұсынылған. Мысалы веб-деректі жобада архивтік фотолар мен видеокадрлар сәтті берілгенін байқауға болады. Мультимедиялық лонгрид форматында оқырмандарға 1991 жылдан бастап Астананың миллионыншы тұрғынының дүниеге келуіне дейінгі айрықша сәттері қамтылған.
Ерлан Қаналимовтың айтуынша веб-деректі жоба Қазақстан тарихына қызығушылық танытқан оқырманға таптырмас дереккөзі бола алады. Сондықтан да ол аталған жобаның қазақ, орыс және ағылшын тілдерінде дайындауға ерекше мән бергенін тілге тиек етті.
– Веб-деректі форматты Егемендікке жету жолындағы Қазақстан мен жаңа Астанамыз тарихын үлкен аудиторияға жеткізудің тиімді тәсілі ретінде таңдап алдық. Тәуелсіздіктің 25 жылында Елбасымыз Нұрсұлтан Назарбаевтың басшылығымен елді дамытуға қатысты қыруар істер атқарылды. Бүгінде қазақстандықтар бұл жайлы әлемге жар салып, мақтанышпен айта алады. Бұл жобаның бір ерекшелігі алдағы уақытта мұны толықтырып, байыта түсуге мүмкіндік бар. Егер ертең сайтты көріп, қандай да бір толықтырулар енгізу керек болса, ұсыныстарыңызды жолдауға болады. Өйткені жас болғаннан кейін ойларыңызда жақсы идеялар болады деп есептеймін. Осы ретте Астана әкімі Әсет Исекешевтің мультимедиялық жобаны жасау идеясын қолдағанына қуанышты екенімді айтып өткім келеді, – деді басқарма басшысы.
Ерлан Қаналимовтың айтуынша аталған жоба алдағы уақытта қаладағы мектептердің тарих пәнінің мұғалімдеріне таныстырылады.
Серік ҚҰДАЙБЕРГЕНҰЛЫ
