ۇلتتىق اكادەميالىق كىتاپحانادا جازۋشى-دراماتۋرگ نۇراينا ساتباەۆانىڭ بالالار مەن جاسوسپىرىمدەرگە ارنالعان «الكانىڭ كۇمىس تۇمارى» كىتابىن قازاقشالاعان اۋدارماشى رىمبالا سمايىلوۆامەن كەزدەسۋ, اتالعان تۋىندىنىڭ تانىستىرىلىمى ءوتتى.
بۇل كىتاپ بىلتىر بالالار جىلىنىڭ اياسىندا جارىق كوردى. اۋدارماشىنىڭ ايتۋىنشا, كىتاپ بالالارعا ارنالعانمەن, ەرەسەكتەردى دە قىزىقتىرادى. سەبەبى تۋىندى تارتىمدى تىلمەن تانىمدىق سيپاتتا جازىلعان. ونى وقۋ ارقىلى قىزىل كىتاپقا ەنگەن جانۋارلار الەمى, قۇستار مەن سيرەك كەزدەسەتىن وسىمدىكتەر جايلى ءبىراز مالىمەت الۋعا بولادى. جالپى كىتاپ كاسپي جاعالاۋىنداعى فلورا مەن فاۋنانى تانىستىرادى. تاعى ءبىر ارتىقشىلىعى, شىعارما ۇلتتىق تانىمعا نەگىزدەلگەن. وندا اتا مەن نەمەرەنىڭ قارىم-قاتىناسى, ءتورت تۇلىك سياقتى قازاققا قاستەرلى ۇعىمدار قامتىلعان.
بيلينگۆا, ياعني تۇپنۇسقاسى مەن اۋدارماسى قاتار بەرىلگەن كىتاپتا الكا ەسىمدى اقتاۋدا تۇراتىن بالانىڭ باستان كەشكەنى باياندالادى. وعان اتاسى اۋلەتتىڭ قاسيەتتى مۇراسى – كۇمىس تۇماردى سىيلايدى. سودان بالا جانۋارلار مەن قۇستاردىڭ ءتىلىن ۇعىپ, بويىنا سيقىرلى قاسيەت بىتەدى. سول ارقىلى قيىن جاعدايعا تاپ بولعاندارعا كومەكتەسەدى. جالپى بۇل ەكولوگيالىق تۋىندى دەسەك تە بولادى. تابيعاتتى قورعاپ, ايالاۋعا شاقىراتىن كىتاپتىڭ وقىرمانعا بەرەرى مول.
كىتاپ اۋدارماشىسى تۋرالى ايتاتىن بولساق, رىمبالا سمايىلوۆا قاراعاندى قالاسىندا تۇرادى. ماماندىعى پوليگرافيست ونىڭ ادەبي اۋدارماعا كەلۋىنە جۇبايى, جازۋشى-پۋبليتسيست, اۋدارماشى مارال حاسەننىڭ ىقپالى كوپ بولدى. مارال ساعىنتايۇلىنىڭ ءوزى جيىرماعا تارتا نوبەل سىيلىعى لاۋرەاتتارىنىڭ تۋىندىلارىن, باسقا دا ەلگە تانىمال اۆتورلاردىڭ شىعارمالارىن قازاقشالادى. 2016 جىلى دۇنيەدەن وزدى. جارى رىمبالا كەنجەبايقىزى سودان بەرى قالامگەر مۇراسىن ۇزدىكسىز ناسيحاتتاپ كەلە جاتىر. بىرنەشە ەستەلىك كىتاپ, جازۋشىنىڭ جازعانىن جيناقتاپ, جەتى تومدىق شىعاردى. ۇلتتىق اكادەميالىق كىتاپحانادا بۇرىشىن, ۇلىتاۋ وبلىسى جاڭاارقا اۋدانىندا قالامگەر وقىعان مەكتەپتە ونىڭ اتىنداعى كابينەتتىڭ اشىلۋىنا مۇرىندىق بولدى.
رىمبالا سمايىلوۆا جارى اۋدارۋدى باستاپ, ءتارجىمالاپ ۇلگەرمەگەن كەيبىر تۋىندىلاردى اياقتادى. سونداي شىعارمالاردىڭ قاتارىندا سۆەتلانا الەكسيەۆيچتىڭ «مىرىشقا اينالعان قىرشىندار», ەليس مونرونىڭ «شات-شادىمان كولەڭكەلەردىڭ ءبيى» كىتاپتارى بار. رىمبالا كەنجەبايقىزىنىڭ سوڭعى اۋدارعان تۋىندىسىنىڭ ءبىرى – گارري گرەيدىڭ «ءبىر كەزدەرى امەريكادا» كىتابى. جاسى سەكسەنگە تاياعان اۋدارماشىنىڭ ەڭبەكقورلىعىنا تاڭدانباسقا شارا جوق. قازىر تەمىرتاۋ قالاسىنداعى «ماگنيتكا» اتتى ارداگەرلەر انسامبلىندە دە ءان سالادى. كومپوزيتور قۇرالاي شايمەردەنوۆا جەتەكشىلىك ەتەتىن وسى انسامبل مۇشەلەرى استاناعا اۋدارماشىنىڭ شاشباۋىن كوتەرە كەلىپ, ىستىق لەبىزىن جەتكىزدى. وقىرماندارعا اننەن شاشۋ شاشتى.
