«Астана ЭКСПО-2017» көрмесі аумағындағы көпір құрастырмасы сапасыз материалдар салдарынан опырылып түскен. Яғни жобалау барысында талапқа сай келетін металл конструкциялар дұрыс таңдалып алынбаған.
Халықаралық мамандандырылған көрменің қоғаммен байланыс департаментінің директоры Сергей Куяновтың айтуынша, аталған оқиға бойынша арнайы комиссия құрылып, тәуелсіз сараптама жасалған. «Сараптама барысында опырылудың құрастырмадағы қателіктен болғаны анықталды. Яғни құлап түскен құрастырманы жобалаған қосалқы мердігер металдың басқа түрін пайдаланған» дейді Сергей Куянов.
Көрме кешенінде бас-аяғы сегіз құрастырма болған. Жауапты мердігер бұл құрастырмалардың төртеуін өзі жобалап, қалған төртеуіне қосалқы мердігер тартқан. Нақты осы құрастырманы жобалаған қосалқы мердігер металдың басқа түрін пайдаланған. Мамандардың айтуынша, көрме кешенін тапсырыс беруші әлі қабылдаған жоқ. Сондықтан барлық шығындарды мердігер компания – BI Group өтейді. Бүгінде осы іспетті басқа да конструкцияларды күшейту жұмыстары жүргізіліп, әрбір декоративті элементтің ортасына қосымша тіреуіштерді орнату туралы шешім қабылданып отыр.
Бүркіт НҰРАСЫЛ
