الداعى جىلى 300 مىڭعا جۋىق استانالىق گازبەن قامتاماسىز ەتىلەتىن بولادى. بۇل تۋرالى قالالىق كوممۋنيكاتسيالار قىزمەتىنىڭ الاڭىندا وتكەن ءباسپاسوز ءماسليحاتىندا استانا قالاسى وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى وتىن-ەنەرگەتيكالىق رەسۋرستار ءبولىمىنىڭ باسشىسى ماقسات ەسماعۇلوۆ مالىمدەدى.
ەلوردانى گازداندىرۋ ءۇش كەزەككە بولىنگەن. تۇرعىن ۇيلەردى گازعا قوسۋدىڭ ءبىرىنشى كەزەڭنىڭ ءبىر بولىگى, سونداي-اق ءىشىنارا ەكىنشى كەزەكتىڭ جۇمىسى 2021 جىلدىڭ سوڭىندا تولىعىمەن اياقتالدى. گازداندىرۋدىڭ ەكىنشى جانە ءۇشىنشى كەزەكتەرىنىڭ قالعان بولىكتەرىن رەسپۋبليكالىق جانە جەرگىلىكتى بيۋدجەتتەر قاراجاتى ەسەبىنەن سالۋ جوسپارلانعان بولاتىن.
– قالادا جالپى جەكە سەكتورداعى تۇرعىن ءۇي الاپتارىندا 20 مىڭ ءۇي بار. گازعا 200 مىڭعا جۋىق تۇرعىنى بار 14 مىڭ ابونەنت قول جەتكىزدى. بۇگىنگى كۇنگە دەيىن قالانىڭ كوكتال-1 جانە اگروقالاشىق, جەلەزنودوروجنىي, پرومىشلەننىي تۇرعىن الاپتارى مەن وڭتۇستىك-شىعىس اۋدانىنىڭ وڭ جانە سول جاعى, كۇيگەنجار, ميچۋرين, ينتەرناتسيونالنىي, سونداي-اق پوتانين, ماسكەۋ كوشەلەرىنىڭ اۋداندارى جانە نۇر-بەسىك, اقبيداي, قازاق اۋىلى شاعىن اۋداندارى تولىعىمەن گازداندىرىلدى, – دەدى ءبولىم باسشىسى.
گازعا 8205 جەكە تۇتىنۋشى, 1 گازوبلوكتى بۇيىمدار شىعاراتىن زاۋىت, سونداي-اق 8 كوپپاتەرلى تۇرعىن ءۇي قوسىلعان.
گاز جەلىلەرىنە قوسىلۋ قۇنىن تومەندەتۋ ماقساتىندا اكىمدىك تۇرعىندارعا كومەكتەسۋدە. مىسالى, حالىقتىڭ الەۋمەتتىك وسال توپتارى ءۇشىن, اتاپ ايتساق, جاسى بويىنشا زەينەتكەرلەرگە, مۇمكىندىگى شەكتەۋلى ەرەسەكتەر مەن ەرەكشە قاجەتتىلىگى بار جانە كوپبالالى وتباسىلارعا جەڭىلدىكتەر قاراستىرىلعان. «حالىق بانكىمەن» ازاماتتاردىڭ گازعا قوسىلۋى ءۇشىن نەسيە بەرۋ تۋرالى كەلىسىمگە قول قويىلدى. وسىلايشا, جىل سايىنعى ينفلياتسيانى ەسكەرە وتىرىپ, قالا تۇرعىندارى ۇيلەرىنە وتە ارزان باعاعا گاز وتكىزە الادى. سونداي-اق قۇنى 100 مىڭ تەڭگەدەن 160 مىڭ تەڭگەگە دەيىن تۇراتىن گازدى ەسەپكە الۋ اسپاپتارى حالىققا تەگىن تاراتىلۋدا.
– قالا بويىنشا №1 جەو جانە №2 جەو-داعى 16 قازاندىق گازعا اۋىستىرىلدى. سونىمەن بىرگە 17 الەۋمەتتىك نىسان گازعا قوسىلعان, قالعان 3 نىسان بويىنشا ىسكە قوسۋ-جوندەۋ جۇمىستارى جۇرگىزىلۋدە. بۇگىنگى تاڭدا قالا بويىنشا 8 743-تەن استام تۇرعىنعا تەحنيكالىق شارت بەرىلدى جانە 20 مىڭنان استام ادامعا گازعا قوسىلۋ ماسەلەلەرى جونىندە قىزمەت كورسەتىلدى. بۇل باعىتتاعى جۇمىس ءالى دە جالعاسۋدا.
اعىمداعى جىلى «تۇران», «تەلمان» اۋداندىق قازاندىقتارىنا, يلينكا, تەلمان, پريگورودنىي, Family Village, ءوندىرىس تۇرعىن الاپتارىنا جوعارى قىسىمدى گازبەن جابدىقتاۋدىڭ 80 كم جەلىسى جۇرگىزىلدى. وسىلايشا, 2024 جىلى 300 مىڭعا جۋىق ادام گازعا قوسىلاتىن بولادى. جالپى تۇرعىن ءۇي الاپتارىن گازداندىرۋ جانە ەنەرگيا كوزدەرىن گازعا اۋىستىرۋداعى باستى ماقسات – قالاداعى ەكولوگيالىق جاعدايدى جاقسارتۋ, اتموسفەراعا, اسىرەسە, جەكە سەكتوردا كومىردى پايدالانۋدان تۇسەتىن زياندى قالدىقتاردى ازايتۋ. كۇننەن-كۇنگە قالادا گازعا قوسىلعان ابونەنتتەر سانى ارتىپ كەلەدى, – دەدى ماقسات ەسماعۇلوۆ.
